Izira 7:1-28
7 Kuni coy ikkihu gedensaanni, Faarsi Moote Arxekisiisi gashshooti yannara mittu Izira* yinanni manchi no. Izira Seerayahi beettooti, Seerayahi Azaariyaasi beettooti, Azaariyaasi Kelqiyaasi beettooti,
2 Kelqiyaasi Shaaluumi beettooti, Shaaluumi Saadooqi beettooti, Saadooqi Akixuubi beettooti,
3 Akixuubi Amaariyahi beettooti, Amaariyahi Azaariyaasi beettooti, Azaariyaasi Merayooti beettooti,
4 Merayooti Zerahiyahi beettooti, Zerahiyahi Uuzi beettooti, Uuzi Buqi beettooti,
5 Buqi Abishua beettooti, Abishua Finihaasi beettooti, Finihaasi Aliaazaari beettooti; Aliaazaari kakkalaanote roorrichi Aarooni beettooti.
6 Kuni Izira Baabiloonetenni day. Isi Israeelete Magani Yihowa uynoha Muse Seera seekke egenninohonna* Qullaawa Borro galchannoho.* Maganisi Yihowa anga isi aana noo daafira, moote xaꞌmiꞌrinore baalare uysi.
7 Moote Arxekisiisi moohihunni lamalki diro gamu Israeelooti, kakkalaano, Leewaawootu, faarsaano, waalcho agartannorinna qullaawu mini soqqamaano* Yerusaalame daggu.
8 Moote moohihunni lamalki diro, ontikki aganira Izirano Yerusaalame day.
9 Dancha Maganisi anga isi aana noo daafira, umi aganira umikki barra Baabiloonetenni kae haꞌra hanafi; hakkiinni ontikki aganira umi barra Yerusaalame iilli.
10 Izira Yihowa Seera xiinxallatenna haꞌrunsate, hattono Seeru giddo noo wodhonna yoo Israeelete rosiisate wodanasi qixxeessiꞌrino.*
11 Moote Arxekisiisi, Yihowa Israeelete uyno hajajonna wodho seekke xiinxallannohuranna* Qullaawa Borro galchannohura* kakkalaanchu Izirara uyno sokka tenneeti:
12 * “Mootoollate moote Arxekisiisi, gordu Magani Seera galchannohura* kakkalaanchu Izirara: Keeru ledokki ikko.
13 Gashshootiꞌya giddo noohu Israeelete manni hattono kakkalaanonsanna Leewaawootu giddonni ledokki Yerusaalame haꞌra hasiꞌrannohu heeꞌriro haꞌranno gede hajajoommo.
14 Mootenna lamala amaalaasinesi atewa* nooha Maganikki Seera Yihudahonna Yerusaalamete wonshinanni heeꞌnoonnironna teꞌee buuxatto gede sokkinohe;
15 qoleno mootenna amaalaasinesi Yerusaalamete noohu Israeelete Maganira baxxe uminsa fajjonni uytino birranna culka,
16 Baabiloonete qoqqowi baalu giddonni haaꞌrootto* birrinna culki ledo hattono Israeelete manninna kakkalaano Yerusaalamete noohu Maganinsa minira baxxe uminsa fajjonni uytino afanshi ledo haadhe haꞌratto gede hajajjinohe.
17 Atino konni woxinni baychonkonni bootta, gocca, geꞌreewu wiliiꞌle, gidu fushshaatinsanna agattote fushshaatinsa ledo hirte Yerusaalamete noohu Maganikki mine kakkalote darga shiqishi.
18 “Gatino birrinna culkinni Maganiꞌne fajjo garinni, atinna roduuwikki dancha lawe leellinoꞌnere baala asse.
19 Qoleno Maganikki mini soqqanshora uynoonnihe uduunne baala massite Yerusaalamete Maganu albaanni wori.
20 Maganikki minira aattora hajanjoonniheha wole hasiisanno coye mootennihu miinju mininni fushshite aatto.
21 “Ani Arxekisiisi, Laga Widoonni* heedhinoonniri miinju mini sooreeyye baalu, gordu Magani Seera galchannohu* kakkalaanchu Izira xaꞌminoꞌnere baalare baychonkonni assitinanni gede hajajoommo;
22 qoleno 100 taalaante* birra, 100 qoroosi safaraancho* sinde, 100 baadoosi safaraancho woyne, 100 baadoosi safaraancho* zaytenna maxine hasiꞌri geeshshita uyiyyesi.
23 Mootete gashshootiranna oososira hanqu dirrannokki gede, gordu Magani minesi lainohunni hajajinore baalare laalaante assinona.
24 Kakkalaano, Leewaawoota, muuziiqa godoꞌlitannore, waalcho agartannore, qullaawu mini soqqamaanonna* konni Maganu mini loosaasinewiinni giwire, qaraxo woy mootoolla xaꞌmitannoha wole aye coyeno xaꞌma dandiitinannikkita affe.
25 “Izira, atino Maganu uynohe hayyonni,* Laga Widoonni noo qoqqowira heeꞌranno mannira baalaho yaano Maganikki seera affinorira baalaho yoo yitanno gede seeru egennaammanna daanyoota shoomi; seera affinokkireno rosiisi.
26 Qoleno Maganikki Seeranna mootete seera ayirrisannokkiha aye manchono shine woy gobbatenni fushshine shorrine woy woxe baaxxanno gede assine woy usuramanno gede assine baychonkonni qorichinshona.”
27 Yerusaalamete nooha Yihowa mine biifisate hedo mootete wodanira worinohu annuwanke Magani Yihowa maassamo!
28 Isi mootetenna amaalaasinesi hattono mootenniri wolqaataammu roorrooti albaanni ammanamino baxille leellishinoe. Maganiꞌya Yihowa anga ane aana noo daafira, worbimma afiꞌroommo;* qoleno Israeelete giddonni ledoꞌya hadhanno roorroota* gamba assiꞌroommo.
Lekkaalliidi Qaagiishshuwa
^ “Kaaꞌlo” yitanno tiro afiꞌrino.
^ Woy “Muse Seera galchate fullahinoho.”
^ Woy “borreessaanchoho.”
^ Woy “Nataaniimootu.” Noo gedeenni tirriro, “uynoonniri.”
^ Woy “wodanisinni murciꞌrino.”
^ Woy “qaalla galchannohuranna.”
^ Woy “borreessaanchu.”
^ Izira 7:12 kayse 7:26 geeshsha umo borreessinoonnihu Aramaykete afiinniiti.
^ Woy “borreessaanchu.”
^ Noo gedeenni tirriro, “angakki.”
^ Noo gedeenni tirriro, “afiꞌrootto.”
^ Woy “Efiraaxisira Widoonni.”
^ Woy “borreesaanchu.”
^ Mitte taalaante 34.2 kiilo giraame ikkitanno. Guwuursha B14 lai.
^ Mitte qoroose 220 litire ikkitanno. Guwuursha B14 lai.
^ Mitte baadoose 22 litire ikkitanno. Guwuursha B14 lai.
^ Woy “Nataaniimoota.” Noo gedeenni tirriro, “uynoonnire.”
^ Noo gedeenni tirriro, “angakki noote Maganikki hayyo garinni.”
^ Woy “aneneeto jawaachishoommo.”
^ Noo gedeenni tirriro, “albisa ikkitinore.”
