1 Reyes 8:1-66
8 Chaymantam Salomonqa Israelpi punta apaqkunata huñurachirqa.+ Chay punta apaqkunam karqa sapa ayllupa kamachiqninkuna, wakinñataqmi sapa ayllumanta ancha riqsisqa runakuna.+ Paykunatam Jerusalenman huñurachirqa, chaynapi Jehova Diospa baulninta* Davidpa llaqtan sutiyuq llaqtamanta+ Diospa wasinman apanankupaq. Chay llaqtapa huknin sutinmi karqa Sion.+
2 Israelpi llapallan runakunam kamachiq Salomonwan huñunakurqaku etanim* sutiyuq qanchis kaq killapi.+ Chay killapim watan-watan huñunakuspa kusirikuqku*.
3 Sacerdotekunam baulta huqarirqaku Israelpi llapallan punta apaqkuna chayaramuptinku.+
4 Sacerdotekunawan Leviy ayllukunam Jehova Diospa baulninta, carpanta+ hinaspa carpanpi waqaychasqanku tukuy imata aparqaku.
5 Kamachiq Salomonpa qayachisqan Israel runakunam Diospa baulninpa ñawpaqninpi karqaku. Ovejakunatawan torokunata Diospaq nakasqankuqa mana yupay atinam achkallay-achka karqa.+
6 Sacerdotekunam Jehova Diospa baulninta uku law cuartoman churarqaku+ querubin angelkunapa rapran ukuman. Chay cuartopa sutinmi karqa Chuyay-chuyay.+
7 Querubin angelkunapa rapranmi Diospa baulninpa hawanpi mastarisqa karqa, chaymi querubinkunaqa baulta hinaspa chay baulta apana kaspikunata llanturqa.+
8 Chay baulta apana kaspikunaqa+ hatunmi karqa, chaymi Chuya sutiyuq cuartomanta puntan rikukuq. Ichaqa manam hawamantaqa rikukuqchu. Chaypim kachkan kunankama.
9 Baulpa ukunpiqa iskay tabla rumikunallam karqa.+ Chay rumikunataqa Moisesmi Horeb lawpiraq churarqa+ Israel runakunawan Jehova Dios contratota* ruwaptin.+ Chayqa karqa Egipto nacionmanta lluqsimusqanku qipatam.+
10 Sacerdotekuna wasimanta lluqsiramuptinkum puyu+ huntarurqa Jehova Diospa wasinman.+
11 Jehova Diospa kanchayninwan Jehova Diospa wasinman puyu huntarusqanraykum+ sacerdotekunaqa ruwayninkuta saqirurqaku.
12 Hinaptinmi Salomon nirqa: “Jehova Diosmi nirqa tutayay puyu ukupi kananmanta.+
13 Paypaqmi suma-sumaq wasita ruwarapuni chaypi wiñaypaq yachananpaq*”, nispa.+
14 Chaymantam Salomonqa muyuriykamuspan chaypi sayaq llapallan Israel runakunapaq Diosta mañakuspan bendeciykurqa.+
15 Salomonmi nirqa: “Israelpa yupaychasqan Jehova Diosyá hatunchasqa kachun. Payqa taytay Davidman nisqantam cumplirqa. Diosmi nirqa:
16 ‘Israel runaykunatam Egiptomanta hurqumurqani. Chay punchawmantaqa manam mayqin llaqtatapas akllarqanichu sutiy hatunchasqa kananpaq wasita ruwapuwanankupaqqa.+ Kunanmi ichaqa Israel runaykunata kamachinanpaq Davidta akllaruni’, nispa.
17 Taytay Davidmi tukuy sunqunwan Israelpa yupaychasqan Jehova Diospaq wasi ruwayta munarqa, chaynapi Diospa sutin hatunchasqa kananpaq.+
18 Jehova Diosmi ichaqa taytay Davidta nirqa: ‘Tukuy sunquykiwanmi sutiy hatunchasqa kananpaq wasita ruwapuwayta munanki, chay munasqaykiqa allinpunim.
