Sak la Bib i di

 Lo batèm sé kan i plonj konplètman dann lo. a La Bib i parl in bonpé batèm (Akt 2:41). Par égzanp lo batèm Jézu dann Jourdin. (Matié 3:13, 16) In bonpé lané apré, in moun k’i té sort péi Létiopi la fé batiz ali dan « in landroi ousa navé d’lo », su la rout ousa li té pas (Akt 8:36-40).

 Jézu la di ké son bann disip i doi fé batiz azot (Matié 28:19, 20). Lapot Pièr la rokoz ladsi (1 Pièr 3:21).

Dan lartik-la

•  Kosa lo batèm i vé dir ?

•  Kosa la Bib i di su lo batèm bann ti bébé ?

•  Kosa i vé dir kan i batiz o non lo Papa, lo Garson é lèspri sin ?

•  Èské èt robatizé lé in péché ?

•  Dot batèm la Bib i koz dési

•  Sak domoun i pans su lo batèm krétien

 Kosa lo batèm i vé dir ?

 Kan in moun i batiz li fé mont dovan toulmoun ké li la ropanti ali son bann péché é li promèt fé sak Bondié i vé kinport sak i ariv. Li fé lo vé obéi Bondié é Jézu tout son vi. Sak i fé batiz azot i pran lo chemin pou la vi pou toultan.

 Kan i plonj lo moun dann lo, sa i fé mont ké lo moun la fé bann chanjman dan son vi. Koman sa ? La Bib i konpar lo batèm èk in lantèrman (Romin 6:4 ; Kolosien 2:12). Kan i plonj ali, lo moun i fé mor son lansien manièr d’viv. Kan li sort dann lo, li komans in nouvo vi kom krétien, ké la done son vi Bondié.

 Kosa la Bib i di su lo batèm bann ti bébé ?

 La Bib i koz pa dési bann batèm bann ti bébé b é i di pa non pli ké bann ti bébé i doi fé batiz azot.

 Sak la Bib i di su lo batèm i akord pa avèk sak i di su lo batèm bann ti bébé. Parské si in moun i vé fé batiz ali, li doi fé détroi zafèr avan. Par égzanp, i fo li konpran bann lamontraj la Bib ké lé inportan é ké li mèt sa an pratik dan son vi. Li doi ropanti ali son bann péché. É dann in priyèr, li doi di Bondié ké li lé pré pou fé son volonté pou toultan (Akt 2:38, 41 ; 8:12). Bann ti bébé i gingn pa fé sa zot.

 Kosa i vé dir kan i batiz o non lo Papa, lo Garson é lèspri sin ?

 Sé Jézu la domand sa : « Fé bann disip [...], batiz azot o non lo Papa, lo Garson é lèspri sin, amont banna fé tout sak moin la komand azot » (Matié 28:19, 20). Kan i di « o non lo » sa i vé dir k’i fo aksèp lotorité é lo pozision ké lo Papa èk lo Garson néna, é lo rol lèspri sin i joué. Par égzanp, lapot Pièr la di èk in moun té né andikapé : « Par lo non Jézu Kris i sort Nazarèt, march aou ! » (Akt 3:6). Kan Pièr i di bann parol-la, li té rokoné lotorité Jézu é li la fé mont ké té Jézu la géri moun-la.

•   « Lo Papa », sé Jéova c. Kom sé li la kré anou, é la done anou la vi, an tank Bondié Toupuisan sé Li, ké néna lo pli gran lotorité (Jénèz 17:1 ; Révélasion 4:11).

•   « Lo Garson », sé Jézu Kris, sak la done son vi pou nou (Romin 6:23). Nou pé pa èt sové, si nou rokoné pa é si nou lé pa dakor, dési lo rol inportan Jézu i joué dan lo projé ké Bondié néna pou domoun (Jan 14:6 ; 20:31 ; Akt 4:8-12).

•   « Lèspri sin », sé la fors Bondié, son fors pou travay d. Bondié la ansèrv son lèspri sin pou fé tout zafèr, done la vi, fé konèt son bann mésaj bann profèt èk dot moun, é done son bann sèrvitèr la fors zot lé bézoin pou fé son volonté (Jénèz 1:2 ; Job 33:4 ; Romin 15:18, 19). Bondié la ansèrv son lèspri sin pou pous sak la ékri la Bib mèt son bann pansé dédan (2 Pièr 1:21).

 Èské èt robatizé lé in péché ?

 I ariv ké domoun i chanj rolijion. Mé si dann son lot rolijion li lavé avan, in moun té fine batizé. Èské i sré in péché si li fé robatiz ali ? Somanké désèrtin va ansèrv Éfézien 4:5 pou di ké oui, sé in péché, parské vèrsé-la i di : « In sèl Ségnèr, in sèl foi, in sèl batèm. » Mé vèrsé-la i di pa ké in moun i pé pa fé robatiz ali. Akoz nou di sa ?

