Izira 5:1-17
5 Hakkiinni masaalaanchu Hagenna Iddo beetti beetti Zakkaariyaasi Yihudahonna Yerusaalamete heedhanno Ayhudootira, ledonsa noohu Israeelete Magani suꞌminni masaalo coydhu.
2 Hatte yannara Selaatiyaali beetti Zerubaabeelinna Yehotsedeeqi beetti Yehoshuwa Yerusaalamete nooha Maganu mine galagalte mina hanaffu; Maganu masaalaanono ledonsa heedhe kaaꞌlitunsa.
3 Hatte yannara Laga Widoonni* noo qoqqowi gashshaanchi Tatenay, Shetaari-bozenayinna halensa insawa dagge togo yite xaꞌmitunsa: “Konne mine mintinanni gedenna looso umo fushshitinanni gede ay hajajinoꞌne?”
4 Hakkiinni, “Konne mine mintanni noori suꞌmi ayeooti?” yite xaꞌmitunsa.
5 Ikkollana Maganu Ayhudete cimeeyye ledo noo daafira,* Daariyoosira sokka sonkeenna isiwiinni sokka galagalte dagga geeshsha insa looso loosa dihooltinonsa.
6 Laga Widoonni noo qoqqowi gashshaanchi Tatenay, Shetaari-bozenayinna Laga Widoonni noo qoqqowira aantaano gashshaano ikkitinori halesi Moote Daariyoosira sokkino sokka tenneeti;
7 insa mootete togo yite borreessite sokkino:
“Moote Daariyoosira:
“Keeru ledokki ikko!
8 Yihudu qoqqowira noohu jawu Magani minira marroommota, mineno jajjabba kinnanni minnanni heeꞌnoonnita hattono huxxaho xaawulla karranni heeꞌnoonnita moote afona. Mannuno looso jawaate loose meddi assanni no.
9 Hakkiinni cimeeyyensa, ‘Konne mine mintinanni gedenna looso umo fushshitinanni gede ay hajajinoꞌne?’ yine xaꞌminoommo.
10 Qoleno atera borreessine kullammora yine roorrootinsa suꞌmano xaꞌminoommo.
11 “Insano togo yite qoltinonke: ‘Ninke gordunna baattote Magani soqqamaanooti; qoleno kuni galagalle minnanni heeꞌnoommo mini lowo diri albaanni jawu Israeelete moote mine gudino mineeti.
12 Ikkirono annuwanke gordu Magano hanqissino daafira, isi Keledichu Baabiloonete Moote Naabukadanatsoori angara sayse uynonsa; isi konne mine diige hune manna qafade Baabiloone haaꞌre haꞌrino.
13 Ikkollana Baabiloonete Moote Qiroosi moohihunni umi diro, Moote Qiroosi Maganu mine galagalle minnanni gede hajaji.
14 Qoleno Moote Qiroosi, Naabukadanatsoori Yerusaalamete noohu qullaawu mininni haaꞌre Baabiloonete noohu qullaawu minira massinoha, Maganu miniha culkunna birru uduunne Baabiloonete noohu qullaawu mininni fushshi. Hakkiinni konne uduunne Qiroosi gashshaancho asse shoominohu Sheshibatsaari* yinanni manchira uyni.
15 Qiroosino isira togo yii: “Konne uduunne haadhe hadhe Yerusaalamete qullaawa mine wori; Maganu mineno bashsho baycho galagalle minnona.”
16 Hakkiinni Sheshibatsaari daye Yerusaalamete noohu Maganu minira safo safi; hatte yannanni kayinse konne mine minnanni heeꞌnoonni; ikkollana minne digundoonni.’
17 “Xa moote dancha lawe leellisiro, Moote Qiroosi Yerusaalamete nooha Maganu mine galagalle minnanni gede hajajinoronna teꞌee buuxate, Baabiloonete nooha mootenniha miinju mine qonqolchine laꞌnona; hakkunni gedensaanni moote tenne daafira murinore sonkonkena.”
Lekkaalliidi Qaagiishshuwa
^ Woy “Efiraaxisira Widoonni.”
^ Noo gedeenni tirriro, “Maganinsa ille ledonsa noo daafira.”
^ Izira 2:2; 3:8 kullihu Zerubaabeeli iso ikkikkinni digatino.
