Primeiru Reis 16:1-34

  • Jeová nia tesi-lia ba Baasa (1-7)

  • Elá, liurai Izraél (8-14)

  • Zimri, liurai Izraél (15-20)

  • Onri, liurai Izraél (21-28)

  • Acab, liurai Izraél (29-33)

  • Hiel harii fali sidade Jerikó (34)

16  Jeová koʼalia kontra Baasa liuhusi Hanani nia oan-mane Jeú,+ hodi dehan:  “Haʼu hili ó husi rai-rahun laran no foti ó sai nuʼudar ulun-naʼin ba haʼu-nia povu Izraél,+ maibé ó kontinua laʼo tuir Jeroboão nia dalan no dada haʼu-nia povu Izraél atu halo sala hodi nuneʼe sira hakanek haʼu-nia laran ho sira-nia sala sira.+  Tan neʼe, haʼu sei halakon Baasa no mós ninia umakain, no haʼu sei halo ninia umakain sai hanesan Nebat nia oan-mane Jeroboão nia umakain.+  Asu sei han Baasa nia jerasaun neʼebé mate iha sidade, no manu neʼebé semo iha lalehan sei han ninia jerasaun sira neʼebé mate iha rai-luan.”  Kona-ba Baasa nia istória sira seluk, no kona-ba ninia kbiit no buat neʼebé nia halo, neʼe hakerek ona iha livru istória kona-ba Izraél nia liurai sira.  Ikusmai, Baasa mate* no hakoi iha Tirza;+ no ninia oan-mane Elá mak sai liurai hodi troka nia.  Jeová mós koʼalia kontra Baasa no ninia umakain liuhusi profeta Jeú, Hanani nia oan-mane, tanba Baasa halo ona hahalok aat hotu iha Jeová nia haree hodi hakanek Ninia laran ho hahalok hanesan Jeroboão nia umakain no mós tanba nia oho Nadab.*+  Iha tinan 26 husi Liurai Asa nia ukun iha rai-Judá, Baasa nia oan-mane Elá sai liurai iha Tirza hodi ukun Izraél, no nia ukun ba tinan rua.  Ninia atan Zimri, xefe ba ninia tropa grupu sorin ida neʼebé lori kuda-karreta funu nian, halo planu aat ba nia bainhira nia hemu toʼo lanu iha Arza nia uma iha Tirza. Arza mak ema neʼebé tau matan ba liurai nia umakain iha Tirza. 10  Zimri tama mai hodi ataka+ no oho Elá iha tinan 27 husi Liurai Asa nia ukun iha rai-Judá, no Zimri mak sai liurai hodi troka nia. 11  Bainhira Zimri sai liurai no tuur ona iha ninia kadunan, nia oho kedas ema hotu husi Baasa nia umakain. Nia la husik mane* ida husi Baasa nia família* no belun sira atu moris. 12  Ho ida-neʼe, Zimri halakon Baasa nia umakain tomak hodi tuir Jeová nia liafuan neʼebé fó sai ona liuhusi profeta Jeú kona-ba Baasa.+ 13  Neʼe akontese tanba sala hotu neʼebé Baasa no ninia oan-mane Elá halo ona no mós tanba sira dada ema Izraél monu ba sala hodi hakanek Jeová, Izraél nia Maromak, nia laran, ho sira-nia estátua sira neʼebé folin-laek.+ 14  Kona-ba Elá nia istória sira seluk no kona-ba buat hotu neʼebé nia halo, neʼe hakerek ona iha livru istória kona-ba Izraél nia liurai sira. 15  Iha tinan 27 husi Liurai Asa nia ukun iha rai-Judá, Zimri sai liurai iha Tirza ba loron hitu. Iha momentu neʼebá tropa sira haleʼu atu ataka sidade Gibeton,+ neʼebé ema Filístia mak ukun. 16  Iha tempu neʼebá tropa sira neʼebé atu ataka sidade neʼe, rona ema dehan: “Zimri halo ona planu no nia mós oho ona liurai.” Entaun ema Izraél hotu hili Onri,+ xefe tropa nian, sai liurai hodi ukun Izraél iha loron neʼe iha tropa nia hela-fatin. 17  Onri no tropa Izraél hotu sai husi Gibeton no bá serku Tirza. 18  Bainhira Zimri haree katak sira manán ona sidade, nia halai ba uma aas* neʼebé seguru iha liurai nia palásiu no sunu uma neʼe, no nia mate iha laran.