19 Ichaqa manam qamchu wasitaqa ruwapuwanki. Manaraq naceq churikim sutiy hatunchasqa kananpaq wasitaqa ruwapuwanqa’, nispa.+
20 Jehova Diospa nisqanman hinam taytay Davidpa tiyananpi tiyachkani Israel runakunata kamachinaypaq. Hinaspam Israelpa yupaychasqan Jehova Diospaq wasita ruwarapuni sutin hatunchasqa kananpaq.+ Chaynatamá Jehova Dios nirqa.
21 Chay wasipim huk cuartota ruwachirqani Diospa baulninpaq, chay baulpa ukunpim kachkan iskay tabla rumikuna.+ Chaypim qillqasqa kachkan ñawpaq abuelonchikkunawan Jehova Diospa contrato ruwasqan. Contratotaqa ruwarqa Egiptomanta hurqumuspanmi”, nispa.
22 Chaymantam Salomonqa Jehova Diospa altarninpa ñawpaqninpi sayaykurqa, chaypim Israel runakunaqa huñunasqa kachkarqaku. Hanaq pachaman makinta haywarispanmi mañakurqa:+
23 “Israelpa yupaychasqan Jehova Dioslláy, manam qam hina Diosqa kanchu+ hanaq pachapipas nitaq kay pachapipas. Qamqa rimasqaykiman hinam ruwanki, hinaspapas tukuy sunqunkuwan kasukuq runaykikunatam+ imaña kaptinpas kuyanki.+
24 Taytay Davidman nisqaykiman hinam cumplirunki. Kunanmá nisqaykiman hina cumplirunki.+
25 Israelpa yupaychasqan Jehova Dioslláy, qanmi taytay Davidta nirqanki: ‘Sichum churikikuna ñuqapa munasqayman hina kawsaspanku qam hina kasuwaptinkuqa,+ miraynikikunam Israel runakunata haykapipas kamachinqa’, nispa. Chayna nisqaykiman hinayá cumpliy.
26 Israelpa yupaychasqan taytalláy, kunanyá taytay Davidman nisqayki cumplikuchun.
27 Dioslláy, ¿yaqachu kay pachapi yachawaq?+ Hanaq pacha hatu-hatun kachkaspanpas manam kamasunkichu.+ Chaynaqa, ¿imaynataq kay wasi ruwasqayqa kamasunkiman?+
28 Jehova Dioslláy, qampa qayllaykipi kunan mañakusqaytayá uyariykullaway. Kay yupaychaqnikipa qayakamullasqaytayá uyariykullaway.
29 Qanmi kay wasimanta nirqanki: ‘Chaypim sutiy hatunchasqa kanqa’,+ nispayki. Tuta-punchawyá kay wasikita qawamuy, chaynapi kay wasi lawman qawamuspa mañakamuptiy uyariwanaykipaq.+
30 Uyariykuway mañakusqayta, uyariykuytaq Israel runaykikuna kaylawta qawamuspa mañakamuptinkupas. Hanaq pachapi kasqaykimanta uyariykamullawayku+ hinaspa pampachaykullawayku.+
31 Sichu pipas runamasinta mana allinta ruwarunman hinaspa jurachiptinku ninman: ‘Ñuqaqa manam chaytaqa ruwarqanichu, llullakuspayqa ñakasqayá kasaq’, nispa. Chaynata nispan kay altarman hamuptinqa,+
32 qanmi hanaq pachamanta uyariykamuspa jueznin kanki. Mana allin ruwaqmanqa mana allin ruwasqanman hinam kutichipunki. Allin ruwaqmanñataqmi allin ruwasqanman hina kutichipunki.+
33 Israel runaykikuna huchallikusqankurayku chiqniqninkunapa makinpi kaspa,+ hinaspa wanakuspanku kay wasipi sutikita hatunchaspa mañakuptinkuqa,+
34 hanaq pachamanta uyariykamuspa Israel runaykikunata pampachaykuy hinaspa ñawpaq abuelonkuman qusqayki allpaman kutichimuy.+
35 Runaykikuna huchallikusqankurayku+ mana parachimuptiki+ kaylawman qawamuspa mañakamusuptikiqa, sutikita hatunchaptinkuqa hinaspa ñakarichisqaykimanta wanakuptinkuqa,+
