Hosei 9:1-17
9 “Israeeli, tashshi yoonkehe;Wolu manni gede hagiidhitooti.
Foorretenni* kainohunni Maganikkiwiinni ballehoottona.
Gidu ayiddumme baalate, foora manchora baantanni woxe baxootto.
2 Ikkollana ayiddummenna woynete kooffichi diꞌꞌitisannonsa;Haaro woyneno diafidhanno.
3 Yihowa baattora diteessanno;Hatteentenni, Efireemi Gibitse higanno;Asoori gobbarano battaawinore ittanno.
4 Xaate Yihowara woyne kakkalo assite diduntanno;Kakkalonsa dihagiirsiissannosi.
Kakkalonsa wiꞌlate mini sagale gedeeti;Ittannori baalu battaabbanno.
Sagalensa insalla ittannote;*Yihowa minira abbinannita diꞌꞌikkitino.
5 Gamba yitinannihunna* Yihowa ayyaana ayirrissinanni barri iilliro,Maa assitinanni ikka?
6 Kuneeti diinu daye hunannonsa daafira insa xooqqanno.
Gibitse gamba assitannonsa; Memfiisi madaarannonsa.
Birrunni seekkinoonniha ayirrado jajjansa soonnu egemmanno;Dunkaannansa giddo utaamu citi fulanno.
7 Qonqolchine laꞌnanni barri daanno;Rabbate barrino daanno;Israeelino tenne afo!
Masaalaanchinsa gowwa ikkanno; ayyaanunni coyiꞌranno manchino macharaaraamu gede ikkanno;Korkaatuno saokki batidhino; ate gibbannorino batidhino.”
8 Efireemi agaraanchi, Maganiꞌya ledo no.
Xa kayinni masaalaanosi doogo baala, cea ugaaxanno manchi woshshaado gedeeti;Maganisi mine diinoomu no.
9 Gibia waro ikkinte gede, insa bao abbanno coy giddo lixxino;
Isi saonsa qaaganno; cubbinsarano qorichishannonsa.
10 “Israeeli halalla noo woyne gede ikke nooha afummo.
Annuwaꞌneno balasete haqqicho aana umo leꞌino laalo gede ikkite noore laummo.
Insa kayinni Fegoori Baꞌꞌaaliwa hadhu;Insaneeto saalsiisanno coyra* sayisse uytu;Hakkunni baxxanno coy gede insano tiyyiꞌnannire ikkitu.
11 Efireemi ayirrinyi ceichote gede buuwe baꞌꞌanno;Mitte manchono diꞌꞌiltanno, digodobbanno, godowuno digatannose.
12 Ooso lossidhuro nafa,Mittu manchi nafa gatikkinni gude ilaweeloota asseemmonsa;Ee, mulinsanni xeertiꞌreemmo yannara insara aanneꞌe!
13 Hayissote gobbara kaasaminohu Efireemi, anera Xiroosi gedeeti;Xa kayinni Efireemi oososi gorrinara abbanno.”
14 Yihowa, malinonsa qoricha uyinsa;Umo kaꞌanno gedenna unuuninsa moolanno* gede assi.
15 “Gilgaali busha assoote baala assitu; anino hakko giwummonsa.
Bushu assootinsanni kainohunni miniꞌyanni shorreemmonsa.
Xaate insa dibaxeemmo;Gashshaanonsa baala mokkookkootaho.
16 Efireemi baꞌꞌanno.
Rumushshinsa moolanno; mitto gumano dilaaltanno.
Ilturo nafa, baxxanno oosonsa sheemmo.”
17 Iso macciishsha gibbino daafira,Maganiꞌya facci asse agurannonsa;Dagate mereerono raataabbannore ikkitanno.
