LES 19
Yehovah Kotoigi na trutru Kresten?
Wi leki Yehovah Kotoigi e bribi taki wi na trutru Kresten. Fu san ede wi e taki dati? Fu piki na aksi disi, dan wi o luku pe den sani di wi e bribi komoto, wi o luku fu san ede wi nen Yehovah Kotoigi èn fa wi e sori lobi gi makandra.
1. Pe den sani di Yehovah Kotoigi e bribi komoto?
Yesus ben taki: „[Gado] wortu e taki san tru” (Yohanes 17:17). Neleki Yesus, Yehovah Kotoigi e hori densrefi na Bijbel. Fu eksempre, na ini a yari 1870 wan grupu sma bigin studeri Bijbel fu kon sabi san a e leri trutru. Den ben hori densrefi na Bijbel, awinsi den kerki ben leri sma tra sani. Baka dati den bigin fruteri sma san den ben leri na ini Bijbel. a
2. Fu san ede wi e kari wisrefi Yehovah Kotoigi?
Yehovah e kari den anbegiman fu en, en kotoigi, fu di den e fruteri sma fa a de trutru (Hebrewsma 11:4–12:1). Fu eksempre, na ini owruten Gado ben taigi en pipel: „Unu na mi kotoigi.” (Leisi Yesaya 43:10.) Bijbel e kari Yesus „a kotoigi di de fu frutrow” (Openbaring 1:5). Dati meki na ini 1931 wi teki a nen Yehovah Kotoigi. Wi feni en wan grani fu tyari a nen dati.
3. Fa Yehovah Kotoigi e sori lobi neleki Yesus?
Yesus ben lobi den disipel fu en so furu taki a ben si den leki famiri. (Leisi Markus 3:35.) Na so a de tu nanga Yehovah Kotoigi. Den de na heri grontapu, ma toku den abi wánfasi èn den de leki wan famiri. Dati meki den e kari makandra brada nanga sisa (Fileimon 1, 2). Bijbel e taki dati wi musu „lobi ala brada” (1 Petrus 2:17). Yehovah Kotoigi e du disi na difrenti fasi. Fu eksempre, den e yepi den brada nanga sisa di de na nowtu, awinsi pe fu grontapu den de.
SORTU TRA SANI YU KAN LERI?
Wi o leri moro fu den sani di Yehovah Kotoigi du na ini a ten di pasa èn wi o si tra buweisi taki den na trutru Kresten.
Tru Kresten e hori densrefi na Bijbel èn den e fruteri sma san den leri
4. Den sani di wi e bribi komoto na ini Bijbel
Yehovah ben taki na fesi taki sma ben o kon frustan Bijbel moro bun. Leisi Danièl 12:4 èn taki fu na aksi disi:
-
San Gado pipel ben o kon sabi efu den ben o tan ondrosuku Bijbel?
Na ini a felem disi yu o si fa Charles Russell nanga wan grupu sma ben e studeri Bijbel. Prei a FELEM èn taki fu na aksi disi:
-
Na ini a felem disi, fa Charles Russell nanga den tra Bijbel Ondrosukuman ben studeri Bijbel?
Yu ben sabi a sani disi?
Son leisi wi ben musu kenki a fasi fa wi ben si sani. Fu san ede? Neleki fa safrisafri wi e bigin si sani moro krin te a son e opo, na so a de tu taki safrisafri Gado yepi wi fu frustan en Wortu moro bun. (Leisi Odo 4:18.) Bijbel no e kenki, ma te wi e kon frustan en moro bun, dan wi e kenki a fasi fa wi ben si sani.
5. Wi nen Yehovah Kotoigi fu di wi e fruteri sma fu Yehovah
Fu san ede wi teki a nen Yehovah Kotoigi? Prei a FELEM èn taki fu na aksi disi:
-
Fu san ede a nen Yehovah Kotoigi na wan bun nen gi wi?
Fu san ede Yehovah teki libisma fu de kotoigi fu en? Fu di sma fruteri furu lei fu Yehovah, meki den kotoigi fu en ben o leri sma fa a de trutru. Kon meki wi luku tu fu den lei dati.
Son kerki e leri sma taki den mag gebroiki popki fu anbegi Gado. A sani disi tru? Leisi Lefitikus 26:1 èn taki fu den aksi disi:
-
San a tekst disi e sori? Fa Yehovah feni en te wi e gebroiki popki fu anbegi en?
Son kerki fesiman e leri sma taki Yesus na Gado. Na dati Bijbel e leri? Leisi Yohanes 20:17 èn taki fu den aksi disi:
-
San a tekst e sori? Gado nanga Yesus na a srefi sma?
-
Fa yu feni en taki Yehovah seni den kotoigi fu en fu leri sma suma na en èn suma na en Manpikin?
6. Wi lobi makandra
Bijbel e agersi Kresten nanga den difrenti pisi fu a libisma skin. Leisi 1 Korentesma 12:25, 26 èn taki fu den aksi disi:
-
San wan trutru Kresten e du te a e si taki wan brada noso sisa fu en e pina?
-
Yu si fa Yehovah Kotoigi e sori lobi gi makandra?
Te Yehovah Kotoigi na ini wan kondre e pina, dan den Kotoigi fu tra kondre e go yepi den wantewante. Kon meki wi luku wan eksempre. Prei a FELEM èn taki fu na aksi disi:
-
Te yu e luku fa Yehovah Kotoigi e yepi makandra, dan san dati e sori?
Fu di tru Kresten abi lobi, meki den e yepi sma di de na nowtu
SON SMA E TAKI: „Yehovah Kotoigi no de so langa ete.”
-
Sensi o ten Yehovah bigin kari den anbegiman fu en, en kotoigi?
SAN YU LERI?
Yehovah Kotoigi na trutru Kresten. Wi de na heri grontapu èn wi de leki wan bigi famiri. Wi e hori wisrefi na Bijbel èn wi e fruteri sma fa Yehovah de trutru.
Fa yu ben o piki den aksi disi?
-
Fu san ede wi teki a nen Yehovah Kotoigi?
-
Fa wi e yepi makandra?
-
Yu denki taki Yehovah Kotoigi na trutru Kresten?
TRA SANI DI YU KAN LUKU
Na ini a felem disi yu o leri moro fu a historia fu Yehovah Kotoigi.
Jehovah’s Getuigen— Geloof in actie, Deel 1: Uit het duister (1:00:53)
Na ini a felem disi yu o yere san na wan fu den falsi leri di sma e bribi èn fa Yehovah Kotoigi yepi sma fu kon sabi san tru.
Na a website fu wi yu kan kisi piki tapu aksi di yu abi fu Yehovah Kotoigi.
Stephen no ben lobi sma fu tra ras èn dati meki a ben du ogri nanga den. Na ini na artikel disi yu kan leisi fa den sani di a si na Yehovah Kotoigi yepi en fu kenki.
„Mi libi ben e kon moro ogri dei fu dei” (A Waktitoren, 1 yuli 2015)
a Sensi 1879, Yehovah Kotoigi e tyari a tijdschrift, A Waktitoren, kon na doro fu leri sma san Bijbel e taki.
