LES 44
Gado feni ala fesa bun?
Yehovah wani taki wi prisiri na ini a libi èn a e feni en bun te wi e hori fesa. Ma na ala fesa a feni bun? Fa den bosroiti di yu o teki na ini a tori disi o sori taki yu lobi Yehovah?
1. Fu san ede Yehovah no feni furu fesa bun?
Kande yu no ben sabi taki furu fu den fesa di sma e hori abi fu du nanga falsi leri èn nanga na anbegi fu falsi gado. Son fesa abi fu du nanga ogri yeye èn sma e hori son fesa fu di den e bribi taki libisma abi wan sili di no man dede. Sma e hori son fesa tu fu di den e bribi taki a o tyari koloku gi den (Yesaya 65:11). Yehovah e taigi den anbegiman fu en: „No fasi den sani moro di no krin.”—2 Korentesma 6:17. a
2. Fa Yehovah feni en te sma e hori fesa di e gi tumusi furu grani na libisma?
Yehovah e warskow wi fu no „frutrow na tapu libisma”. (Leisi Yeremia 17:5.) Son fesa e hori fu gi grani na tiriman noso na srudati. Tra fesa e hori na a dei di a kondre kisi srefidensi èn tapu a dei dati furu sma e gi grani na a fraga (1 Yohanes 5:21). Èn son fesa e hori gi politiek partèi. Fa Yehovah ben o firi efu wi ben o gi tumusi furu grani na wan libisma noso na wan organisâsi di e gi sma deki-ati fu du sani di de teige a wani fu Yehovah?
3. Fa sma e tyari densrefi na son fesa?
Bijbel e sori taki Gado no feni en bun te sma e ’dringi win pasa marki, te den e hori bradyari fesa èn te den e strei dringi sopi’ (1 Petrus 4:3). Na son fesa sma no man hori densrefi èn den e du wan lo morsu sani. Efu wi wani tan mati fu Yehovah wi no musu go na den sortu fesa disi.
SORTU TRA SANI YU KAN LERI?
Wi o si taki Yehovah e prisiri te wi e bosroiti fu no hori fesa di a no feni bun.
4. No hori fesa di Yehovah no lobi
Leisi Efeisesma 5:10 èn taki fu den aksi disi:
-
San yu musu sabi fosi yu bosroiti fu hori wan fesa?
-
Sortu fesa sma e hori na ini a kondre pe yu e tan?
-
Yu denki taki Yehovah feni den fesa disi bun?
Fu eksempre, oiti yu aksi yusrefi fa Gado e denki fu friyari-oso? Nowan presi na ini Bijbel yu e leisi fu wan anbegiman fu Yehovah di ben hori wan friyari-oso. Ma Bijbel e taki fu tu friyari-oso fu sma di no ben dini Gado. Leisi Genesis 40:20-22 nanga Mateyus 14:6-10. Baka dati taki fu den aksi disi:
-
San pasa na ala den tu friyari-oso?
-
Te yu luku den tu tekst disi, dan fa yu denki Yehovah e denki fu friyari-oso?
Ma kande yu e aksi yusrefi: ’Yehovah e span efu mi go na wan friyari-oso noso wan tra fesa di no komoto fu Bijbel?’ Leisi Eksodes 32:1-8. Baka dati prei a FELEM èn taki fu den aksi disi:
-
Fu san ede wi musu sabi san Yehovah feni bun?
-
Fa wi kan kon sabi dati?
Fa wi kan sabi sortu fesa Gado no feni bun?
-
A fesa disi abi fu du nanga falsi leri? Efu yu wani sabi dati, dan ondrosuku pe a fesa komoto.
-
A fesa disi e gi tumusi furu grani na wan libisma noso na wan organisâsi? Wi musu gi Yehovah grani moro ala tra sma èn wi musu frutrow taki a o lusu ala den problema na grontapu.
-
Den sani di sma e du na a fesa na sani di Bijbel e krutu? Ala ten wi musu tyari wisrefi na wan fasi di Yehovah feni bun.
5. Yepi trawan fu lespeki a bribi fu yu
Te sma e dwengi wi fu hori wan fesa di Yehovah no feni bun, dan a no makelek fu taigi den taki wi no o hori en. Fruteri den na wan lespeki fasi san yu bosroiti èn abi pasensi nanga den. Prei a FELEM fu si fa yu kan du disi.
Leisi Mateyus 7:12 èn taki fu den aksi disi:
-
Te yu luku a vers disi, dan yu musu taigi den famiriman fu yu di no e dini Yehovah taki den no musu hori wan fesa?
-
Fa yu kan sori yu famiri taki yu lobi den ete awinsi yu no e hori son fesa nanga den?
6. Yehovah wani taki wi de koloku
Yehovah wani taki wi prisiri makandra nanga wi famiri nanga wi mati. Leisi Preikiman 8:15 èn taki fu na aksi disi:
-
Fa a vers disi e sori taki Yehovah wani taki wi de koloku?
Yehovah wani taki den anbegiman fu en meki prisiri èn taki den e du sani makandra. Prei a FELEM fu si fa den e du disi na den internationaal kongres.
Leisi Galasiasma 6:10 èn taki fu den aksi disi:
-
Wi musu hori den pôpi fesa fu man „du bun” gi trawan?
-
San yu lobi moro? Fu gi wan sma wan kado fu di ala sma e du en tapu wan fesadei noso fu gi en wan kado fu di yu srefi wani?
-
Ten na ten furu Kotoigi e orga wan pikin fesa gi den pikin fu den èn den e gi den kado. Efu yu abi pikin, dan sortu sani yu kan du gi den?
SON SMA E TAKI: „A no abi trobi pe wan fesa komoto, solanga yu kan prisiri nanga yu famiri nanga yu mati.”
-
San yu ben o piki?
SAN YU LERI?
Yehovah wani taki wi prisiri makandra nanga wi famiri nanga wi mati. Ma a no wani taki wi hori fesa di a no feni bun.
Fa yu ben o piki den aksi disi?
-
Fa yu kan kon sabi efu Yehovah feni wan fesa bun?
-
Fa wi kan yepi wi famiri nanga wi mati fu frustan fu san ede wi no e hori son fesa?
-
Fa yu du sabi taki Yehovah wani taki wi de koloku èn taki wi meki prisiri?
TRA SANI DI YU KAN LUKU
Na ini na artikel disi yu o si sortu fesa Kresten no e hori.
„Waarom vieren Jehovah’s Getuigen bepaalde feestdagen niet?” (Web-artikel)
Na ini na artikel disi yu o si fo reide fu san ede wi e bribi taki Gado no feni en bun taki wi e hori friyari-oso.
„Fu san ede Yehovah Kotoigi no e hori friyaridei?” (Web-artikel)
Na ini a felem disi yu o si fa yongu pkin di lobi Yehovah kan meki a firi prisiri na a ten te fesa e hori.
Milyunmilyun Kresten no e hori Kresneti. Den feni taki den e misi wan sani?
„Den feni wan moro bun sani” (A Waktitoren, 1 december 2012)
a Na ini „Ete wan tu sani 5” yu kan si san yu kan du te sma e aksi yu fu du son sani tapu wan fesadei.
