Izira 6:1-22
6 Hakkunni gedensaanni Moote Daariyoosi hajajo fushshi; insano Baabiloonete nooha ayirrado coye worroonniha miinju mine* qonqolchitu.
2 Meedooni qoqqowira Ekibaataana yinanniwa qiinshoonni darga mitte xaaxo anfi; tenne xaaxo aana aante noo sokka borreessinoonni:
3 “Moote Qiroosi gashsha hanafihunni umi diro, Moote Qiroosi Yerusaalamete nooha Maganu mine lainohunni togo yee hajajino: ‘Ayhudootu hakko kakkalo shiqishiꞌra dandiitanno gede, mine galagalte mintona; safono sanfona; minuno hojja 60 cigile* godowano 60 cigile ikkona;
4 sase jajjabba kinna aana aanaho worrihu gedensaanni, mereeroho xaawulla karrona; fulanno woxeno mootete mininni baantona.
5 Qoleno Naabukadanatsoori Yerusaalamete noohu qullaawu mininni Baabiloone abbinoha Maganu miniha culkunna birru uduunne qollona; hakkiinni Yerusaalamete noohu qullaawu minira massine Maganu mine worrona.’
6 “Konnira ati Laga Widoonni* noo qoqqowi gashshaanchi Tatenay, Shetaari-bozenayinna Laga Widoonni noo qoqqowira aantaano gashshaano ikkitinoonniri halensa hakkiinni hoꞌle.
7 Maganu mini loosira guficho ikkitinoonte. Ayhudete gashshaanchinna Ayhudete cimeeyye Maganu mine bashsho darga galagalte mintona.
8 Qoleno Ayhudete cimeeyye konne Maganu mine galagalte mintanno woyte, kiꞌne insara aane noore assitinanni gede hajajoommo: Loosu uurrannokki gede, mootennihu miinju mininni yaano Laga Widoonni noo qoqqowinni gamba assinoonni giwiri aaninni konni mannira hasiisannonsa woxe baychonkonni uynona.
9 Gordu Maganira shilqote kakkalo shiqishate hasiisannore baala yaano bootta, gocca, geꞌreewu wiliiꞌle, sinde, maxine, woynenna zayte Yerusaalamete heedhanno kakkalaano hasidhanno garinni barru baala agurrikkinni uynonsana;
10 konne assinannihu insa gordu Magano hagiirsiisanno fushshaate woꞌmanka woyte shiqishshanno gedeetinna mootetenna oososi heeshshora huuccitanno gedeeti.
11 Qoleno konne lallawa diigannohu aye manchino assino bunshera minisi tuuqo buqqinse fushshine konne mancho tuuqu aana suntanni gedenna minisino dagate shuma mine* ikkanno gede hajajoommo.
12 Tenne hajajo xeisatenna Yerusaalamete nooha Maganu mine diigate woꞌnaalannoha aye moote woy aye mancho, suꞌmisi hakkiicho heeꞌranno gede assino Magani hunosi. Ani Daariyoosi tenne hajajo oommo. Tenne hajajo baychonkonni wonshinona.”
13 Hakkiinni Laga Widoonni noo qoqqowi gashshaanchi Tatenay, Shetaari-bozenayinna halensa Moote Daariyoosi hajajinore baala baychonkonni wonshitu.
14 Qoleno Ayhudete cimeeyye, masaalaanchu Hagenna Iddo beetti beetti Zakkaariyaasi coydhino masaalo jawaachishshinonsa daafira, looso jawaatte loosse haxo haadhu; insa Israeelete Magani, Qiroosi, Daariyoosinna Moote Arxekisiisi hajajino garinni mine minte guddu.
15 Insa Moote Daariyoosi gashsha hanafihunni leekki diro, Adaari* aganira sayikki barra mine minte guddu.
16 Hakkiinni Israeele, kakkalaano, Leewaawootunna alba qafadame haꞌrinohu gatino manni Maganu mine lowo hagiirrinni maassiisi.
17 Insa Maganu mini maassora 100 bootta, 200 gocca, 400 geꞌreewu wiliiꞌle hattono Israeele baalate cubbu kakkalora Israeelete gaꞌre kiiro garinni 12 meu gocca shiqishshu.
18 Qoleno Muse maxaafira borreessinoonni garinni, Yerusaalamete Maganu mini soqqanshora kakkalaano gaamo gaamonsa garinni, Leewaawootano gaamo gaamonsa garinni shoontu.
19 Qafadotenni higino mannino umi aganira 14ki barra Faasika ayirrisi.
20 Kakkalaanonna Leewaawootu baalu insaneeto keereensidhino daafira keeraaꞌmitu; insa qafadotenni higginorira baalaho, ledonsa kakkalaano ikkite soqqantannoriranna uminsara Faasiku kakkalora saada gorritu.
21 Hakkiinni qafadotenni higgino Israeele, Israeelete Magano Yihowa magansidhara* baattote noo daga battewiinni baxxitinori baalu ledo ittu.
22 Qoleno Yihowa hagiidhitanno gede assinonsa daafiranna Israeelete Maganiha halaalaanchu Magani mine mintanno gede kaaꞌlannonsa gede* Asoori moote wodana shaqqishino daafira, lamala barra timu* ayyaana hagiirrunni ayirrissu.
Lekkaalliidi Qaagiishshuwa
^ Noo gedeenni tirriro, “xaggete maxaaffa.”
^ 26.7 meetire balla ikkitanno. Guwuursha B14 lai.
^ Woy “Efiraaxisira Widoonni.”
^ “Ishine tunganniwa; fudu duuno” yaano ikkara dandaanno.
^ Guwuursha B15 lai.
^ Noo gedeenni tirriro, “hasidhara.”
^ Noo gedeenni tirriro, “angansa kaajjishanno gede.”
^ Qaallate Tiro lai.