36 hanaq pachamanta uyariykamuy, pampachaykuy, allinta kawsanankupaq yachaykachiy+ hinaspa qusqayki allpaman parachimuy.+
37 Sichu runaykikunapa allpanpi muchuy*,+ unquy, llumpay quni wayra kaptinqa utaq kawsaykuna chakiptinqa,+ aqarway urukuna tarpukusqankuta tukuptinqa, chiqniqnin runakuna mayqan llaqtatapas muyuriruptinqa, ima unquypas utaq ima sasachakuypas kaptinqa,+
38 sunqunpi ima llakiyuq kasqanman hina sapakama+ mañakamusuptikipas,+ pi runaña mañakamusuptikipas utaq llapallan Israel runaykikuna kay wasiman makinkuta haywarimuspa mañakamusuptikipas,
39 hanaq pachapi yachasqaykimanta uyariykamuy+ hinaspa pampachaykuspa+ yanapaykuy. Qamllam sapakamapa sunquntaqa riqsinki,+ chaymi ruwasqankuman hina kutichipunki.+
40 Chaynapim paykunaqa ñawpaq abueloykuman qusqayki allpapi kawsaspanku manchakusunki.
41 Dioslláy, huklaw llaqtayuqkunam mana Israelpa miraynin kachkaspankupas karu llaqtamanta sutikirayku hamunqaku.+
42 Paykunaqa sutikimanta hinaspa tukuy atiyniyuq kasqaykimantam uyarinqaku.+ Paykuna hamuspanku kay wasiki lawman qawamuspa mañakusuptikiqa,
43 hanaq pachapi yachasqaykimanta uyariykamuy+ hinaspa paykunapa mañakusqanman hina ruwaykapuy. Chaynapi llapallan runakuna sutikimanta yachaspanku Israel runaykikuna hina manchakusunaykipaq+ chaynataq kay ruwasqay wasipi sutiki hatunchasqa kasqanta yachanankupaq.
44 Jehova Dioslláy, runaykikuna chiqniqninkunawan peleaq maymanpas rispanku+ akllasqayki llaqtata+ utaq qampa sutikirayku ruwasqay wasi lawta qawamuspa+ mañakamusuptikiqa,+
45 hanaq pachamanta uyariykamuspayá yanapaykuy.
46 Dioslláy, lliwpas huchallikuqmi kallaniku.+ Sichu runaykikunata huchallikusqankurayku piñakuspayki chiqniqninkunaman quykunki, hinaptin karu llaqtaman preso apasqa kaspanku,+
47 chay llaqtapi+ kaspa qanman kutirikamuspa+ qayakamusunkiman:+ ‘Mana allinkunata ruwaspam huchallikuruniku’, nispanku.+
48 Chay presochasqanku llaqtamanta tukuy sunqunkuwan hinaspa tukuy vidankuwan* qanman kutirikamuspanku+ ñawpaq abuelonkuman qusqayki allpaman, akllasqayki llaqtaman chaynataq sutikirayku ruwachisqay wasiman qawamuspanku mañakamusuptikiqa,+
49 hanaq pachapi yachasqaykimantayá uyariykamuy+ hinaspa yanapaykuy.
50 Runaykikunata pampachaykuy. Tukuy imapi pantasqankutapas pampachaykuyá. Chay preso apaqninkunawanyá yanapaykachiy llakipayanankupaq.+
51 Paykunaqa runaykikunam kanku,+ paykunataqa fierro chulluchina hornomanta hurquchkaq hinam+ Egiptomanta hurqumurqanki.+
52 Dioslláy, mañakusqaytayá uyariykamullaway.+ Israel runaykikunatapas uyariykuyá haykapi mañakamuptinkupas.+
53 Llapallan kamachiq Jehova Dioslláy, qanmi kay pachapi llapallan llaqtakunamanta paykunata akllaykurqanki runaykikuna kananpaq,+ chaytam Moiseswan willachirqanki ñawpaq abueloykuta Egiptomanta hurqumuspayki”, nispa.
