Ri ukabʼ carta xtaq bʼi chke ri aj Corinto 9:1-15

  • Chiyaʼ ri ikuchuj rukʼ ronojel iwanimaʼ (1-15)

    • «Ri Dios sibʼalaj utz kril ri winaq che ksipan rukʼ ronojel ranimaʼ» (7)

9  Rajawaxik taj kinbʼij bʼi chiwe ri kibʼan che kitoʼik ri qachalal. Rumal che qas wetaʼm che kiwaj kixtobʼanik. 2  Nubʼim chi chke ri qachalal re Macedonia che ri ix ri kixel pa Acaya jun junabʼ chik iweyeʼm kixtobʼanik. Y wariʼ ubʼanom chke ri e nikʼaj chik che xuqujeʼ kkaj kkiya ri kitobʼanik. 3  Pero keʼintaq bʼi ri qachalal iwukʼ rech kekilaʼ che qas tajin kimulij chi ri kuchuj, jeriʼ kilitajik che qastzij wi ri xinbʼij chiwij. 4  Rumal che we kebʼe ri macedonios wukʼ che iwilik y kkilo che qastzij ta ri nubʼim chiwij wariʼ kresaj nukʼixbʼal in y más na ri ix. 5  Rumal laʼ xeʼintaq bʼi ri qachalal rech kixkitoʼ che umulixik ri pwaq che ibʼim chik kiyaʼo, rech jeriʼ kiya ri nimalaj ikuchuj rukʼ ronojel iwanimaʼ y xa ta kixqataqchiʼj che ubʼanik. 6  Wariʼ kjunamataj rukʼ jun tikoʼn, are chiʼ kʼi ta ri katiko kʼi ta ri kayak uwach y are chiʼ más kʼi katiko más kʼi ri kayak uwach. 7  Chijujunal chisipaj ri kixkowin che uyaʼik, xa ta rukʼ kebʼ ikʼuʼx kiyaʼo, rumal che ri Dios sibʼalaj utz kril ri winaq che ksipan rukʼ ronojel ranimaʼ. 8  Ri Dios kukʼut na ri nimalaj rutzilal chiwach rech amaqʼel kʼo ri kajwataj chiwe. Xuqujeʼ kuya na ronojel ri kajwataj chiwe rech kibʼan ronojel uwach utzalaj taq chak. 9  (Are waʼ ri tzʼibʼam kanoq: «Ri areʼ sibʼalaj ksipanik; uyaʼom ri kajwataj chke ri e powr. Ri rutzilal kkʼis ta uwach». 10  Ri kyaʼow kʼi semilla che ri tikonel y ri kyaʼow ri ktijowik, xuqujeʼ kuya kʼi semilla chiwe ix che kuya kʼi uwach rech jeriʼ ri ix kixkowinik kibʼan más utzilal). 11  Ri Dios sibʼalaj ix utewchim rech kiya juntir ri kixkowinik kisipaj. Y ri winaq sibʼalaj kemaltyoxin riʼ che ri Dios, rumal che kqakʼam bʼi ri kiwaj kisipaj chke. 12  Rumal che wajun chak ri tajin kqabʼano xaq xiw ta kuya ri kajwataj chke ri qachalal, xaneʼ keʼutoʼo rech más kemaltyoxin che ri Dios. 13  Ri kuchuj che kiyaʼo kukʼutu che ri ix qas kixsipanik y rumal laʼ ri qachalal kkiya uqʼij ri Dios, xuqujeʼ kkiya uqʼij ri Dios rumal che ri ix qas kibʼan ri kubʼij ri utz taq noticias ri tajin kitzijoj chrij ri Cristo, rumal che e itoʼom ri areʼ y e nikʼaj chik. 14  Xuqujeʼ ri e areʼ kkikʼut na riʼ che kixkaj y kkibʼan orar riʼ piwiʼ, rumal che ri Dios ukʼutum ri nimalaj rutzilal chiwach. 15  Sibʼalaj kqamaltyoxij che ri Dios rumal ri xusipaj chqe ri kʼo ta kjunamataj rukʼ.

Notas

Copyrights for this publication