Soleki fa wi si na ini les 13, dan Gado no feni ala kerki bun. Ma dati no wani taki dati wi no man anbegi wi Mekiman na wan fasi di a feni bun. Fa Gado wani taki wi musu anbegi en? (Yakobus 1:27) Meki wi luku san Bijbel e taki.

1. Fa wi kan kon sabi fa wi musu anbegi Gado?

Bijbel e sori wi fa wi musu anbegi Gado. Wan leisi di Yesus ben begi, a taigi Gado: „Yu wortu e taki san tru” (Yohanes 17:17). Son kerki no e hori densrefi na Bijbel. Na presi fu dati den e leri sma san densrefi wani èn den e hori densrefi na den gwenti fu libisma. Ma Yehovah no breiti nanga den sma di e ’trangayesi den komando fu en’. (Leisi Markus 7:9.) Wi kan meki Yehovah prisiri te wi e du san Bijbel e taki.

2. Fa wi musu anbegi Yehovah?

Fu di Yehovah na wi Mekiman, meki wi musu anbegi en wawan (Openbaring 4:11). Wi musu lobi en èn wi no musu gebroiki popki, prenki, noso tra sani fu anbegi en.​—Leisi Yesaya 42:8.

Na anbegi fu wi musu ’santa èn Yehovah musu feni en bun’ (Romesma 12:1). Disi wani taki dati wi musu libi leki fa a wani. Fu eksempre, den wan di lobi Yehovah e lespeki a trowlibi neleki en. Èn den no e du sani di no bun gi den gosontu. Den no e smoko, den no e gebroiki drugs èn den no e dringi tumusi furu sopi. a

3. Fu san ede wi musu kon makandra nanga tra anbegiman fu Yehovah?

Den konmakandra di wi e hori ibri wiki e gi wi na okasi fu „prèise Yehovah” makandra nanga a gemeente (Psalm 111:1, 2). Wan fasi fa wi e du disi na te wi e singi gi en. (Leisi Psalm 104:33.) Yehovah e aksi wi fu go na den konmakandra fu di a lobi wi èn fu di a sabi taki den o yepi wi fu kisi têgo libi. Te wi e go na den konmakandra, dan wi e gi trawan deki-ati èn wi srefi e kisi deki-ati tu.

 SORTU TRA SANI YU KAN LERI?

4. Wi no musu gebroiki popki te wi e anbegi Gado

5. Te wi e anbegi Yehovah wawan, dan wi e kon fri fu falsi leri

 6. Wi kan prèise Gado te wi de na den konmakandra

Wi e prèise Yehovah èn wi e gi trawan deki-ati na den konmakandra te wi e singi èn te wi e gi piki. Leisi Psalm 22:22 èn taki fu den aksi disi:

• Yu lobi den piki di yu e yere na den konmakandra?

• Yu wani gi wan piki èn yu wani sabi fa yu kan sreka fu du dati?

7. Yehovah lobi en te wi e fruteri trawan san wi leri

Furu fasi de fa wi kan fruteri trawan san wi leri na ini Bijbel. Leisi Psalm 9:1 nanga 34:1. Baka dati taki fu na aksi disi:

• Sortu sani di yu leri na ini Bijbel yu wani fruteri wan sma?

 SAN YU LERI?

Yehovah e breiti te wi e anbegi en wawan, te wi e prèise en na den konmakandra èn te wi e fruteri trawan san wi leri.

Fa yu ben o piki den aksi disi?

• Fa wi kan kon sabi fa wi musu anbegi Gado?

• Fu san ede wi musu anbegi Yehovah wawan?

• Fu san ede wi musu kon makandra nanga tra sma di e anbegi Gado?