Izira 8:1-36
8 Moote Arxekisiisi gashshooti yannara, ane ledo Baabiloonetenni fulte hadhinori annuwate mini roorrootinna maate maatensa garinni borreessantinori suꞌmi aane nooho:
2 Finihaasi sirchinni Gersaami, Itaamaari sirchinni Daanieeli, Daawiti sirchinni Haxuushi,
3 Shekaaniyahinna Parooshi sirchinni, Zakkaariyaasinna ledosi borreessaminohu 150 labballi,
4 Pahaati-moaabi sirchinni Zerahiyahi beetti Eliyeho-eenayinna ledosi noohu 200 labballi,
5 Zaatu sirchinni Yahaazieeli beetti Shekaaniyahinna ledosi noohu 300 labballi,
6 Adiini sirchinni Yoonaataani beetti Abeedinna ledosi noohu 50 labballi,
7 Eelaami sirchinni Gotooliya beetti Yeshayahinna ledosi noohu 70 labballi,
8 Shefaaxiyahi sirchinni Mikaeeli beetti Zebaadiyahinna ledosi noohu 80 labballi,
9 Iyyoaabi sirchinni Yehieeli beetti Abidiyunna ledosi noohu 218 labballi,
10 Baani sirchinni Yoosifiyahi beetti Shelomiitinna ledosi noohu 160 labballi,
11 Beebay sirchinni Beebay beetti Zakkaariyaasinna ledosi noohu 28 labballi,
12 Azigaadi sirchinni Haqaxaani beetti Yohanaaninna ledosi noohu 110 labballi,
13 Adoniqaami sirchinni jeefote higginori aante nooreeti: Elfeleeti, Yeieeli, Shemayahinna ledonsa noohu 60 labballi,
14 Bigiway sirchinni Utay, Zabuudinna ledonsa noohu 70 labballi.
15 Anino insa Ahawa hige daadanno lagi mule gamba assummo; hakkiicho sase barra dukkaꞌninummo. Ikkollana hakko noo mannanna kakkalaano seekke laummo woyte, hakkiicho mittu Leewaawichino dino.
16 Hakko daafira massagaanote yaano Elieezerira, Arieelira, Shemayahira, Elnaataanira, Yaariibira, Elnaataanira, Naataanira, Zakkaariyaasiranna Meshulaamira hattono rosiisaanote yaano Yoyaariibiranna Elnaataanira sokka soyummo.
17 Hakkiinni insa Kasiifiya yinanni katama gashshe noohuwa Iddowa hadhanno gede hajajummo. Maganinke mine soqqantannore* sokkannonke gede, Iddoranna qullaawa mine soqqantanno roduuwisira sokka soyummo.
18 Dancha Maganinke anga aananke noo daafira, insa Israeeli beetti Leewi beetti beetti Mahiilite labballi ooso giddonni hayyicha mancho Sherebeyahi, labballi oososinna roduuwasi mitteenni 18 manna abbitunke;
19 hattono Hashaabiyahinna isi ledo Meraari manni giddonni Yeshayahi, roduuwasinna labballi oososi, mitteenni 20 manna abbitunke.
20 Qoleno qullaawu mini soqqamaano* giddonni Daawitinna roorrootu, Leewaawoota kaaꞌlitanno gede wortinohu 220 manni no; kuri baalunku suꞌmi borreessame no.
21 Hakkiinni Maganinke albaanni umonke shollishate hattono doogo haꞌneemmo woyte ninkera, oosonkeranna jajjinke baalaho biddishsha aankera, hakko Ahawa lagi mule xoomme huucciꞌneemmo gede lallawummo.
22 Mootete, “Dancha Maganu anga iso hasidhannori baalu aana no; isi agurtannosirira baalaho kayinni wolqasinna hanqosi leellishanno” yine kulloommosi daafira, doogote haꞌneemmo woyte diinuwiinni agartannonke olantonna faradaasine aannonke gede moote xaꞌmiꞌra saaloommo.
23 Hakko daafira xoommummo; qoleno tenne daafira Maganonke huucciꞌnummo; isino huuccattonke macciishshi.
24 Anino qara kakkalaano giddonni 12 yaano Sherebeyahinna Hashaabiyahini hattono tonne roduuwansa doore fushshummo.
25 Hakkiinni moote, amaalaasinesi, roorrootisinna Israeelete manni baalu Maganinke minira uynore yaano birra, culkanna wole uduunne keene insara uyummo.
26 Aane nooreno keene insara uyummo: 650 taalaante birra, lame taalaante ikkannoha 100 birru uduunne, 100 taalaante culka,
27 hattono 1,000 daarike* ikkitannota 20 shiimmaadda xiltaame culku sayinnanna culku ledo taalo waaga afiꞌrinoha lame biifado camotenni seekkinoonni uduunne.
28 Hakkiinni insa togo yuummo: “Kiꞌne Yihowara qullaawa mannaati; kuni uduunnino qullaawaho; qoleno birrunna culku annuwaꞌne Maganira Yihowara banxe meessi fajjonni uynoonni afanshaati.
29 Konne uduunne Yerusaalamete noohu Yihowa mini kifilla* giddo qara kakkalaano, Leewaawootunna Israeelenniri annuwate mini roorrooti albaanni keentina geeshsha seekkitine agarre.”
30 Hakkiinni kakkalaanonna Leewaawootu keennoonni birra, culkanna uduunne Yerusaalamete noohu Maganinke minira haadhe hadhara uyni.
31 Jeefoteno 12ki diro aganaho umi barra, Yerusaalame haꞌnammora Ahawa laginni kaꞌnummo; Maganinke angano ninke aana no; isino diininkenna doogote noo mulqiꞌraano anganni gatisinonke.
32 Hakko daafira Yerusaalame dange hakko sase barra keeshshinummo.
33 Shoolki barra birra, culkanna uduunne Maganinke mine keenne, kakkalaanchu Uriyahi beetti Mereemooti anga worrummo; isi ledo Finihaasi beetti Aliaazaari hattono Leewaawootu yaano Yeshuwa beetti Yozaabaadinna Biinuy beetti Noaadiyahi no.
34 Baalankare kiirre keenni; keennoonniha baalano borreessine amandi.
35 Qafadotenni higginori Israeelete Maganira shilqote kakkalo shiqishshu; insa baalante Israeelete gaꞌrera 12 bootta shiqishshino; hattono cubbu kakkalora 96 gocca, 77 geꞌreewu wiliiꞌlenna 12 meu gocca shiqinshoonni; konne baala Yihowara shilqote kakkalo assine shiqinshoonni.
36 Hakkiinni mootete lallawa mootenniri qoqqowu gashshaasineranna* Laga Widoonni* noo qoqqowi gashshaasinera uynummo; insano mannahonna halaalaanchu Magani minira kaaꞌlantu.
Lekkaalliidi Qaagiishshuwa
^ Woy “Nataaniimoota.” Noo gedeenni tirriro, “uynoonnire.”
^ Woy “Nataaniimootu.” Noo gedeenni tirriro, “uynoonniri.”
^ Daarike Faarsootunnite culku saanteeti. Guwuursha B14 lai.
^ Woy “sagale intanni minna.”
^ Kuni suusu suꞌmi “gashshootu agaraasine” yitanno tiro afiꞌrino; kowiicho konne suꞌma horoonsiꞌnoonnihu Faarsi Gashshooti giddo heedhannore qoqqowu gashshaasine kulateeti.
^ Woy “Efiraaxisira Widoonni.”
