Hosei 8:1-14
8 “Buudu xurumba ufuuffe!
Gondooroꞌya diigginohuranna seeraꞌya agadhitinokki daafira,Yihowa minira diinu allamurchu gede ikke daanno.
2 ‘Maganonke, ninke Israeele ate egenninoommo!’ yitanni anewa higge raartanno.
3 Israeeli danchare lashshi asse agurino.
Iso diinu shorrona.
4 Ani sumuu yuummokkinni mootoolla moohisidhino.
Insa gashshaasine doodhitino; ani kayinni diegennoommonsa.
Uminsara bao abbidhara,Birrinsanninna culkinsanni kaphu maganna seekkidhino.
5 Samaariya, siitu misilekki shagaggiꞌre giwoommo.
Hanqiꞌya insa aana buwanno.
Insa coꞌoota ikka* hooggannohu mamooti geeshshaati?
6 Tini siitu misile Israeelete anga seekkitinotena.
Ogeessu seekkinote ikkinnina Magano diꞌꞌikkitino;Samaariyu siiti hiiqqaqqame bacce ikkanno.
7 Insa bubbe wixidhanno;Hambabalatte mixxitanno.
Agashshu aana iillino gumi* dino;Gidu bullee difulanno.
Guma laaliro nafa, manni gobba manni* itanno.
8 Israeele egemmantanno.
Dagate mereeroAyno hasiꞌrannokki uduunnicho ikkitanno.
9 Calla noohu dubbu harrichi gede, insa Asoori hadhino.
Efireemi baxillaano woxunni hidhino.
10 Insa baxillaano dagate mereerinni hidhitinoha ikkirono,Ani xa gamba asseemmonsa;Mootenna gashshaasine duhisiissinonsa duha duqqite shettanno.
11 Efireemi cubbo loosara, batinye kakkalote darga seekkiꞌrino.
Kakkalote darguwasi cubbo loosanno baycho ikkitinosi.
12 Seeriꞌya* giddo nooha batinye coye borreessoommosi;Insa kayinni wosinchu coy gede assite kiirtino.
13 Kakkalo afansha assite shiqishshannoe; maalano ittanno;Yihowa kayinni kakkalonsanni dihagiidhino.
Xa isi saonsa qaaganno; cubbinsarano qorichishannonsa.
Insa Gibitse higgino.*
14 Israeeli Kalaqaanchosi hawino; galmuwano seekkiꞌrino;Yihudano qiishote katamma batisiꞌrino.
Ani kayinni katammasira giira soyemmo;Giirano mittu mittunku katami shae shakki assite ittanno.”
