Hosei 1:1-11
1 Yihudu mootoolla Ooziya, Iyyoaataami, Akaazinna Hiziqiyaasi waro hattono Israeelete moote Yooaasi beetti Iyyoorbiaami waro, Bieeri beettiwa Hoseiwa* daynoha Yihowa qaale.
2 Yihowa Hosei widoonni qaalesi coyiꞌra hanafi yannara Yihowa Hosei togo yii: “Hadhe foora* mancho adhi; ise foorte* ooso iltannohe; korkaatuno foorretenni* kainohunni gobba Yihowawiinni lowo geeshsha xeertidhino.”
3 Hakko daafira isi haꞌre Dibilaymi beetto Gomeeri adhi; iseno godobbe labbaa beetto iltusi.
4 Hakkiinni Yihowa togo yiisi: “Qaaqqoho suꞌma Iyziraeeli* yite fushshi; korkaatuno Iyziraeelete duꞌnantino mundeera muli yannara Iyyu mine xaꞌmeemmo; Israeelete miniha mootimmate gashshooteno gawaꞌlanno gede asseemmo.
5 Hakko barra Israeelete digaana Iyziraeelete Xeichira* hiiqqeemmo.”
6 Ise layinkimeeshsho godobbe meya beetto iltu; hakkiinni Maganu togo yiisi: “Qaaqqote suꞌma Loruhaama* yite fushshi; korkaatuno xaate Israeelete mine dimaareemmo; fushshe shorreemmonsa.
7 Yihudu mine kayinni maareemmo; digaanunni, bisetenni, olunni, faradunni, woy faradaasinetenni ikkikkinni Maganinsa Yihowanni gatiseemmonsa.”
8 Loruhaama unuuna agurtuhu gedensaanni, Gomeeri godobbe labbaa beetto iltu.
9 Hakkiinni Maganu togo yiisi: “Qaaqqoho suꞌma Loaami* yite fushshi; korkaatuno kiꞌne mannaꞌya diꞌꞌikkitinoonni; anino Maganoꞌne diꞌꞌikkoommo.
10 “Israeelete manni* kiiro safara woy kiira dandiinannikkihu baaru shaafi gede ikkanno. ‘Mannaꞌya diꞌꞌikkitinoonni’ yininsa baychono, ‘Heeshshote Magani ooso’ yinanninsa.
11 Yihudunna Israeelete manni gamba yee mitto ikkanno; qoleno uminsara mitto albisa doodhe, gobbatenni fulanno; Iyziraeelete barri batiꞌra ikkannona.
Lekkaalliidi Qaagiishshuwa
^ Hoshayahira harancho suꞌmaati; “Yahi Gatisinoha; Yahi Gatisino” yitanno tiro afiꞌrino.
^ Woy “maaeela; saalimale.”
^ Woy “maaeela coye assite; saalimalte.”
^ Woy “maaeelu coyinni; saalimalu coyinni.”
^ “Maganu Wixa Wixanno” yitanno tiro afiꞌrino.
^ Woy “Xeichaamu Xawira.”
^ “Dimaarroonnise” yitanno tiro afiꞌrino.
^ “Mannaꞌya Diꞌꞌikkitino” yitanno tiro afiꞌrino.
^ Noo gedeenni tirriro, “labballi ooso.”
