Odo 6:1-35
6 Mi manpikin, efu yu agri fu tan borgu gi wan trawan,+ efu yu meki wan kruderi nanga wan sma di yu no sabi,+
2 efu yu mofo tron wan trapu gi yu,+ iya, efu yu pramisi wan sani di poti yu na problema,
3 dan opo du wan sani, mi manpikin. Puru yusrefi na ini a problema, bika na fadon yu fadon na ini na anu fu a trawan.+ Esi-esi, lon go na a sma dati, saka yusrefi èn begi en fu broko a kruderi.+
4 No tapu yu ai fu sribi èn no tapu yu brenki ai fu dyonko, solanga yu no du a sani disi.+
5 Fri yusrefi leki fa wan dia e fri ensrefi fu na anu fu wan ontiman èn leki fa wan fowru e fri ensrefi fu na anu fu wan sma di e fanga fowru.+
6 Yu lesiman+ yu, go na den mira!+ Go luku fa den e libi èn kon kisi koni.
7 Aladi den no abi edeman, fesiman, noso tiriman,
8 toku den e sreka den nyanyan na a waran ten fu a yari.+ Na a kotiten den e tyari a nyanyan fu den kon na wán.
9 Yu lesiman, o langa yu o tan didon?+ O ten yu o wiki?+
10 Sribi pikinso ete, dyonko pikinso ete, fow yu anu pikinso ete te yu e didon,+
11 dan pinaten o kon na yu tapu leki wan fufuruman+ èn nowtu o teki yu leki wan man di e kon na yu tapu nanga den fetisani fu en.+
12 Wan wisiwasi man,+ iya, wan man di e du hati sani nanga trawan, na wan sma di lobi taki wan lo lei.+
13 A e pingi en ai,+ a e meki sani nanga en futu èn a e sori nanga en finga.+
14 Soso lei de na ini en ati.+ Ala yuru a e sidon prakseri fa a kan go du ogri.+ A lobi sutu faya gi sma fu den meki trobi.+
15 Fu dati ede ogri o miti en wantronso.+ Esi-esi sma o pori en èn dresi no o de gi en.+
16 Siksi sani de di Yehovah no lobi kwetikweti,+ iya, seibi sani de di de wan tegu sani gi en.+ Dati na:
17 sma di e luku na wan heimemre fasi,+ sma di e lei,+ sma di e kiri trawan di no du nowan ogri,+
18 wan ati di e prakseri fa a kan du trawan ogri,+ futu di e hasti densrefi fu go du ogri,+
19 wan falsi kotoigi di e fruteri soso lei,+ noso iniwan sma di lobi sutu faya fu meki trobi kon de na mindri brada.+
20 Mi manpikin, arki den komando fu yu papa+ èn no gowe libi a wèt fu yu mama.+
21 Kibri den dipi na ini yu ati+ èn tai den na yu neki.+
22 Awinsi pe yu e go, a wèt dati o tiri yu.+ Te yu e didon, a o de wan waktiman gi yu+ èn te yu wiki, dan a o sori taki a e broko en ede nanga yu,
23 bika a komando de wan lampu+ èn a wèt de wan leti.+ Piri-ai de wan warskow. Den de a pasi fu libi.+
24 Den musu yepi yu fu koti pasi gi a takru uma,+ iya, gi a grati tongo fu a huru-uma.+
25 Na ini yu ati yu no musu poti prakseri na a moi fu en+ èn no meki a kisi yu nanga den moi brenki ai fu en,+
26 bika te fu kaba sowan huru-uma o meki taki yu abi soso wan lontu brede fu nyan.+ Ma wan uma di e waka gi en masra, e suku nomo fu kisi yu. Te fu kaba a o meki yu lasi yu libi di de wan warti sani.+
27 Fa wan man kan poti faya na a borsu fu en krosi, sondro taki en krosi bron?+
28 Noso fa wan man kan waka na tapu krofaya di e bron, sondro taki a bron en futu?
29 Na so a de nanga iniwan sma di e didon nanga a wefi fu wan tra man:+ nowan sma di e fasi sowan uma, o tan sondro fu kisi strafu.+
30 Sma no e wisiwasi wan fufuruman di e fufuru fu kan span en bere te angri e kiri en.
31 Ma te den kisi a fufuruman, a sa musu pai den sma seibi tron so furu leki san a ben teki. A sa abi fu gi den ala den gudu di a abi na ini en oso.+
32 Wan man di e du sutadu nanga wan uma, na wan man di no abi frustan.*+ A sma di e du so wan sani, e pori en eigi libi.+
33 Na soso ogri o miti en èn a o kisi syen.+ Noiti moro a porinen di a kisi o komoto na en tapu,+
34 bika dyarusu kan meki wan man kisi bigi atibron.+ A dei di a o puru atibron na yu tapu, a no o abi sari-ati nanga yu.+
35 A no o wani teki nowan pai èn awinsi o bigi a presenti fu yu de, dati no o kowru en ati.
Futuwortu
^ Hebrewtongo: „di e mankeri ati.”
