Hosei 4:1-19
4 Israeelete manna, Yihowara gobbate noo manni ledo yekkeero noosina,Yihowa qaale macciishshe;Korkaatuno gobbate halaalu, ammanamino baxillinna Magano afate yinanniri dino.
2 Kaphunni xaara, lubbo shaa,Moorunna soorro batidhino;Shoonna reyo* batidhino.
3 Konninni kainohunni gobba dadillitanno;Ise aana heedhannori baalu qooqqe fultanno;Dubbu saadanna iimi cea,Wole agurina baaru qulxuꞌme nafa gooffanno.
4 “Ikkollana mittu manchino yekkeeramoonke woy wole hay yoonke;Korkaatuno mannikki kakkalaanchu ledo yekkeeramanno manni gedeeti.
5 Hakko daafira kiꞌne barra baqaaqa gufidhinanni;Masaalaanchuno tunsote ikkinannihu gede ledoꞌne gufiꞌranno.
Amaꞌneno sammi asseemmo.*
6 Manniꞌya egenno hoogino daafira baꞌꞌanno.*
Kiꞌne egenno mishshinoonni daafira,Anino kakkalaasineꞌya ikkitine soqqantinannikki gede mishoommoꞌne;Maganiꞌne seera* habbinoonni daafira,Anino oosoꞌne haweemmo.
7 Insa kiironsa batidhu deerrinni, ane aana cubbo ledde ledde loossino.
Ayirrinyensa shollinyeho soorreemmo.*
8 Manniꞌya cubbi sagale ikkinonsa;Qoleno mannu cubbo loosara halchitanno.*
9 Mannano ikko kakkalaasine,Doogonsa daafira xaꞌmeemmonsa;Qoleno loosinsa guma mixxitanno gede asseemmo.
10 Insa ittanno; kayinni diduubbanno.
Kaꞌuhu baalu ledo foortanno,* kayinni kiironsa dilexxitanno;Korkaatuno insa Yihowa mishshino.
11 Foorre,* galo woynenna haaro woyne,Danchare assate hasatto huntanno.*
12 Manniꞌya haqqetenni seekkinoonni magannansa amaaꞌlanno;Siqqonsa* kultannonsare assanno;Korkaatuno foorrete ayyaani* ballekkanno gede assannonsa;Qoleno foorrensanni* kainohunni Maganinsara maahoyye gibbanno.
13 Ilaallate guunxora kakkaltanno;Odahete, libine* haqqichonnaWole jajjabba haqqe baalate woroonni kakkalo xiniinsitanno;Korkaatuno tenne haqqe caali danchaho.
Konninni kainohunni seenniꞌne foorannore,Oosoꞌne seennino soorrannore* ikkanno.
14 Seenneꞌne foorrensa* daafira,Oosoꞌne seenneno soorrino daafira dixaꞌmeemmonsa.
Korkaatuno labballu foorretenni heeꞌranno meenti ledo mimmito amade haꞌranno;Qoleno galmaho* foortannori ledo kakkalanno;Wodancha nookkihu togoo manni baꞌꞌanno.
15 Israeele, ati foortanni* noottaha ikkirono,Yihudu kayinni sarxaawoonke.
Gilgaali woy Beeti-aweeni hadhinoonte;‘Heeshshote Magani Yihowanni!’ yitineno xaartinoonte.
16 Israeele finqila saa gede, finqila ikkitino.
Ikkina Yihowa xa insa geꞌrechu wiliiꞌlichi gede halaꞌladu qanchira* allaalannonsa?
17 Efireemi kaphu maganna ledo quraanyaminona,
Facci assitine agurre!
18 Agattonsa* gooffanno woyte,Foorrete* higganno.
Gashshaasineseno* shollinye lubbora baxxanno.
19 Bubbe qoollase giddo xaaxxe amaddannose;*Insano shiqishshino kakkalonni saalfattanno.”
Lekkaalliidi Qaagiishshuwa
^ Woy “Mundee duna.”
^ Woy “huneemmo.”
^ Noo gedeenni tirriro, “sammi assinanninsa.”
^ Woy “biddishsha.”
^ “Ayirrinyeꞌya shollinyeho soorritino” yaano ikkara dandaanno.
^ Woy “lubbonsa woꞌmanka woyte yortanno.” Qaallate Tiro giddo, “Lubbo” yaannoha lai.
^ Woy “Horo mancaꞌinore ikkitanno; soorritanno.”
^ Woy “Maaeelle; saalimalu coy.”
^ Noo gedeenni tirriro, “Wodana huntanno.”
^ Woy “maaeellete; saalimallete.”
^ Woy “maaeellensanni; saalimale ikkitonsanni.”
^ Woy “Kiilaanchu siqqonsa.”
^ Tanni yite suꞌniitannota waajjo daraaro daraartanno haqqichooti.
^ Woy “maaeelinore; saalimale.”
^ Woy “maaeellensa; saalimale ikkitonsa.
^ Kaphu maganna magansiꞌnanni mineeti.
^ Woy “maaeeltanni.”
^ Noo gedeenni tirriro, “halaꞌlado basera.”
^ Woy “Sindetenni qixxeessinoonni agattonsa.”
^ Woy “Horo mancaꞌinore ikkitanno; soorritanno.”
^ Noo gedeenni tirriro, “Wonquwaseno.”
^ Woy “fiite adhite hadhannose.”
