1 Reyes 6:1-38
6 Egipto nacionmanta Israelpa mirayninkuna lluqsimusqankumanta+ 480 wata pasaruptinmi Jehova Diospaq wasita Salomon ruwayta qallarichirqa*+ ziv sutiyuq iskay kaq killapi*.+ Chaytaqa ruwarqa tawa wataña Israel runakunata kamachichkaspanmi.
2 Jehova Diospaq Salomonpa ruwachisqan wasipa largonmi karqa yaqa 27 metro*, anchonñataqmi karqa yaqa isqun metro*, sayayninñataqmi karqa 13 metro masnin*.+
3 Karqataqmi corredorninpas,+ largonmi karqa wasipa hina yaqa isqun metro*, anchonñataqmi karqa tawa metro masnin*.
4 Salomonqa ruwachirqataqmi wasipa ventanankunatapas llañuniqpi tukuqta.+
5 Ruwachirqataqmi wasipa muyuriqninpi cuartokunatapas, chay cuartokunam hapichisqa karqa uku lawpi+ hinaspa hawa lawpi cuartokunapa* muyuriqninman.+
6 Chay muyuriqnin cuartokunam karqa iskay metro masnin* pampayuq, altuspi kaq cuartokunañataqmi karqa iskay metro parten* pampayuq, chay altuspa altusninpi cuartokunañataqmi karqa kimsa metro masnin* pampayuq. Gradasta hinam pirqakunata ruwarqaku chaypa hawallanmanña qirukunata* churanankupaq.+
7 Diospa wasinta ruwanankupaqqa llaqllasqatañam rumikunatapas apamurqaku,+ chaymi pirqaptinkuqa mana uyarikurqachu martillopa, hachapa chaynataq huk herramientakunapa taqtaqyasqanpas.
8 Wasipa muyuriqninpi cuartokunaman yaykuna punkum karqa wasipa alliq* lawninpi*.+ Iskaynin altuskunamanñataqmi muyu-muyu escalera qispirqa.
9 Salomonqa wasi ruwayta tukurachispanmi+ cedro qirukunawan chakachirqa, hinaspam cedro tablakunawan qatachirqa.+
10 Ruwachirqam wasipa muyuriqninpi cuartokunata.+ Sapa cuartom karqa iskay metro masnin* sayayniyuq, chay cuartokunam wasiman hapichisqa karqa cedromanta qirukunawan.
11 Chay punchawkunapim Salomonta Jehova Dios nirqa:
12 “Kay wasitam ruwachipuwachkanki, sichu lliw kamachikuyniykunata kasukuptikiqa hinaspa chayman hina kawsakuptikiqa,+ taytayki Davidman nisqayman hinam kay wasipi kasaq.+
13 Israel runaykunatamá mana saqispay yanapasaq”, nispa.+
14 Salomonqa hinallam Diospa wasinta ruwachirqa.
15 Wasipa ukuntam cedromanta tablakunawan churachirqa. Pampantañataqmi cipres tablakunawan churachirqa.+
16 Wasipa uku lawninpim+ ruwachirqa Chuyay-chuyay sutiyuq cuartota.+ Chay cuartoqa karqa yaqa isqun metrom*. Chay cuartoqa cedro tablakunawan rakisqam karqa.
17 Ñawpaqninpi cuartoñataqmi+ yaqa 18 metro* karqa.
18 Chay churachisqan tablakunapim tallarqaku calabazakunata+ hinaspa panchirichkaq waytakunata.+ Cedro tablawan churachisqa kaptinmi rumiqa mana imaniraqllapas rikukurqachu.
19 Uku lawpi cuartotam+ Salomon tukuchirqa Jehova Diospa baulninta* churachinanpaq.+
20 Chay cuartopa largonmi karqa yaqa isqun metro*, anchonpas karqa yaqa isqun metrom, sayayninpas karqa yaqa isqun metrom,+ chaytam quriwan llusichirqa. Altartapas cedromanta tablawanmi churachirqa.+
21 Salomonqa wasipa ukuntam quriwan llusichirqa.+ Churachirqataqmi qurimanta cadenakunatapas uku law cuartopa punkun lawpi,+ chay cuartoqa quriwan llusisqam karqa.
