Primeiru Reis 14:1-31

  • Ahias nia profesia kona-ba Jeroboão (1-20)

  • Roboão ukun rai-Judá (21-31)

    • Sisac ataka Jeruzalein (25, 26)

14  Iha tempu neʼebá Jeroboão nia oan-mane Abias sai moras.  Entaun Jeroboão hatete ba ninia feen: “Favór ida, hamriik hodi bá Silo, hatais roupa seluk hodi finje katak ó laʼós haʼu-nia feen atu ema la koñese ó. Profeta Ahias hela iha neʼebá. Nia mak uluk koʼalia ba haʼu katak haʼu sei sai liurai ba povu neʼe.+  Ó tenke lori paun fuan sanulu, dose no buli ida neʼebé nakonu ho bani-been, no bá hasoru nia. Nia sei fó-hatene ba ó saida mak sei akontese ba labarik neʼe.”  Jeroboão nia feen halo tuir ninia liafuan. Feto neʼe bá Silo+ no toʼo Ahias nia uma. Iha tempu neʼebá Ahias nia matan aat ona tanba nia katuas ona.  Maibé Jeová hatete nanis ona ba Ahias: “Jeroboão nia feen mai daudaun atu husu ó kona-ba ninia oan-mane, tanba ninia oan-mane neʼe moras hela. Haʼu sei fó-hatene saida mak ó sei fó sai ba nia.* Bainhira nia toʼo mai, nia sei finje atu ema la koñese nia.”  Bainhira feto neʼe toʼo Ahias nia odamatan, Ahias rona feto neʼe laʼo tama, no Ahias dehan: “Oh Jeroboão nia feen, tama mai. Tanbasá mak ó finje an sai ema seluk? Haʼu simu ona knaar atu fó sai mensajen todan ba ó.  Bá hatete ba Jeroboão: ‘Jeová, Izraél nia Maromak, dehan nuneʼe: “Uluk haʼu hili ó husi ó-nia povu nia leet atu halo ó nuʼudar ulun-naʼin ida ba haʼu-nia povu Izraél.+  Tuirmai haʼu hasai tiha podér nuʼudar liurai husi David nia umakain no entrega ba ó.+ Maibé ó la sai hanesan haʼu-nia atan David, neʼebé kumpre haʼu-nia mandamentu no laʼo tuir haʼu ho ninia laran tomak, hodi halo deʼit buat neʼebé loos tuir haʼu-nia haree.+  Maibé ó-nia hahalok aat liu fali ema sira hotu antes ó, no ó halo maromak ida seluk ba ó-nia an rasik. Ó halo estátua besi atu hakanek haʼu-nia laran,+ no ó fila kotuk ba haʼu.+ 10  Tan razaun neʼe mak haʼu sei lori susar ba Jeroboão nia umakain, no haʼu sei halakon mane hotu* husi Jeroboão nia umakain, inklui mós ema neʼebé kbiit-laek no fraku iha Izraél, no haʼu sei hamoos hotu Jeroboão nia umakain,+ hanesan ema ida hamoos tee toʼo la iha tan! 11  Asu sei han Jeroboão nia jerasaun neʼebé mate iha sidade no manu neʼebé semo sei han sira neʼebé mate iha rai-luan, tanba Jeová mak fó sai ona ida-neʼe.”’ 12  “Agora hamriik bá; fila ba ó-nia uma. Bainhira ó toʼo iha sidade, labarik neʼe sei mate. 13  Ema Izraél hotu sei tanis ba labarik neʼe no hakoi nia, tanba husi Jeroboão nia umakain, labarik neʼe deʼit mak sei hakoi iha rate. Husi Jeroboão nia umakain, só labarik neʼe deʼit mak Jeová, Izraél nia Maromak, hetan buat diʼak iha ninia laran. 14  Jeová sei hili fali liurai ida ba ninia an rasik hodi ukun Izraél. Bainhira loron toʼo mai, sin agora, liurai neʼe sei halakon Jeroboão nia umakain.+ 15  Jeová sei halakon ema Izraél no sira sei sai hanesan duʼut-kain neʼebé nakdoko bá-mai iha bee laran, no nia sei fokit sai ema Izraél husi rai diʼak neʼebé nia fó ona ba sira-nia beiʼala,+ no nia sei halo sira namkari ba Mota Eufrates* nia sorin seluk,+ tanba sira harii ai-riin lulik*+ atu hakanek Jeová nia laran. 