Skip to content

Tanbasá Bíblia bolu Jesus nuʼudar Maromak nia Oan-Mane?

Tanbasá Bíblia bolu Jesus nuʼudar Maromak nia Oan-Mane?

Bíblia nia resposta

Baibain Bíblia bolu Jesus nuʼudar “Maromak nia Oan”. (João 1:49) Liafuan “Maromak nia Oan” hatudu katak Maromak mak Kriadór, ka Hun ba moris hotu, inklui Jesus. (Salmo 36:9; Apokalipse 4:11) Bíblia la hanorin katak Maromak sai aman ba oan ida hanesan ema iha oan.

Bíblia mós bolu anju sira nuʼudar “Maromak nia oan-mane sira”. (Job 1:6, nota-rodapé) Bíblia mós hatete katak ema primeiru Adão mak “Maromak nia oan-mane”. (Lucas 3:38) Maski nuneʼe, Bíblia bolu Jesus nuʼudar Maromak nia Oan-Mane mesak tanba buat primeiru neʼebé Maromak kria mak Jesus, no Maromak kria rasik Jesus.

 Antes Jesus mai mundu, nia moris ona iha lalehan ka lae?

Sin. Antes Jesus moris nuʼudar ema iha mundu, nia moris iha lalehan nuʼudar kriatura espíritu ida. Jesus rasik hatete: “Haʼu tun mai husi lalehan.”—João 6:38; 8:23.

Maromak kria uluk Jesus antes nia kria buat seluk. Bíblia koʼalia kona-ba Jesus hodi dehan:

Jesus kumpre profesia kona-ba ida neʼebé “iha ona husi tempu antigu, husi tempu uluk kedas”.—Miqueias 5:2; Mateus 2:4-6.

 Saida mak Jesus halo antes mai mundu?

Nia iha pozisaun aas iha lalehan. Jesus koʼalia kona-ba ninia pozisaun kuandu nia halo orasaun hodi hatete: “Aman, fó glória ba haʼu . . . neʼebé haʼu iha ona antes mundu iha.”—João 17:5.

Nia ajuda ninia Aman atu kria buat hotu. Jesus serbisu hamutuk ho Maromak nuʼudar “badaen neʼebé matenek”. (Provérbios 8:30) Bíblia koʼalia kona-ba Jesus hodi hatete: “Liuhusi nia mak Maromak kria buat hotu iha lalehan no iha rai.”—Koloso 1:16.

Liuhusi Jesus, Maromak kria buat seluk hotu, inklui anju sira hotu no universu. (Apokalipse 5:11) Dalan neʼebé Maromak no Jesus serbisu hamutuk mak hanesan arkitetu neʼebé serbisu hamutuk ho badaen. Arkitetu halo dezeñu kona-ba uma ruma no badaen mak harii uma neʼe.

Nia sai nuʼudar Liafuan. Bainhira Bíblia koʼalia kona-ba tempu neʼebé Jesus seidauk mai mundu, Bíblia bolu Jesus nuʼudar “Liafuan”. (João 1:1) Ida-neʼe hatudu katak Maromak uza ninia Oan-Mane atu hatoʼo mensajen no matadalan ba kriatura espíritu sira seluk.

Ita mós bele fiar katak Maromak uza Jesus atu hatoʼo mensajen no matadalan ba ema iha rai. Karik Maromak koʼalia ba Adão no Eva iha jardín Eden liuhusi Jesus. (Génesis 2:16, 17) Karik, Jesus mak anju neʼebé dirije nasaun Izraél antigu iha rai-fuik no lian neʼebé sira tenke halo tuir didiʼak mak Jesus nia lian.—Éxodo 23:20-23. *

^ par. 18 Maromak mós uza anju balu atu koʼalia ba ema, laʼós deʼit Liafuan. Porezemplu, Maromak uza anju sira seluk neʼebé laʼós ninia Oan-Mane primeiru atu hatoʼo Ukun-Fuan ba ema Izraél antigu.—Apóstolu 7:53; Galásia 3:19; Ebreu 2:2, 3.