Primeiru Samuel 9:1-27

  • Samuel hasoru Saul (1-27)

9  Iha mane ida husi suku Benjamim naran Kis+ neʼebé riku tebes. Kis mak Abiel nia oan-mane, Zeror nia bei-oan. Zeror mak Bekorat nia oan-mane, Afia nia bei-oan.  Kis iha oan-mane ida naran Saul,+ neʼebé joven hela no bonitu. La iha mane ida iha ema Izraél nia leet neʼebé bonitu liu fali nia, no nia mós ain-aas liu ema hotu.*  Bainhira Saul nia aman Kis nia kuda-burru* lakon, Kis hatete ba ninia oan-mane Saul: “Favór ida, lori mós atan ida hamutuk ho ó no bá buka kuda-burru sira-neʼe.”  Sira laʼo liu área foho nian iha Efraim no rai-Salisa, maibé sira la hetan kuda-burru sira-neʼe. Sira laʼo liu rai-Saalim, maibé kuda-burru sira la iha neʼebá. Sira laʼo liu rai-Benjamim tomak, maibé sira la hetan kuda-burru sira-neʼe.  Sira toʼo iha rai-Zuf, no Saul dehan ba ninia atan neʼebé hamutuk ho nia: “Mai ita fila ona, atu nuneʼe haʼu-nia aman la sai neon-susar fali kona-ba ita duké ba kuda-burru sira.”+  Maibé ninia atan dehan: “Iha sidade neʼe iha Maromak nia atan ida, mane neʼebé ema respeitu. Buat hotu neʼebé nia koʼalia sempre sai loos.+ Mai ita bá neʼebá agora. Karik nia bele fó-hatene ba ita atu buka iha neʼebé.”  Saul hatete ba ninia atan: “Se ita bá, saida mak ita bele lori ba mane neʼe? Ita la iha paun ida iha ita-nia pasta. Ita la iha buat ida atu lori nuʼudar prezente ba Maromak loos nia atan neʼe. Ita iha saida?”  Atan neʼe hatán: “Iha osan-mutin kiʼik* ida iha haʼu-nia liman. Haʼu sei fó neʼe ba Maromak loos nia atan, no nia sei fó-hatene ba ita atu buka iha neʼebé.”  Iha tempu uluk iha Izraél, bainhira ema buka Maromak nia matadalan, sira toman atu hatete: “Mai ita bá hasoru konsellu-naʼin.”*+ Tanba iha tempu uluk ema bolu profeta nuʼudar konsellu-naʼin.* 10  Entaun Saul hatete ba ninia atan: “Buat neʼebé ó dehan mak diʼak. Mai ita bá.” Nuneʼe sira laʼo ba sidade neʼebé Maromak loos nia atan hela bá. 11  Bainhira sira laʼo daudaun iha dalan atu saʼe ba sidade neʼe, sira hasoru feto-klosan sira neʼebé mai atu kuru bee. Entaun sira husu ba feto sira-neʼe: “Iha konsellu-naʼin*+ iha fatin neʼe ka lae?” 12  Sira hatán: “Sin, iha. Nia laʼo uluk ona. Entaun bá lalais, ohin nia mai iha sidade neʼe tanba povu neʼe atu hasaʼe sakrifísiu+ iha fatin aas.*+ 13  Bainhira imi tama ba sidade neʼe, imi sei hasoru nia antes nia saʼe ba fatin aas atu han. Kuandu nia toʼo iha neʼebá mak povu sira foin han, tanba nia mak sei halo orasaun atu husu bensaun ba sakrifísiu neʼe. Depois neʼe mak ema sira neʼebé hetan konvite bele han. Entaun agora saʼe kedas bá, no imi sei hetan nia.” 14  Entaun sira saʼe ba sidade neʼe. Bainhira sira tama ba sidade nia klaran, Samuel sai daudaun mai atu hasoru sira hodi saʼe ba fatin aas neʼe. 15  Loron ida antes Saul mai iha sidade neʼe, Jeová hatete ona ba Samuel:* 16  “Aban iha tempu neʼe, haʼu sei haruka mane ida husi rai-Benjamim+ bá hasoru ó. Ó tenke hili* nia nuʼudar ulun-naʼin ba haʼu-nia povu Izraél,+ no nia sei salva haʼu-nia povu husi ema Filístia nia liman. Tanba haʼu haree ona haʼu-nia povu nia terus, no haʼu rona ona sira-nia halerik.”