Mboni za Yahova zikugawira Bhibhlya ya Dziko Ipswa kuna anthu onsene anafuna kuileri.

Ngakhale misoka yakusiyana-siyana isathumburuza na kudhinda Mabhibhlya mazinji, anthu azinji nee asakwanisa kuagula thangwi ya utcerengi, pontho atsogoleri a mauphemberi nee asafuna kuti anthu akhale na Bhibhlya mu pilongero pyawo. Cincino, Mboni za Yahova zisagawira Bhibhlya ya Dziko Ipswa mu pilongero pyakupiringana 115.

Onani pitsandzo pingasi:

• Ruwanda: Silvestre na nkazace anacemerwa Venantie, akuti ali na ana anai, alonga: “Ndife akutcerenga kakamwe. Nee tikhakwanisa kugula Mabhibhlya toera kupasa anthu onsene a m’banja yathu. Cincino, tonsene tiri na Bhibhlya ya Dziko Ipswa mu cilongero ca Kinyarwanda, pontho tisaleri Bhibhlya pabodzi ntsiku zonsene.”

  Ntsogoleri wa gereja Anglikana wa dziko ineyi alonga: “Iyi ndi Bhibhlya inabvesesa ine mwadidi. Ndi Bhibhlya yadidi kakamwe kupiringana Mabhibhlya onsene adaleri ine. Mboni za Yahova zisafuna kakamwe anthu!”

• República Democrática do Kongo: Magereja anango asakhonda kugulisa Mabhibhlya mu cilongero ca Lingala kuna Mboni za Yahova. Ceneci ndi cibodzi mwa pilongero pinalongwa na anthu azinji mu dziko ineyi.

  Nee ndi pyakudzumisa kuti kutomera mu ndzidzi udabuluswa Bhibhlya ya Dziko Ipswa mu cilongero ca Lingala, Mboni za Yahova za dziko ya Kongo zisatsandzaya kugawira Bhibhlya ineyi. Bhibhlya ya Dziko Ipswa yatsandzayisa anthu azinji. Pidabuluswa iyo pa nsonkhano wa gawo wa Mboni za Yahova, apolixa akhali pa mbuto ineyi akhalambo pa nzera toera kutambira Bhibhlya ineyi.

• Fiji: Mabhibhlya mu cilongero ca Fiji ndi akudhula kakamwe. Pyenepi pikhacitisa kuti Mboni za Yahova ziphatisire Bhibhlya ya Dziko Ipswa mu cingerezi. Mbwenye mu 2009 anthu a ku Fiji atambira Bhibhlya ya Dziko Ipswa ya Malemba Acigerego Acikristu (Novo Testamento) mu cilongero cawo.

  Mamuna m’bodzi adzumatirwa kakamwe na kubveka mwadidi kwa Bhibhlya ya Dziko Ipswa, mbaphemba ibodzi. Mbwenye, m’bodzi wa Mboni za Yahova wa cisa ceneci ampanga toera adikhire mwezi ubodzi mpaka kufika kwa Mabhibhlya. Nakuti nee akhafuna kudikhira, mamauna unoyu acita ulendo wa makilometru 35 toera kupaswa Bhiblya ya Dziko Ipswa na Mboni unango. Mamuna unoyu alonga: “Bhihlya iyi ndi yadidi kakamwe kupiringana ikhaphatisira ife. Ndi yakukhonda nentsa kuleri na kubvesesa.”

• Malawi: Pidatoma Davide kupfundza Bhibhlya na Mboni za Yahova, anthu a uphemberi wa Bhatista aenda kankwatira Bhibhlya ikhadampasa iwo. Mbwenye, pidabuluswa Bhibhlya ya Dziko Ipswa mu cilongero ca Chichewa, Davide atsandzaya kakamwe.

  Nakuti Mabhibhlya ku Malawi asadhula kakamwe, pidakwatirwa Davide Bhibhlya, akhabvundzika kuti mbadakwanisa tani kugumana inango. Mbwenye pidapaswa Davide Bhibhlya ya Dziko Ipswa, alonga: “Cincino ndiri na Bhibhlya yadidi kakamwe kupiringana idakwatirwa ine!”

Mu pyaka pyakupiringana 60, pidabuluswa Bhibhlya ya Dziko Ipswa ya cingerezi pa nsonkhano wa gawo ku Nova York, anyakubvesera apangwa: “Ilerini. Ipfundzeni . . . Gawiranimbo anthu anango.” Toera kukwanirisa mafala anewa, Mboni za Yahova zagawira Mabhibhlya a Dziko Ipswa akupiringana mamiliyau 175. Kusiyapo pyenepi, cincino imwe munakwanisakuleri Bhibhlya mu interneti mu pilongero pyakupiringa 50.