22 Wasipa ukuntaqa llapallantam quriwan llusichirqa. Quriwantaqmi llusichirqa uku lawpi cuartopa ñawpaqninpi altartapas.+
23 Uku law cuartopaqmi ruwachirqa pino sachamanta iskay querubin angelkunata.+ Sapakamam karqa tawa metro masnin* sayayniyuq.+
24 Querubinpa sapa rapranmi karqa iskay metro masnin*. Huknin rapranpa puntanmanta huknin rapranpa puntankamam karqa tawa metro masnin*.
25 Huknin querubinpa raprankunapas tawa metro masninmi* karqa. Iskayninpam sayayninpas hinaspa imayna kasqanpas chaynalla karqa.
26 Sapakamam tawa metro masnin* sayayniyuq karqa.
27 Chaymantam Salomonqa iskaynin querubin angelkunata+ Chuyay-chuyay sutiyuq cuartoman churachirqa. Huknin querubinpa mastarisqa rapranpa puntanmi kaylaw pirqaman tuparqa, hukninpa rapranñataqmi waklaw pirqaman tuparqa. Querubinkunapa huknin rapranñataqmi tupanakurqa chay cuartopa chawpinpi.
28 Chay querubin angelkunatapas quriwanmi llusichirqa.
29 Wasipa pirqankunapim iskaynin cuartokunapi tallachirqa querubin angelkunata,+ palmera sachakunata+ chaynataq waytakunatapas.+
30 Wasipa chay iskaynin cuartonkunatam quriwan pampanta llusichirqa.
31 Uku law cuartoman yaykuna punkutam ruwachirqa pino sachamanta, chay punkuqa karqa iskay lawman kichakuqmi. Ruwachirqataqmi punkupa waqtanpi pilarkunatapas chaynataq punkuta hapiq qirukunatapas. Pirqanpas pichqaman rakinasqam karqa, punku hina sayayniyuqmi llapan karqa*.
32 Chay iskayman kichakuq punkuqa karqa pino sachamantam, chaypim tallachirqa querubin angelkunata, palmera sachakunata chaynataq waytakunatapas. Punkutaqa quriwanmi llusichirqa.
33 Chuya sutiyuq cuartoman yaykunapipas punkuta hapiq qirukunaqa pinomantam karqa, chaykunaqa karqa tawa waqtayuqmi.
34 Ruwachirqataqmi cipres sachamanta iskayman kichakuq punkukunatapas, chay punkukunaqa muyuqllam karqa.+
35 Chay punkupim tallachirqa querubin angelkunata, palmera sachakunata chaynataq waytakunatapas, hinaspam quriwan llusichirqa.
36 Wasipa uku lawninpi patiotam pirqachirqa+ kimsa siqi llaqllasqa rumikunawan, hawanmanñataqmi churachirqa huk siqi cedromanta qirukunata.+
37 Tawa wataña Salomon kamachichkaspanmi ziv sutiyuq killapi Jehova Diospa wasinpa cimientonta churachirqa.+
38 11 wataña Salomon kamachichkaspanmi bul sutiyuq pusaq kaq killapi Diospa wasinta ruwayta tukuchirqa. Tukuchirqaqa planoman hinam llapa imantinta.+ Qanchis watapim Diospa wasinta qispichirqa.
Willakuykuna
^ Qaway B15 kaq yachachikuyta.
^ Qaway B8 kaq yachachikuyta.
^ Utaq: “60 kuchus”. Qaway B14 kaq yachachikuyta.
^ Utaq: “20 kuchus”.
^ Utaq: “30 kuchus”.
^ Utaq: “20 kuchus”.
^ Utaq: “Chunka kuchus”.
^ Utaq: “Templopa”.
^ Utaq: “Suqta kuchus”.
^ Utaq: “Kaspikunata”.
^ Utaq: “Qanchis kuchus”.
^ Utaq: “Pichqa kuchus”.
^ Utaq: “Paña”.
^ Utaq: “Sur lawninpi”.
^ Utaq: “Pichqa kuchus”.
^ Utaq: “20 kuchusmi”.
^ Utaq: “40 kuchus”.
^ Hebreo rimaypiqa nichkan: “Dioswan pacto ruwasqanku baulta”, nispam.
^ Utaq: “20 kuchus”.
^ Utaq: “Chunka kuchus”.
^ Utaq: “Pichqa kuchus”.
^ Utaq: “Chunka kuchus”.
^ Utaq: “Chunka kuchusmi”.
^ Utaq: “Chunka kuchus”.
^ Hebreo rimaypiqa ichapas nichkan punkuta hapiq qirukuna chayna kasqanta utaq punkukunapa sayaynin chayna kasqanta.