54 Salomonqa qunqurakuykuspam makinta hanaq pachaman huqarispan Jehova Diosta mañakuchkarqa, mañakuyta tukuruspanmi hatariykurqa. Jehova Diospa altarninpa ñawpaqninpim mañakuchkarqa.+
55 Sayaykuspanmi Israel runakunata bendecispan kallpawan nirqa:
56 “Hatunchasqayá kachun Jehova Diosqa. Payqa nisqanman hinam Israel runankunaman hawkayayta qurqa.+ Moiseswan willachisqanqa manam mayqanpas yanqachu karqa, llapallanmi cumplikurqa.+
57 Jehova Diosyá ñuqanchikwan kachun, imaynam ñawpaq abuelonchikkunawan kasqanman hina.+ Amayá saqiwasunchu nitaq qipanchawasunchu.+
58 Payyá munasqanman hina kawsananchikpaq yanapawasun.+ Yanapawasuntaqyá ñawpaq abuelonchikkunaman lliw kamachisqankunata kasukunanchikpaqpas.
59 Jehova Diosninchikqa amayá haykapipas qunqachunchu kunan mañakusqaytaqa, chaynapi Israel runankunata Jehova Dios sapa punchaw yanapawananchikpaq.
60 Chaynapim kay pachapi llapallan runakunaqa yachanqaku Jehova Dioslla chiqap Dios kasqanta.+ ¡Manam hukqa kanchu!+
61 Jehova Diosninchikta tukuy sunquykichikwan yupaychaspa+ munasqanman hina kawsaychik hinaspa kamachikuyninkunata kasukuychik kunan ruwasqaykichikman hina”, nispa.
62 Kamachiq Salomonwan llapallan Israel runakunam Jehova Diospaq achka animalkunata nakapurqaku.+
63 Salomonmi Jehova Dioswan hawkalla kasqanrayku nakapurqa+ 22.000 torokunata hinaspa 120.000 ovejakunata. Chaynatam ruwarqaku Jehova Diospa wasinta tukuruspanku.+
64 Chay punchawmi wasipa ñawpaqninpi patiota Salomonqa Jehova Diosllapaqña sapaqcharqa, chaypim Jehova Diospaq kañarqaku animalkunata, kawsaykunamanta qusqanku ofrendata hinaspa Dioswan hawkalla kasqankurayku wirata.+ Patiotaqa sapaqcharqa broncemanta ruwasqan altar+ tukuy chaykunata kañanankupaq mana haypasqanraykum.
65 Chay punchawkunam Salomonqa llapallan Israel runakunawan Jehova Diosta yupaychaspa kusikurqa.+ Chaymanmi hamurqaku Lebo-hamat llaqtamantapas*, chay llaqtaqa karqa karu-karupim. Hamurqakutaqmi Egipto wayqupi yachaqkunapas.+ Chay huñunakuyqa 14 punchawmi karqa.
66 Paqarintintam Salomonqa runakunata aviarqa, paykunañataqmi Salomonta bendeciykuspanku wasinkuman kusisqallaña kutikurqaku. Paykunaqa kusisqam karqaku Davidta hinaspa Israel runakunata Jehova Dios kuyasqanmanta.+
Willakuykuna
^ Hebreo rimaypiqa nichkan: “Dioswan pacto ruwasqanku baulta”, nispam.
^ Qaway B15 kaq yachachikuyta.
^ Kayqa karqa ramada fiestapim.
^ Utaq: “Pactota”. Qaway kay palabrapa ima ninan kasqanta.
^ Utaq: “Tiyananpaq”.
^ Utaq: “Yarqay”.
^ Utaq: “Qamllapaqña kawsakuspa”.
^ Utaq: “Hamat llaqtaman yaykunamantapas”.
