Izira 4:1-24
4 Yihudunna Biiniyaami diinna, qafadotenni higginori Israeelete Magani Yihowara qullaawa mine mintanni noota macciishshituti,
2 baychonkonni Zerubaabeelinna annuwate mini roorrootiwa shiqqe togo yitu: “Ninkeno ledoꞌne minneemmo; korkaatuno ninkeno kiꞌnente gede Maganoꞌne magansiꞌneemmoreeti;* qoleno kawira abbinonkehu Asoori Moote Eesaari-haden warinni kayinse isira kakkalo shiqinshanni keeshshinoommo.”
3 Ikkollana Zerubaabeeli, Yehoshuwanna gattinori Israeelenniri annuwate mini roorrooti togo yitunsa: “Maganinke mine minate ninke ledo gutu dinoꞌne; korkaatuno Faarsi moote, Moote Qiroosi hajajinonke garinni Israeelete Magani Yihowara mine ninkella minneemmo.”
4 Hakkunni gedensaanni hatte gobba manni, Yihudu manni hexxo mudhanno gedenna* wolqa bae mine mina aguranno gede assate woꞌmanka woyte waajjishiishannonsa.
5 Insa Faarsi Moote Qiroosi warinni kayisse Faarsi Moote Daariyoosi gashshooti diri geeshsha, Ayhudootu heddinori qinaannokki gede assate amaalaasine qaxadhitu.
6 Insa Ahaashiweroosi gashshooti hanafora, Yihudahonna Yerusaalamete heedhannore kassassara sokka borreessitu.
7 Qoleno Faarsi Moote Arxekisiisi yannara, Bishilaami, Mitiredaati, Tabieelinna gattino halesi, moote Arxekisiisira sokka borreessitu; insa tenne sokka Aramaykete afiira qolte tirte, Aramaykete fidalenni borreessitu.*
8 * Qaru gashshootu roorrichi Rehuuminna borreessaanchu Shiimishay, Yerusaalame kassasate Moote Arxekisiisira togo yite sokka borreessitu:
9 (Tenne sokka qaru gashshootu roorrichi Rehuumi, borreessaanchu Shiimishay, gattino halensa, daanyootu, aantaano gashshaano, borreessaano, Ereeki manni, Baabiloonootu, Suusa heedhannori yaano Eelaamootu
10 hattono jawunna ayirradu Asinaafeeri qafadotenni haaꞌre Samaariyu katammara worinori gattino daganna Laga Widoonni* noo qoqqowira heeꞌrannohu gatino manni borreessino;
11 tini insa sokkino sokkanni galchinoonnite.)
“Moote Arxekisiisi, Laga Widoonni noo qoqqowira heeꞌneemmori ninke soqqamaanokki tenne sokka sonkoommohe:
12 Atewiinni daggino Ayhudooti kawa ninkewa Yerusaalame iillitinota moote afona. Insa finqilanna busha katama wirro mintanni no; huxxano huxxite guddanni no; qoleno safo gatamartanni no.
13 Konne katama galagalle minnironna huxxano huxxine gundiro, kuni manni giwire, qaraxo woy mootoolla xaꞌmitannoha wole coye aannokkita moote afona; hatto ikkiro mootoollannihu miinju minira eanno woxi ajanno.
14 Ninke mootete mini maxine inteemmore ikkine heeꞌnenni,* mootete ayirrinyi kisamanna sammi yine laꞌꞌa gara dilabbinonke; hakko daafira moote tenne afara sokka sonkoommo;
15 konnira annuwakkita borrote taje lai; tenne borrote taje laittoro, kuni katami finqila, mootoollanna qoqqowubba gawajjannoha ikkinota, hattono hundinni kayse finqille kakkaysanno manni woꞌminoha ikkinota afatto. Kuni katami bainohu iseraati.
16 Konne katama galagalle minnironna huxxano huxxine gundiro, Laga Widoonni noo qoqqowo gashsha dandaattokkita* afi.”
17 Mooteno qaru gashshootu roorrichi Rehuumira, borreessaanchu Shiimishayra, Samaariyaho heedhannori gattino halensaranna Laga Widoonni noohu gatino qoqqowira togo yee sokka soy:
“Keeriꞌya iilloꞌne!
18 Sokkinoonnie sokka ane albaanni leellanno garinni nabbamboonni.*
19 Ani hajajeenna borrote taje laꞌne, hundinni kayse kuni katami mootoollate gara giwannohu, finqilunna bushu manni heeꞌrannoha ikkinota buunxoonni.
20 Qoleno Yerusaalamete Laga Widoonni heedhe gashshitannori wolqaataamma mootoolla no; insara giwire, qaraxo woy xaꞌmidhannoha wole coye uynanninsa.
21 Ani hajajo aammo geeshsha, kuni manni katama galagale mina aguranno gede kullensa.
22 Kawiinni sae mootete ayirrinyi kisamannokki gede, konne coye lashshi assitinoonte.”
23 Moote Arxekisiisi soyno sokka Rehuumi, borreessaanchu Shiimishayinna halensa albaanni nabbambihu gedensaanni, insa baychonkonni Ayhudootunniwa Yerusaalame hadhe looso agurtanno gede giddeessitunsa.
24 Konnira hatte yannara Yerusaalamete nooha Maganu mine mina uurrinsi; Faarsi Moote Daariyoosi gashsha hanafihunni layinki diri geeshsha, loosu uurre keeshshi.
Lekkaalliidi Qaagiishshuwa
^ Noo gedeenni tirriro, “hasiꞌneemmoreeti.”
^ Noo gedeenni tirriro, “angansa shaqqitanno gedenna.”
^ “Sokka Aramaykete afiinni borreessinoonni; hakkiinni tirroonni” yaano ikkara dandaanno.
^ Izira 4:8 kayse 6:18 geeshsha umo borreessinoonnihu Aramaykete afiinniiti.
^ Woy “Efiraaxisira Widoonni.”
^ Woy “mootete mininni damooza adhinanni heeꞌnenni.”
^ Noo gedeenni tirriro, “gutu heeꞌrannohekkita.”
^ “tirre nabbamboonni” yaano ikkara dandaanno.