+ 17  Bainhira Samuel haree Saul, Jeová hatete ba nia: “Neʼe mak mane neʼebé haʼu fó-hatene ona ba ó, hodi dehan: ‘Nia mak mane neʼebé sei ukun haʼu-nia povu.’”+ 18  Entaun Saul hakbesik ba Samuel iha portaun nia klaran, hodi dehan: “Favór ida, hatudu mai haʼu, konsellu-naʼin* nia uma iha neʼebé?” 19  Samuel hatán ba Saul: “Haʼu mak konsellu-naʼin.* Imi saʼe uluk ba fatin aas neʼe, no ohin imi sei han hamutuk ho haʼu.+ Aban dadeer mak haʼu sei haruka ó fila fali, no haʼu mós sei fó sai ba ó buat hotu neʼebé ó hakarak hatene.* 20  Kona-ba kuda-burru neʼebé lakon loron tolu liubá,+ keta hanoin barak kona-ba neʼe, tanba neʼe hetan fali ona. Liután neʼe, buat diʼak hotu husi Izraél mak sé-nian? Neʼe mak ó no ó-nia aman nia umakain tomak nian,+ loos ka lae?” 21  Saul hatán: “Haʼu mak ema Benjamim ida, no haʼu-nia suku mak kiʼik liu iha Izraél,+ loos ka lae? No haʼu-nia família mak la importante liu iha suku Benjamim, loos ka lae? Entaun tanbasá mak Ita koʼalia hanesan neʼe ba haʼu?” 22  Tuirmai Samuel lori Saul no ninia atan ba han-fatin no fó ba sira tuur-fatin neʼebé importante liu fali konvidadu sira seluk; iha neʼebá iha mane maizumenus naʼin-30. 23  Samuel hatete ba ema neʼebé teʼin: “Lori mai hahán neʼebé haʼu fó ba ó, hodi dehan: ‘Tau ketak ida-neʼe.’” 24  Ho ida-neʼe, ema neʼebé teʼin foti naʼan-kelen, no tau neʼe iha Saul nia oin. Samuel dehan: “Buat neʼebé rai ketak tau ona iha ó-nia oin. Han bá, tanba buat sira-neʼe rai hela ba ó iha tempu neʼe. Tanba haʼu hatete ona ba sira: ‘Haʼu konvida bainaka sira.’” Entaun, iha loron neʼe Saul han hamutuk ho Samuel. 25  Depois neʼe, sira tun husi fatin aas neʼe+ hodi bá sidade, no nia kontinua koʼalia ba Saul iha uma-leten. 26  Sira hadeer sedu, no bainhira rai naroman ona Samuel bolu Saul iha uma-leten, hodi dehan: “Prepara an bá, hodi haʼu bele haruka ó fila.” Entaun Saul sai prontu, depois nia ho Samuel laʼo ba liʼur. 27  Bainhira sira laʼo tun daudaun ba sidade nia liʼur, Samuel hatete ba Saul: “Dehan ba ó-nia atan+ atu laʼo uluk liu ita”, entaun atan neʼe laʼo ulukliu sira. “Maibé ó hamriik lai iha neʼe, atu nuneʼe haʼu bele fó sai Maromak nia liafuan ba ó.”

Nota-rodapé

Orj., “husi kabaas toʼo ulun, nia aas liu fali ema seluk hotu”.
Orj., “kuda-burru inan sira”.
Orj., “siklo 1/4”. Neʼe katak 2,85 g. Haree Ap. B14.
Ka “vidente”. Haree Glosáriu.
Ka “vidente”. Haree Glosáriu.
Ka “vidente”. Haree Glosáriu.
Orj., “loke Samuel nia tilun”.
Orj., “fui mina ba”. Haree “Fui mina” iha Glosáriu.
Ka “vidente”. Haree Glosáriu.
Ka “vidente”. Haree Glosáriu.
Orj., “buat hotu neʼebé iha ó-nia laran”.