+ 19  Neʼe akontese tanba ninia sala rasik neʼebé nia halo ona hodi halo buat neʼebé aat tuir Jeová nia haree, hodi kontinua laʼo tuir Jeroboão nia dalan no tanba nia dada ema Izraél ba sala.+ 20  Kona-ba Zimri nia istória sira seluk, no kona-ba ninia planu aat sira, neʼe hakerek ona iha livru istória kona-ba Izraél nia liurai sira. 21  Iha tempu neʼebá mak povu Izraél fahe ba grupu rua. Grupu ida apoia Ginat nia oan-mane Tibni, no hakarak foti nia atu sai liurai. Grupu seluk apoia Onri. 22  Maibé povu neʼebé apoia Onri mak manán povu neʼebé apoia Ginat nia oan-mane Tibni. Nuneʼe Tibni mate, no Onri sai liurai. 23  Iha tinan 31 husi Liurai Asa nia ukun iha rai-Judá, Onri sai liurai hodi ukun Izraél, no nia ukun ba tinan 12. Nia ukun tinan 6 iha Tirza. 24  Nia sosa foho Samaria husi Semer ho osan-mutin kilograma 68 ho grama 400,* no nia harii sidade ida iha foho leten. Nia hanaran sidade neʼe nuʼudar Samaria,*+ hodi tuir Semer nia naran; Semer mak naʼin* ba foho neʼe. 25  Onri kontinua halo buat neʼebé aat tuir Jeová nia haree, no nia aat liu fali ema sira hotu antes nia.+ 26  Nia laʼo tuir Nebat nia oan-mane Jeroboão nia dalan hotu no mós tuir Jeroboão nia sala neʼebé dada ema Izraél atu halo sala hodi hakanek Jeová, Izraél nia Maromak, nia laran, ho sira-nia estátua sira neʼebé folin-laek.+ 27  Kona-ba Onri nia istória sira seluk, no kona-ba ninia kbiit boot no buat neʼebé nia halo, neʼe hakerek ona iha livru istória kona-ba Izraél nia liurai sira. 28  Ikusmai, Onri mate* no hakoi iha Samaria; no ninia oan-mane Acab+ mak sai liurai hodi troka nia. 29  Iha tinan 38 husi Liurai Asa nia ukun iha rai-Judá, Onri nia oan-mane Acab sai liurai iha Izraél. Onri nia oan-mane Acab ukun Izraél iha Samaria+ ba tinan 22. 30  Onri nia oan-mane Acab halo buat neʼebé aat tebes iha Jeová nia haree, no nia aat liu fali ema sira hotu antes nia.+ 31  Acab halo tuir Nebat nia oan-mane Jeroboão nia sala,+ maibé aat liután mak nia mós kaben ho Jezabel.+ Jezabel mak ema Sidon+ nia liurai naran Etbaal nia oan-feto. No Acab komesa adora Baal+ no hakruʼuk ba Baal. 32  Laʼós neʼe deʼit, nia halo altár ida ba Baal iha Baal nia templu+ neʼebé nia harii ona iha Samaria. 33  Acab mós halo ai-riin lulik.*+ Acab halo sala barak hodi hakanek Jeová, Izraél nia Maromak, nia laran, liu fali liurai Izraél sira hotu antes nia. 34  Iha Acab nia tempu mak Hiel ema Betel, harii fali sidade Jerikó. Bainhira Hiel tau sidade nia fundasaun, ninia oan primeiru Abiram mate, no bainhira nia tau sidade nia portaun, ninia oan-ikun Segub mate. Neʼe kumpre Jeová nia liafuan neʼebé fó sai ona liuhusi Nun nia oan-mane Josué.+

Nota-rodapé

Orj., “latan hamutuk ho ninia beiʼala sira”.
Neʼe katak Jeroboão nia oan-mane.
Orj., “ema naran deʼit neʼebé mii iha moru-lolon”. Liafuan sira-neʼe refere ba mane no uza atu hatudu hakribi.
Ka “la husik mane ida neʼebé iha direitu atu selu fali Baasa nia raan”.
Ka “torre”. Haree Glosáriu.
Orj., “talentu 2”. Haree Ap. B14.
Naran neʼe katak “Husi umakain Semer”.
Orj., “naʼi”.
Orj., “latan hamutuk ho ninia beiʼala sira”.