Ri ukabʼ carta xtaq bʼi chke ri aj Corinto 1:1-24
1 In in Pablo, rumal ri utoqʼobʼ ri Dios in rapóstol ri Cristo Jesús, wach’il ri qachalal Timoteo kintaq b’i wajun carta ri’ chiwe ix, ri ix k’o pa ri congregación Corinto xuqujeʼ chke juntir ri qachalal che e k’o pa Acaya:
2 Kinbʼan orar piwiʼ rech ri Qatat Dios y ri Qajaw Jesucristo, kkikʼut ri nimalaj utzilal chiwe y kixkitoʼ rech kiriq jororibʼal.
3 Chqayaʼ b’a’ uqʼij ri Dios, ri Utat ri Qajaw Jesucristo, ri Qatat ri kutoqʼobʼisaj qawach y ri Dios ri kukubʼsaj qakʼuʼx.
4 Ri are’ kukubʼsaj qakʼuʼx are chi’ kqariq kʼax. Rumal laʼ ri oj xuqujeʼ kojkowinik kqakubʼsaj kikʼuʼx ri tajin kkiriq k’i uwach kʼax rukʼ ri kubʼsal kʼuʼx ri kuya ri Dios chqe oj.
5 Kqariq k’i kʼax rumal che oj u discípulo ri Cristo. Pero rumal ri xubʼan ri Cristo, ri Dios sibʼalaj kukubʼsaj qakʼuʼx.
6 We oj kqariq kʼax kojkowin riʼ kqakubʼsaj ik’u’x ix y kixuto’ ri’ rech kiriq ri salvación. Y we kkubʼsax qakʼuʼx oj, kojkowin riʼ kqakubʼsaj ikʼuʼx ix y wajun kubʼsal k’u’x ri’ kixutoʼ rech kichʼij ri kʼax. Ri kʼax che xuqujeʼ tajin kqariq oj.
7 Paneʼ kiriq ri kʼax che tajin kqariq oj pero qetaʼm che kichʼijo, xuqujeʼ kkubʼsax na ik’u’x junam qukʼ oj.
8 Qachalal kwaj kinbʼij chiwe ri xqakʼulmaj pa ri tinamit re Asia. Sibʼalaj nim ri kʼax xqariqo, xqanaʼo’ che k’o ta chi qachuqʼabʼ che uchʼijik y xaq kebʼ xubʼij pa qawiʼ.
9 Y xqachomaj che kojkamik, pero rukʼ ri xqakʼulmaj xqilo che utz taj kqakubʼsaj qakʼuʼx chqij oj, xaneʼ chrij ri Dios ri keʼukʼastajisaj ri kaminaqibʼ.
10 Ri are’ xojutoʼ chuwach ri kamikal y qetaʼm che we kqariq chi jumul kʼax kojuto’ chi jumul riʼ. Rumal la’ kqakubʼsaj qakʼuʼx che ri are’ amaqʼel kojuto’o.
11 Pero ri ix xuqujeʼ kixkowinik kojitoʼ are chi’ kibʼan orar pa qawiʼ. Rumal che we e k’i kkibʼan orar pa qawiʼ, ri Dios kutatabʼej ri’ ri ki oración y kojuto’ ri’. Rumal la’ e k’i ri’ kemaltyoxin che ri Dios che xojutoʼo.
12 Kojkikotik rumal che kʼo jun utz qa conciencia, kqabʼij wariʼ rumal che qakʼutum che chʼajchʼoj ri qakʼaslemal y kqabʼan juntir ri kubʼij ri Dios. Qakʼutum wariʼ chkiwach ri winaq pero más na chiwach ix. Man are ta kqabʼan ri kkikʼut ri winaq xaneʼ are kqabʼan ri utzil junam rukʼ ri Dios.
13 Qetaʼm che ri tajin kqatzʼibʼaj b’i chiwe kʼax ta usikʼixik y uchʼobʼik, rumal laʼ in qas wetaʼm che kixkowinik kichʼobʼ na ronojel.
14 In wetaʼm che ri ix kixkikot rumal ri tajin kqabʼano y ri oj xuqujeʼ kojkikot na rumal iwech ix pa ri uqʼij ri Qajaw Jesús.
15 Kwaj kinbʼe chi jumul* iwukʼ, rumal che wetaʼm che nim kixutoʼ wi, rumal laʼ xinchomaj nabʼe kinqʼax bʼi iwukʼ.
16 Are chiʼ xinbʼe pa Macedonia xwaj xinqʼax bʼi iwukʼ y are chiʼ xintzalij loq xuqujeʼ xwaj xinqʼax lo iwukʼ, jeriʼ kinijachaʼ kan jubʼiqʼ pa ri bʼe re Judea.
17 Are chiʼ xinbʼij che kinqʼax bʼi iwukʼ xaq ta aninaq xinchomaj ubʼanik, o ¿la xa kichomaj ix che kinbʼan molom tzij are chiʼ kinbʼij «jeʼ kinbʼek» tekʼuriʼ «kinbʼe taj»?
18 Kixkowinik qas kikoj ri kqabʼij chiwe junam rukʼ ri kibʼan che ukubʼsaxik ikʼuʼx chrij ri Dios, che xaq ta kinbʼij jeʼ kinbʼek tekʼuriʼ kinbʼe taj.
19 Rumal che ri Jesucristo ri Ukʼojol ri Dios, kubʼij ta jun jastaq tekʼuriʼ jun chi wi ri kubʼano, xaneʼ juntir ri ubʼim qas bʼantajinaq. Are waʼ ri xqatzijoj oj chiwe, ri in, ri Silvano* y ri Timoteo.
20 Rumal rech ri Jesús, ri Dios ubʼanom juntir ri ubʼim. Rumal laʼ pa ri ubʼiʼ kqabʼij amén are chiʼ kqabʼan qa oración y rukʼ waʼ kqaya uqʼij ri Dios.
21 Pero ri kbʼinik che ri ix y ri oj oj rech ri Cristo are ri Dios xuqujeʼ are ri areʼ xojchaʼowik.
22 Ri areʼ ukojom jun sello pa qanimaʼ, wajun sello riʼ are ri espíritu santo ri kukʼut chqawach che qastzij kubʼan na ri ubʼim.
23 Ri Dios retaʼm che xa kintoqʼobʼisaj iwach, rumal laʼ majaʼ kinbʼe iwukʼ pa Corinto.
24 Ri oj qetaʼm che utz ri iwachilanik rukʼ ri Dios, rumal laʼ xa ta kqabʼij chiwe jas ri kibʼan che upatanexik, xaneʼ kqaj che junam kojchakunik rech kixkikotik.
