Filipe 2:1-30

  • Ema Kristaun tenke haraik an (1-4)

  • Kristu haraik an no Maromak foti aas nia (5-11)

  • Hakaʼas an atu hetan salvasaun (12-18)

    • Sai hanesan ahi-oan hodi fó naroman (15)

  • Haruka Timóteo no Epafrodito (19-30)

2  Se imi ida deʼit ho Kristu, no se imi fó aten-brani no fó kmaan ba ema seluk tanba imi-nia domin, no se imi hanoin malu,* se imi hadomi sira no mós se imi hatudu laran-sadiʼa ba sira,  entaun imi halo haʼu-nia ksolok sai kompletu hodi hatudu katak imi iha hanoin ida deʼit no hadomi malu, no imi sai ida deʼit, iha neon ida.+  Keta halo buat ida hodi buka atu manán deʼit+ ka foti an,+ maibé ho haraik an hodi haree ema seluk boot liu fali imi.+  Keta buka diʼak deʼit ba imi-nia an rasik,+ maibé buka mós ema seluk nia diʼak.+  Kontinua iha hanoin hanesan Kristu Jesus nian.+  Maski nia mak Maromak nia ilas,+ nia la hanoin atu hadau Maromak nia pozisaun hodi sai hanesan ho Maromak.+  Maibé nia husik buat hotu neʼebé nia iha no sai hanesan atan ida+ no sai ema.+  Laʼós neʼe deʼit, bainhira nia moris nuʼudar ema, nia haraik an hodi halo tuir toʼo mate,+ sin, mate iha ai-riin terus nian.*+  Tan razaun neʼe mak Maromak foti nia ba pozisaun neʼebé aas liu+ no ho laran-diʼak Maromak fó ba nia naran ida neʼebé boot liu naran sira seluk,+ 10  atu nuneʼe, iha Jesus nia naran mak sira hotu neʼebé iha lalehan no iha rai no mós iha rai okos tenke hakneʼak,+ 11  no sira hotu tenke fó sai iha ema nia oin katak Jesus Kristu mak Naʼi+ neʼebé lori glória ba Aman Maromak. 12  Tan neʼe, haʼu-nia maluk doben sira, hanesan imi sempre halo tuir bainhira haʼu iha imi-nia leet, agora imi mós halo liután bainhira haʼu la iha. Kontinua hakaʼas an atu hetan imi-nia salvasaun ho taʼuk no nakdedar. 13  Tanba Maromak mak fó forsa ba imi, hodi fó ba imi hakarak no kbiit atu halo buat neʼebé nia hakarak. 14  Kontinua halo buat hotu hodi la muramura+ no la haksesuk malu,+ 15  atu imi bele sai ema neʼebé moris ho hahalok loos no laran-moos nuʼudar Maromak nia oan+ neʼebé sala-laek iha jerasaun aat no kleʼuk nia leet.+ No iha sira-nia leet mak imi sai hanesan ahi-oan hodi fó naroman iha mundu,+ 16  kontinua kaer metin liafuan moris nian.+ Hodi nuneʼe haʼu bele iha razaun atu haksolok iha Kristu nia loron tanba hatene katak haʼu la halai saugati deʼit ka haʼu-nia serbisu makaʼas la saugati deʼit. 17  Haʼu sai ona hanesan sakrifísiu hemu nian+ neʼebé fui iha imi-nia sakrifísiu nia leten,+ katak imi-nia serbisu santu neʼebé imi halo tanba imi-nia fiar mak book imi, maski nuneʼe haʼu kontente no haksolok hamutuk ho imi hotu. 18  Nuneʼe mós imi tenke sai kontente no haksolok hamutuk ho haʼu. 19  Lakleur tan, haʼu planu atu haruka Timóteo+ ba imi se neʼe tuir Naʼi Jesus nia hakarak, atu nuneʼe bainhira haʼu rona lia-menon ruma kona-ba imi, neʼe bele anima no hametin haʼu. 20  Tanba haʼu la hetan ema seluk neʼebé iha hahalok hanesan nia, no nia sei tau matan ba imi ho laran. 21  Ema sira seluk buka diʼak deʼit ba sira-nia an rasik, laʼós buka Jesus Kristu nia hakarak. 22  Maibé imi hatene oinsá nia fó ona prova kona-ba ninia an, katak hanesan oan ida+ hamutuk ho ninia aman, nia serbí hamutuk ho haʼu atu habelar liafuan diʼak. 23  Tan neʼe bainhira haʼu hatene tiha buat neʼebé sei akontese ba haʼu, haʼu sei haruka Timóteo ba imi. 24  Tuir loloos, haʼu fiar duni iha Naʼi katak lakleur tan haʼu rasik sei vizita imi.+ 25  Maibé agora haʼu sente katak haʼu presiza atu haruka haʼu-nia maluk fiar-naʼin Epafrodito ba imi, nia mak haʼu-nia maluk serbisu-naʼin no maluk funu-naʼin, neʼebé uluk imi haruka mai haʼu atu tau matan ba haʼu-nia presiza.+ 26  Nia hakarak tebes atu haree imi hotu no nia laran-triste tanba imi rona katak nia moras. 27  Tuir loloos, nia sai moras duni toʼo besik mate, maibé Maromak hatudu laran-sadiʼa ba nia, loloos, laʼós ba nia deʼit, maibé ba haʼu mós, atu nuneʼe haʼu labele sai triste liután. 28  Tan neʼe, haʼu haruka lalais nia ba imi, atu nuneʼe bainhira imi haree nia, imi bele haksolok fali no haʼu mós la hanoin barak tan. 29  Entaun, simu nia bá ho haksolok hodi tuir imi-nia toman hanesan imi simu Naʼi nia dixípulu sira, no kontinua hafolin ema hanesan neʼe,+ 30  tanba nia besik atu mate hodi halo Kristu nia serbisu,* no tau ninia moris* iha perigu laran atu taka imi-nia fatin bainhira imi la iha neʼe hodi fó ajuda ba haʼu.+

Nota-rodapé

Ka “se imi ida deʼit hodi hanoin malu”.
Ka karik “Naʼi nia serbisu”.