 Kontèks. Sak nou lir avan é apré Éfézien 4:5 i amont anou, ké lapot Pol lavé di lé inportan pou bann vré krétien èt uni dan zot kroiyans (Éfézien 4:1-3, 16). In lunité komsa-la lé posib, rienk si zot i suiv lo mèm Ségnèr, Jézu Kris, si zot néna lo mèm foi sétadir, lo mèm fason konpran sak la Bib i di é si zot i fé sak i fo avan pran batèm.

 Lapot Pol la ankouraj domoun ké lété déja batizé fé robatiz azot. Akoz sa ? Parské banna lavé fé batiz azot san konpran vréman bann lamontraj lo Kris (Akt 19:1-5).

 Lo fondasion pou èt batizé. Pou ké li lé aksèpté par Bondié i fo ké lo batèm i ropoz dési bann vérité la Bib (1 Timoté 2:3, 4). Si in moun i fé batiz ali dapré bann lamontraj ké lé pa dan la Bib, Bondié i pé pa aksèp batèm-la (Jan 4:23, 24). Somanké lo moun-la lé sinsèr mèm li, mé li la pa fé sa « dapré lo vré konésans » (Romin 10:2). Pou ké Bondié i aksèp ali, i fo li aprann bann vérité la Bib, é ké li mèt sa an pratik dan son vi, é aprésa done son vi Bondié é fé robatiz ali. Lèr-la son batèm lé pa in péché. An vré, i fo li fé sa.

 Dot batèm la Bib i koz dési

 La Bib i koz dési dot batèm, ké té roprézant pa lo mèm zafèr ké sak bann disip Jézu la gingné. Alon oir détroi légzanp.

 Lo batèm Jan lo Batizèr e. Bann juif é sak la aksèp lo rolijion juif té fé batiz azot par Jan, pou fé mont zot té ropant azot lo bann péché zot lavé fé, kont la loi Moiz ké Bondié lavé done bann Zisraèlit. Lo batèm Jan la èd lo pèp konèt é aksèp Jézu Nazarèt kom lo Mési (Luk 1:13-17 ; 3:2, 3 ; Akt 19:4).

 Lo batèm Jézu. Na poin dot ké la gingn lo batèm ké Jan la done Jézu. Jézu lété in moun parfé ké la jamé péché (1 Pièr 2:21, 22). Batèm-la té vé pa dir ké li té ropant ali oubien ké té « in domand fé èk Bondié pou gingn in konsians klèr » (1 Pièr 3:21). Mé plito, an tank lo Mési, li té prézant ali dovan Bondié pou fé son volonté. Surtou pou done son vi pou nou (Ébré 10:7-10).

 Lo batèm avèk lèspri sin. Jan lo Batizèr èk Jézu tou lé dé la koz su lo batèm èk lèspri sin (Matié 3:11 ; Luk 3:16 ; Akt 1:1-5). Batèm-la lé pa parèy lo batèm ké lé fé o non lèspri sin (Matié 28:19). Akoz sa ?

 Néna rienk in ti kantité disip Jézu ké lé batizé avèk lèspri sin. Lèspri sin i choizi azot parské zot i doi alé sèrv èk Jézu dann sièl f an tank roi é prèt pou dirij la tèr (1 Pièr 1:3, 4; Révélasion 5:9, 10). Sak zot va règn dési, sra bann milion disip Jézu k’i èspèr viv pou toultan dann paradi su la tèr (Matié 5:5 ; Luk 23:43).

 Lo batèm dann Jézu Kris é dan son mor. Sak lé batizé èk lèspri sin lé « batizé dann Jézu Kris » osi (Romin 6:3). Sé bann disip Jézu la choizi ké va règn avèk li dann sièl, k’i gingn batèm-la. Par zot batèm dann Jézu Kris, zot i fé parti son lasanblé ké li la choizi. Jézu lé la tèt é zot lé lo kor (1 Korintien 12:12, 13, 27 ; Kolosien 1:18).

 Bann krétien ké lé choizi, lé osi ‘ batizé dan la mor [Jézu]’ (Romin 6:3, 4). Kom Jézu la fé, azot osi, pou obéi Bondié zot i fé bann sakrifis dan zot vi é zot i abandone zot lèspoir viv pou toultan su la tèr. Sé kan zot i mor é ké zot i rolèv pou viv dann sièl kom bann zèspri, ké batèm-la i fini (Romin 6:5 ; 1 Korintien 15:42-44).

 Lo batèm avèk dofé. Jan lo Batizèr la di sak té ékout ali : « Ali [Jézu], li va batiz azot èk lèspri sin é avèk dofé. Son zouti pou vané lé dan son min, li va nétoiy tout lo landroi ousa li bat lo grin. Li va ramas lo blé dann magazin, mé la kok lo blé, li va brul ali dann in fé k’i gingn pa étèn » (Matié 3:11, 12). Jan lo Batizèr té fé in diférans ant lo batèm èk dofé é lo batèm èk lèspri sin. Kosa i vé dir bann parol-la?

 Sak i ékout é i fé sak Jézu i di lé lo blé. Sra posib pou zot èt batizé èk lèspri sin. Sak i vé pa ékout Jézu lé la kok lo blé. Banna va konèt in batèm èk dofé sétadir zot sra détrui pou toultan (Matié 3:7-12 ; Luk 3:16, 17).