Izira 1:1-11
1 Ermiyaasi widoonni kulloonnihu Yihowa qaali woꞌmanno gede, Faarsi Moote Qiroosi moohihunni umi diro, gashshootisi baalu giddo lallawa lallawanno gede Yihowa Faarsi Moote Qiroosi kakkaysi;* isino lallawa togo yine borreessine worranni gede assi:
2 “Faarsi Moote Qiroosi togo yaanno: ‘Gordu Magani Yihowa uullate gashshoote baala uynoe; qoleno isi Yihudaho noo Yerusaalamera mine mineemmosi gede hajajinoe.
3 Mannasi ikkitinoonnirira baalaho Maganu ledoꞌne ikko. Kiꞌneno Yihudaho noo Yerusaalame hadhine Yerusaalamete nooha* Israeelete Magani Yihowa mine wirro minne; isi halaalaancho Maganooti.
4 Gobbansa higa hasiꞌrannoha wole gobba manna baala heeꞌrannowi ikkiwano ikkiro, olliinsa* manni kaaꞌlonsana; insa konni mannira Yerusaalamete noohu halaalaanchu Magani minira banxe meessi fajjonni fushshinanni fushshaati ledo birra, culka, addi addi uduunnenna saada uyte kaaꞌlitonsana.’”
5 Hakkiinni Yihudunna Biiniyaamiri annuwate mini roorrooti, kakkalaanonna Leewaawootu, ee, halaalaanchu Magani ayyaani kakkaysinonsari baalu, hadhe Yerusaalamete nooha Yihowa mine wirro minate qixxaabbu.
6 Qooxeessinsara noo manni baalu, banxe meessi fajjonni fushshinanni fushshaateno agurranna birrunna culku uduunne, addi addi uduunne, hattono saadanna wole ayirrado uduunne oye kaaꞌlinsa.*
7 Qoleno Moote Qiroosi, Naabukadanatsoori Yerusaalametenni haaꞌre abbe maganisi mine wodhinoha Yihowa mini uduunne qollanninsa gede hajaji.
8 Faarsi Moote Qiroosi konne uduunne miinju mini sooreessi Mitiredaati fushshanno gede assi; isino kiire Yihudu roorrichi Sheshibatsaari* anga wori.
9 Kiirroonni uduunnino aane nooho: 30 culkunni seekkinoonni gimboola, 1,000 birrunni seekkinoonni gimboolanna wole 29 sayinna,
10 sajjoo shiimmaadda xiltaame culku sayinna, 410 shiimmaadda xiltaame birru sayinnanna 1,000 wole addi addi uduunneeti.
11 Culkunna birru uduunni mitteenni 5,400 ikkanno. Qafadamino manni Baabiloonetenni fule Yerusaalame higi woyte, Sheshibatsaari konne uduunne baala haaꞌre abbi.
