Izira 9:1-15
9 Kuni coy ikkihu gedensaanni roorrootu anewa dagge togo yitu: “Israeelete manni, kakkalaanonna Leewaawootu, gobbate heeꞌranno manni yaano Kanaanootu, Hitootu, Ferizootu, Iyyaabuusootu, Amoonootu, Moaabootu, Gibitsootu, Amooraawootuwiinninna tiyyiꞌnanni assootinsawiinni dixeertidhino.
2 Insa tenne gobba seenne adhitino; oosonsarano haadhino. Hakko daafira kuni qullaawu sirchi kuri gobbuwara heeꞌranno manni ledo karsiisamino. Umo ikkite konne cubbo loossinori roorrootahonna aantaano gashshaanooti.”
3 Anino tenne macciishshanni heeꞌrenni uddanoꞌya darummo hattono umonna ereeda cidhummo; hakkiinni mase jalli yuummo.
4 Hawarro gidu fushshaate shiqinshanni yanna geeshsha mase jalli yee ofolle heeꞌreenna, Israeelete Magani qaale ayirrissannori* baalu, qafadotenni higino manni loosino cubbinni kainohunni dadillitino daafira anewa gamba yitu.
5 Hawarro gidu fushshaate shiqinshanni yannara, dadhantino uddano uddiꞌroommo gedeenni dadille ofolloommowiinni kaummo; hakkiinni guluchunni guluphe angaꞌya Maganiꞌya Yihowawa qole diriirsummo.
6 Anino togo yuummo: “Maganoꞌya, atewa hige laꞌꞌa saalfatoommo; qoleno saale qara baoommo; korkaatuno Maganoꞌya, cubbinke uminkera iimaanni saino; saonkeno batidhe gordo iillitino.
7 Annuwanke yannanni kayse techo barri geeshsha cubbinke batiꞌrino; loonsoommo cubbinni kainohunni kune techo ninke, mootoollankenna kakkalaanonke wole gobba mootoolla anga umbe bisete, qafadote, mulqiꞌraanotenna shollinyeho saꞌne aamammoommo.
8 Xa kayinni Maganinke Yihowa, ninke giddonni gama qafadotenni fushshe hattono qullaawa dargasi beꞌe yinummokkinni heeꞌneemmo gede asse shiima yanna geeshsha danchumma leellishinonke; Maganonke, hatto assoottohu illenke xabbanno gedeetinna shiima yanna geeshsha fooliishsho afiꞌneemmo gedeeti.
9 Borojje ikkinummorono Maganinke borojje ikkine heeꞌnammora wore diagurinonke; isi Faarsi mootoolla albaanni ammanamino baxillesi leellishinonke; hatto assinohu wolqa assiꞌne diigaminoha Maganinke mine galagalle minneemmo gedeetinna Yihudahonna Yerusaalamete kinchu huxxa* aankera yeeti.
10 “Xa kayinni Maganonke, xaate hanni mayne anfeemmo? Korkaatuno hajajokki diingoommo;
11 soqqamaanokki masaalaanote widoonni togo yite hajajoottonke: ‘Ragidhinanni baatto aanase heeꞌranno manninni kainohunni battaabbinote; korkaatuno gobbate heeꞌranno manni tiyyiꞌnanni assootensa baatto baala wonshino.
12 Hakko daafira, seenneꞌne oosonsara uytinoonte; insa seenneno oosoꞌnera haadhinoonte; jawaattinanni hadhinanni gede, baattonniha dancha guma ittinanni gedenna oosoꞌnera geedote iqqa ragisiissinanni gede, insa keerenna jiro horo hasidhinoonte.’
13 Bushu assootinkenninna jawa soꞌronkenni kainohunni kuni baalu iillinonke; ati kayinni Maganonke saonke garinni diqorichishoottonke; kowiicho heeꞌnoommori ninke ganteemmo gede assootto;
14 ikkina galagalle hajajokki diiganna konne tiyyiꞌnanni coye assanno manni ledo adhama hasiissannonkeni? Woleteemmero ninkera lowo geeshsha hanqite ninke giddo mittuno gatikkinni coꞌo assite huna dandaatto.
15 Israeelete Magano Yihowa, ati keeraanchoho; korkaatuno techo barri geeshsha baotenni gante lubbotenni heeꞌnoommo; cubbinkenni kainohunni albakkiinni uurra dandiineemmokkiha ikkirono, kuneeti ninke cubbaataammu albakkiinni heeꞌnoommo.”
