Izira 10:1-44
10 Izira halaalaanchu Magani minira albaanni guluphe huucciꞌranni, mannisi cubbo faajjete kulanninna wiꞌlanni heeꞌreenna, batinyu Israeelete labballi, meentinna ooso iso gaangeessite gamba yitu; mannuno hururame wiꞌlanni no.
2 Hakkiinni Eelaami sirchi giddonni Yehieeli beetti Shekaaniyahi Izira togo yii: “Qooxeessinkera noo daga giddonni wole gobba meento adhine* Maganinke aana cubbo loonsoommo. Ikkirono xaano Israeelete hexxo no.
3 Xa Yihowa biddishshinna Maganinke hajajo ayirrissannori* uytino biddishshi garinni, minaamuwankenna insa iltino ooso baala haꞌrisate Maganinke ledo gondooro eꞌno. Seeru yaannoreno assino.
4 Tini hajo ate laꞌannota ikkitino daafira gotti yii; ninkeno ledokki heeꞌnoommona jawaati; qaafono adhi.”
5 Hatte yannara Izira yinoonnire assitanno gede kakkalaanote, Leewaawootunna Israeele baalate roorroota xaarsiisi. Insano xaartu.
6 Hakkiinni Izira halaalaanchu Magani mini albinni kae, Eeliyaashiibi beetti Yehohanaani kifile* haꞌri. Ikkollana isi qafadotenni higino manni loosino cubbinni kainohunni dadillino daafira, hakkira haꞌrinoha ikkirono waa waasa diyiino.
7 Hakkiinni insa Baabiloonete qafadonni higginori baalu Yerusaalamete gamba yitanno gede, Yihudahonna Yerusaalamete lallabbu;
8 roorrootunna cimeeyye hajajjino garinni sasu barri giddo daannokkihu aye manchira jajjasi baala adhinanni;* hattono qafadame haꞌrino manni songo giddonni shorrine hunnanni.
9 Hakko daafira Yihudunna Biiniyaami gaꞌre labballi baalu sasu barri giddo yaano honsikki aganira 20ki barra Yerusaalamete gamba yitu. Mannu baaluno halaalaanchu Magani mini hoowera ofolli; kuni manni woshshinoonninsa haja shaaꞌꞌa ikkitinokki daafiranna biite xeena gananni noo daafira huxiꞌranni no.
10 Hakkiinni kakkalaanchu Izira kae togo yii: “Wole gobba meento adhitine jawa cubbo loossinoonni; Israeelete saono batidhanno gede assitinoonni.
11 Konnira xa annuwaꞌne Maganira Yihowara cubboꞌne kulle; fajjosino asse. Qooxeessiꞌnera heedhanno dagawiinni xeertidhe; hattono adhitinoonniha wole gobba meento fushshitine haꞌrisse.”
12 Hatte yannara songo woꞌma huuronsa naggi assite togo yite qoltu: “Yiittonkere assineemmo.
13 Ikkollana kowiicho gamba yiino manni lowoho; yannano xeenunnita ikkitino daafira gobba keeshsha didandiineemmo; qoleno loonsoommo cubbi lowo geeshsha jawa ikkino daafira, tini haja mittu woy lamu barrinni gooffannota diꞌꞌikkitino.
14 Hakko daafira eeggatena roorrootinke songo woꞌma riqibbe koye gattanno gede assi; wole gobba meento adhitinori katammankera noori baalu, mittu mittunku katami cimeeyyenna daanyooti ledo murroonni yannara daggona; loonsoommo cubbinni kainohunni aananke dirrinohu Maganinkehu buwanno hanqi qiida geeshsha hatto assa hasiissannonke.”
15 Ikkirono Asaheeli beetti Yoonaataaninna Tiqiwa beetti Yahizeyahi tenne hedo dibaxxino; Leewaawichu Meshulaaminna Shabetayno insara halantu.
16 Ikkollana qafadame haꞌrino manni sumuu yinoonnire assi; qoleno tonnikki aganira umi barra kakkalaanchu Iziranna suꞌmi suꞌminsa garinni borreessinoonniri annuwansa miniri maatete roorrooti baalu tenne hajo laꞌara annu annu gamba yitu;
17 insano wole gobba meento adhino labballi haja umi aganira umi barra laꞌe guddu.
18 Hakkiinni mite kakkalaanote ooso wole gobba meento adhitinota anfi; insano Yehotsedeeqi beetti Yehoshuwa oosootinna roduuwasi Maꞌꞌaseyahiiti, Elieezeriiti, Yaariibiitinna Godooliyaasiiti.
19 Insa meentonsa fushshite haꞌrisate qaale eꞌino;* qoleno cubbinsara hoshshate giddonni mitto geꞌrechu goco shiqishshanno.
20 Imeeri sirchinni Hanaaniinna Zebaadiyahi,
21 Hariimi sirchinni Maꞌꞌaseyahi, Eeliyaasi, Shemayahi, Yehieelinna Ooziya,
22 Pashihuuri sirchinni Eliyoenay, Maꞌꞌaseyahi, Ismaeeli, Naatinaeeli, Yozaabaadinna Eliaasa.
23 Leewaawootu giddonni Yozaabaadi, Shiimiay, Qelayahi, (Qeliixano yinanni), Petayahi, Yihudanna Elieezeri,
24 faarsaanote giddonni Eeliyaashiibi, waalcho agartannori giddonni Shaaluumi, Teleeminna Uuri.
25 Israeelete giddonni Parooshi sirchi Raamiyahi, Yiziiziyahi, Malkiyahi, Miyamiini, Aliaazaari, Malkiyahinna Benayahi,
26 Eelaami sirchinni Maataaniyahi, Zakkaariyaasi, Yehieeli, Abidii, Yeremootinna Eeliyaasi,
27 Zaatu sirchinni Eliyoenay, Eeliyaashiibi, Maataaniyahi, Yeremooti, Zabaadinna Aziiza,
28 Beebay sirchinni Yehohanaani, Hanaaniyahi, Zabayinna Atilay,
29 Baani sirchinni Meshulaami, Maluuki, Aadaya, Yaashuubi, Sheaalinna Yeremooti,
30 Pahaati-moaabi sirchinni Adina, Kelaali, Benayahi, Maꞌꞌaseyahi, Maataaniyahi, Baasilieeli, Biinuyinna Minaase,
31 Hariimi sirchinni Elieezeri, Yishiishiyahi, Malkiyahi, Shemayahi, Shiimiooni,
32 Biiniyaami, Maluukinna Shemaariyahi,
33 Hashuumi Mateenay sirchinni Mataata, Zabaadi, Elfeleeti, Yeremay, Minaasenna Shiimiay,
34 Baani sirchinni Maꞌꞌaday, Amiraami, Ueeli,
35 Benayahi, Beediyahi, Keluhi,
36 Waniyahi, Mereemooti, Eeliyaashiibi,
37 Maataaniyahi, Mateenayinna Yaꞌꞌaasu,
38 Biinuy sirchinni Shiimiay,
39 Shelemiyahi, Naataani, Aadaya,
40 Makinadebay, Shaashay, Sharayi,
41 Azaarieeli, Shelemiyahi, Shemaariyahi,
42 Shaaluumi, Amaariyahinna Yooseefi,
43 Nebo sirchinni Yeieeli, Matiitiyahi, Zabaadi, Zebiina, Yaaday, Iyyueelinna Benayahi.
44 Kuri baalunku wole gobba meento adhitinoreeti; insa meento oosonsa ledo haꞌrissu.
