Izira 3:1-13
3 Lamalki aganira Israeelete manni* katammansara no; insa baalunku mittu manchi gede ikkite Yerusaalamete gamba yitu.
2 Yehotsedeeqi beetti Yeshuwanna kakkalaano ikkite ledosi soqqantannori hattono Selaatiyaali beetti Zerubaabeelinna roduuwisi kaꞌe halaalaanchu Magani manchi Muse Seerira borreessinoonni garinni, shilqote kakkalo shiqishshara Israeelete Maganiha kakkalote darga seekkitu.
3 Insa qooxeessinsara noo gobbuwara heeꞌranno manna waajjitinoha ikkirono, kakkalote darga bashsho baycho seekkitu; hakkiinni insa hakko Yihowara soodonna hawarro shiqqannota shilqote kakkalo shiqisha hanaffu.
4 Hakkiinni insa Seeraho borreessinoonni garinni Daasu* Ayyaana ayirrissu; qoleno mittu mittunku barrira shiqqara hajanjoonnita shilqote kakkalo shiqishshu.
5 Hakkunni gedensaanni insa rosantinota shilqote kakkalo, haaru aganiranna qullaawa Yihowa ayyaannara shiqinshanni fushshaate hattono mittu mittunku manchi Yihowara baxe umisi fajjonni shiqishanno fushshaate shiqishshu.
6 Yihowahu qullaawu mini safo sanfoonnikkiha ikkirono, lamalki aganira umi barrinni kayisse Yihowara shilqote kakkalo shiqisha hanaffu.
7 Insa kinna boccannoriranna angate ogimma noonsarira woxe uytu; qoleno Faarsi Moote Qiroosi fajjino garinni, daguwu haqqe baaru aanaanni qole Libaanoosinni Iyyoophe abbannohu Sidooninna Xiroosi mannira itannore, agannorenna zayte uytunsa.
8 Insa Yerusaalamete noohu halaalaanchu Magani minira dagguhunni layinki diro layinki aganira, Selaatiyaali beetti Zerubaabeeli, Yehotsedeeqi beetti Yeshuwa, kakkalaano, Leewaawootu, gattino roduuwinsa hattono qafadotenni fulte Yerusaalame dagginori baalu looso hanaffu; insa Yihowa mini looso towaattanno gede 20 dironna hakkunni ale ikkannonsa Leewaawoota shoontu.
9 Hakko daafira Yeshuwa, labballi oososinna roduuwisi, Qadimieelinna labballi oososi, hattono Yihudati labballi ooso, Leewaawoota ikkitinori Henaadaaditi labballi ooso, oosonsanna roduuwinsa ledo halaalaanchu Magani mini looso towaattannore kaaꞌlitu.
10 Mine mintannori Yihowahu qullaawu mini safo saffuta, kakkalaano uduunnensa uddidhe xurumbunni, Leewaawootu Asaafiti labballi ooso qolte simbaaletenni,* Israeelete Moote Daawiti hajajino garinni Yihowa guwisate kaꞌe uurritu.
11 Hakkiinni insa, “Isi danchaho; Israeelete leellishannohu ammanamino baxillisino hegerera kaajje heeꞌranno” yitanni Yihowa guwisanna galata hanaffu. Mannu baaluno Yihowa mini safo sanfoonni daafira, huuronsa naggi asse Yihowa guwisi.
12 Albi mine laino geerri yaano kakkalaano, Leewaawootunna annuwate mini roorrooti, konni mini safo sanfanna laꞌuti qoonqonsa naggi assite wiꞌlitu; wolu batinyu manni kayinni hagiirrunni ilillisi.
13 Insa xeertote heeꞌneenna macciishshanta geeshsha huuronsa naggi assite kooccanni noo daafira, mannu ililleettetenna wiꞌlate huuro bada didandiino.
