Hosei 3:1-5
3 Hakkiinni Yihowa togo yiie: “Israeelete manni wole maganna haꞌrunsanninna woynete timma* baxanni heeꞌreennanni Yihowa baxinsante gede, atino hadhe wolu manchi baxinotanna soorritanni noo mancho galagalte baxi.”
2 Hakko daafira ise 15 birrinninna* mitte homerenna* darate ikkanno hayxinni hidhummo.
3 Hakkiinni, “Lowo barra aneta ikkite heeꞌratta. Foortooti;* wolu manchi ledono goxxooti; anino ate ledo digoxeemmo” yuummose.
4 Korkaatuno Israeelete daga lowo yanna* moote nookkiha, gashshaanchu nookkiha, kakkalo nookkiha, heelliicho nookkiha, efuude nookkiha hattono teraafiimete misile* nookkiha heedhanno.
5 Hakkunni gedensaanni Israeelete daga galagalte higge, Maganonsa Yihowanna mootensa Daawiti hasidhanno; diru goofimarchirano Yihowawanna danchummasiwa huxidhanni dagganno.
Lekkaalliidi Qaagiishshuwa
^ Kaphu magannara kakkallannite woyne qeeqqinse gannoonni timmaati.
^ Birra yinanni siwiila tumme seekkinoonni saanteeti.
^ Mitte homere 220 litire ikkitanno. Guwuursha B14 lai.
^ Woy “Maaeela coye assitooti (saalimale ikkitooti).”
^ Noo gedeenni tirriro, “lowo barra.”
^ Woy “mini maganna; kaphu maganna.”
