Ri ukabʼ carta xtaq bʼi chke ri aj Corinto 4:1-18
4 Ri Dios uyaʼom wajun chak riʼ chqe rumal che kutoqʼobʼisaj qawach, rumal laʼ maqayaʼ kan ubʼanik.
2 Qayaʼom chi kan ubʼanik ri kʼixbʼalalaj taq jastaq che kbʼan chkʼuyal* y keqabʼan ta engañar ri winaq, xuqujeʼ kqakʼex ta ri kubʼij ri Utzij ri Dios. Xaneʼ are kqakʼut ri qastzij chrij ri Dios y ri winaq qas ketaʼm che qas utz ri tajin kqabʼan chuwach ri Dios.
3 We ri utz taq noticias kqatzijoj chʼuqutal rukʼ jun atzʼyaq, xaq xiw chʼuqutal riʼ chkiwach ri winaq che ksachisax na kiwach,
4 ri kekojon ta chrij ri Cristo. Ri dios re taq we qʼij riʼ, usachom ri kichomanik ri winaq y uqʼatem ri u luz ri utzalaj taq noticias che kchʼaw chrij ri Cristo, rech ktunun ta pa kiwiʼ. Ri Cristo riʼ are ri kukʼut ri utzalaj taq ubʼantajik ri Dios chqawach.
5 Chqij ta oj kojtzijon wi xaneʼ chrij ri Jesucristo, kqatzijoj che are Qajaw xuqujeʼ kqatzijoj che ri oj kixqapatanij rumal che kqaloqʼoqʼej ri Jesús.
6 Ri Dios kubʼij wariʼ: «Chtunun bʼaʼ ri luz pa ri qʼequʼmal». Ri Dios qas oj utoʼom rech kqachʼobʼ uwach rumal ri Cristo, jetaneʼ kchupchut* jun luz chupalaj ri Cristo.
7 Yaʼom wajun chak riʼ chqe y wajun chak riʼ sibʼalaj nim ubʼanik, kojjunamataj rukʼ jun bʼoʼj che kʼolom jastaq nim ubʼanik chupam. Rech jeriʼ kqakʼutu che rukʼ ri Dios kpe wi ri qachuqʼabʼ ri kqakoj pa wajun chak, xaq ta rukʼ ri qachuqʼabʼ oj kqabʼano.
8 Paneʼ kqariq kʼi kʼax qas qetaʼm che kojel wi chupam; paneʼ jujun taq mul ksach qakʼuʼx pero kqariq wi ri kqabʼano;
9 paneʼ ri winaq kkibʼan kʼax chqe, pero ri Dios kojuwonobʼaʼ ta kanoq; paneʼ kojtzaqisaxik, pero kojkam taj.
10 Junam rukʼ ri Jesús, apawijeʼ taneʼ* ri kojbʼe wi amaqʼel xaq kebʼ kubʼij puwiʼ ri qakʼaslemal, wariʼ kukʼutu che kqariq kʼax oj junam rukʼ ri areʼ.
11 Pero rumal che oj u discípulos ri Jesús xaq kebʼ kubʼij puwiʼ ri qakʼaslemal ronojel taq qʼij, rech ri winaq kkilo che kqariq kʼax junam rukʼ ri Jesús.
12 Paneʼ xaq kebʼ kubʼij puwiʼ ri qakʼaslemal oj, pero kixutoʼ ix rech kiriq ri kʼaslemal.
13 Are waʼ ri tzʼibʼam kanoq: «Xinchʼawik rumal che nukubʼsam nukʼuʼx chrij ri Dios». Oj xuqujeʼ kojchʼawik rumal che kqakubʼsaj qakʼuʼx chrij ri Dios.
14 Ri xwalijisan ri Jesús chkixoʼl ri kaminaqibʼ xuqujeʼ kojuwalijisaj na oj y kojukʼam bʼik rech kojkʼojiʼ rukʼ ri Jesús.
15 Rumal iwech ix kqachʼij juntir ri kʼax, rech más e kʼi winaq kkil ri nimalaj rutzilal ri Dios y rukʼ wariʼ kemaltyoxin che y kkiya uqʼij.
16 Rumal laʼ, makʼistaj qakʼuʼx. Paneʼ tajin kojrijobʼik pero ronojel taq qʼij kqanaʼ pa qanimaʼ che xa kʼo chi más qachuqʼabʼ.
17 Ri kʼax che kqariq kamik xaq kokʼowik y kjunamataj ta rukʼ ri nimalaj tewchibʼal kqariq na y kkʼis ta uwach.
18 Kqariq waʼ we tewchibʼal rumal che are ta kbʼe qakʼuʼx chrij ri jastaq ri kilitajik, xaneʼ are kbʼe qakʼuʼx chrij ri jastaq ri kilitaj taj. Rumal che ri jastaq ri kilitajik xa ksach uwach, pero ri jastaq ri keʼilitaj taj ksach ta kiwach.