16  No nia sei husik tiha ema Izraél tanba sala neʼebé Jeroboão halo no mós tanba Jeroboão dada ema Izraél atu halo sala.”+ 17  Ho ida-neʼe, Jeroboão nia feen hamriik hodi fila no toʼo iha Tirza. Bainhira nia toʼo iha uma nia odamatan, labarik-mane neʼe mate. 18  Entaun sira hakoi nia, no ema Izraél hotu tanis ba nia, neʼe akontese hodi tuir Jeová nia liafuan neʼebé fó sai ona liuhusi ninia atan profeta Ahias. 19  Kona-ba Jeroboão nia istória sira seluk, no kona-ba oinsá nia halo funu,+ no oinsá nia ukun, neʼe hakerek ona iha livru istória kona-ba Izraél nia liurai sira. 20  Jeroboão ukun ba tinan 22. Ikusmai nia mate*+ no ninia oan-mane Nadab mak sai liurai hodi troka nia.+ 21  Iha tempu neʼebá Salomão nia oan-mane Roboão sai ona liurai hodi ukun Judá. Roboão tinan 41 bainhira nia sai liurai, no nia ukun durante tinan 17 iha sidade Jeruzalein, neʼebé Jeová hili ona+ husi Izraél nia suku hotu nia leet nuʼudar fatin atu lori ninia naran.+ Roboão nia inan naran Naamá ema Ammon.+ 22  Nasaun Judá halo buat neʼebé aat tuir Jeová nia haree,+ no sira halo sala aat liu fali sala neʼebé sira-nia beiʼala sira halo hodi provoka Nia sai hirus liu.+ 23  Sira mós kontinua harii fatin aas sira, fatuk lulik sira,* no ai-riin lulik sira*+ iha foho-oan hotu nia leten+ no iha ai-hun buras hotu nia okos.+ 24  Iha rai neʼe mós iha mane sira neʼebé faʼan an* iha templu.+ Sira halo tuir nasaun sira-nia hahalok aat hotu neʼebé Maromak hakribi, katak nasaun sira neʼebé Jeová hasai ona husi ema Izraél nia oin. 25  Iha tinan lima husi Liurai Roboão nia ukun, Liurai Sisac+ husi rai-Ejitu mai ataka Jeruzalein.+ 26  Sisac foti rikusoin husi Jeová nia uma no husi liurai nia palásiu.+ Nia foti buat hotu, inklui mós eskudu osan-mean hotu neʼebé Salomão halo.+ 27  Tan neʼe, Liurai Roboão halo fali eskudu husi riti atu troka eskudu sira-neʼe, no entrega eskudu sira-neʼe ba xefe guarda sira,* neʼebé hein iha liurai nia palásiu oin. 28  Bainhira liurai mai iha Jeová nia uma, guarda sira mai hamutuk ho liurai hodi kaer eskudu sira-neʼe, no depois neʼe, sira tau fali iha guarda nia kuartu. 29  Kona-ba Roboão nia istória sira seluk, no kona-ba buat hotu neʼebé nia halo, neʼe hakerek ona iha livru istória kona-ba Judá nia liurai sira.+ 30  Iha tempu neʼebá sempre iha funu entre Roboão ho Jeroboão.+ 31  Ikusmai Roboão mate* no sira hakoi nia hamutuk ho ninia beiʼala sira iha David nia Sidade.+ Ninia inan naran Naamá ema Ammon.+ Depois neʼe, ninia oan-mane Abijam*+ mak sai liurai hodi troka nia.

Nota-rodapé

Ka “Ó tenke hatete nuneʼe ba nia”.
Orj., “ema naran deʼit neʼebé mii iha moru-lolon”. Liafuan sira-neʼe refere ba mane no uza atu hatudu hakribi.
Orj., “Mota”.
Orj., “latan hamutuk ho ninia beiʼala sira”.
Ka “iha prostitutu sira”. Neʼe katak mane neʼebé halo prostituisaun neʼebé liga ho adorasaun falsu.
Orj., “halaidór”.
Orj., “latan hamutuk ho ninia beiʼala sira”.
Ninia naran seluk mak Abias.