Primeiru Timóteo 6:1-21

  • Atan sira tenke hatudu respeitu ba sira-nia patraun (1, 2)

  • Mestre falsu sira no domin ba osan (3-10)

  • Matadalan ba Maromak nia atan (11-16)

  • Sai riku ho hahalok diʼak (17-19)

  • Proteje buat neʼebé entrega ona ba ó (20, 21)

6  Sira neʼebé sai nuʼudar atan, tenke kontinua hanoin katak sira-nia patraun merese simu respeitu tomak,+ atu nuneʼe ema labele koʼalia aat kona-ba Maromak nia naran no ninia hanorin.+  Liután neʼe, se atan sira-nia patraun mak fiar-naʼin, entaun sira keta haree nia la diʼak tan deʼit nia mak sira-nia maluk fiar-naʼin. Maibé, sira tenke serbí ho badinas liután, tanba sira-nia maluk fiar-naʼin neʼebé sira hadomi mak simu buat diʼak husi sira-nia serbisu. Kontinua hanorin buat sira-neʼe no fó sai konsellu sira-neʼe.  Se ema ida hanorin doutrina seluk neʼebé la hanesan ho hanorin neʼebé loos*+ husi ita-nia Naʼi Jesus Kristu, ka la hanesan ho hanorin kona-ba oinsá atu hatudu laran-metin ba Maromak,*+  ema neʼe foti an no la komprende buat ida.+ Nia buka deʼit atu haksesuk malu no diskute malu kona-ba liafuan sira.+ Buat sira-neʼe hamosu laran-moras, istori malu, liafuan neʼebé hafoʼer ema nia naran,* la fiar malu,  buat sira-neʼe mós book ema neʼebé neon foʼer ona+ no la komprende tan lia-loos atu haksesuk malu beibeik kona-ba buat kiʼik. Sira hanoin katak laran-metin ba Maromak* mak dalan atu manán buat ruma ba sira-nia an.+  Tuir loloos se ita laran-metin ba Maromak*+ no kontente ho buat neʼebé ita iha ona, ita bele manán buat diʼak barak.  Tanba ita la lori buat ida mai mundu neʼe, no ita mós labele lori sai buat ida husi mundu neʼe.+  Tan neʼe, se ita iha ai-han no roupa,* ita tenke kontente ho buat sira-neʼe.+  Maibé, ema sira neʼebé hakarak duni atu sai riku monu ba tentasaun, lasu+ no hakarak beik no aat oioin, neʼebé lori terus no mate ba sira.+ 10  Tanba domin ba osan mak hun ba buat aat oioin, no tanba hadomi osan mak ema balu hadook an ona husi fiar no hakanek sira-nia an* ho terus barak.+ 11  Maibé kona-ba ó, Maromak nia atan, ó tenke halai sees husi buat sira-neʼe. Maibé buka hahalok loos, laran-metin ba Maromak,* fiar, domin, tahan no laran-maus.+ 12  Ó tenke luta ho didiʼak atu defende fiar. Kaer metin ba moris rohan-laek neʼebé Maromak bolu ona ó atu simu no neʼebé ó fó sai ho didiʼak ona iha sasin barak nia oin. 13  Iha Maromak nia oin, Maromak neʼebé halo buat hotu kontinua moris, no iha Kristu Jesus nia oin, Jesus neʼebé fó sasin ho didiʼak iha Pónsio Pilatos+ nia oin, haʼu haruka ó 14  atu halo tuir mandamentu neʼe iha dalan neʼebé kompletu no la iha sala toʼo ita-nia Naʼi Jesus Kristu hatudu nia an.+ 15  Naʼi neʼebé ksolok no iha kbiit boot sei hatudu sai ninia an iha tempu neʼebé hili tiha ona. Nia mak Liurai ba sira neʼebé ukun nuʼudar liurai no Naʼi ba sira neʼebé ukun nuʼudar naʼi,+ 16  nia deʼit mak sei nunka mate,+ nia hela iha fatin neʼebé naroman tebes toʼo ema ida mós labele hakbesik,+ ema ida seidauk haree nia ka bele haree nia.+ Nia merese simu hahiʼi no kbiit ba nafatin. Amen. 17  Hanorin* ema sira neʼebé riku iha tempu* agora atu labele foti an, no la tau esperansa ba sira-nia rikusoin neʼebé bele mohu,+ maibé tau esperansa ba Maromak, neʼebé ho laran-luak fó buat hotu neʼebé halo ita kontente.+ 18  Hanorin sira atu halo buat neʼebé diʼak, sai riku ho hahalok diʼak, hatudu laran-luak, prontu atu fahe buat neʼebé sira iha,+ 19  hodi halo nuneʼe sira sei halibur rikusoin espirituál. Neʼe katak sira sei harii fundasaun neʼebé diʼak ba futuru,+ atu nuneʼe sira bele kaer metin ba moris neʼebé loloos.+ 20  Timóteo, proteje buat neʼebé entrega ona ba ó,+ hasees an husi liafuan sira neʼebé la iha folin neʼebé kontra buat santu, no mós hasees an husi koñesimentu falsu neʼebé halo ema koʼalia kontra buat neʼebé loos.+ 21  Ema balu hatudu sai koñesimentu hanesan neʼe, tan neʼe sira hasees an ona husi fiar. Haʼu harohan katak Maromak nia laran-diʼak neʼebé boot hamutuk ho imi.

Nota-rodapé

Ka “neʼebé diʼak; neʼebé fó benefísiu”.
Ka “hatudu devosaun ba Maromak”. Haree “Devosaun ba Maromak” iha Glosáriu.
Ka “liafuan neʼebé insulta makaʼas”.
Ka “hanoin katak devosaun ba Maromak”.
Ka “ita iha devosaun ba Maromak”.
Ka “hela-fatin”.
Ka “no sona sira-nia isin tomak”.
Ka “devosaun ba Maromak”.
Ka “Fó mandamentu”.
Ka “sistema”. Haree Glosáriu.