Ri ukabʼ carta xtaq bʼi chke ri aj Corinto 5:1-21
5 Ri oj qetaʼm che wajun qa cuerpo riʼ, kjunamataj rukʼ jun ja ri kwulix na, pero ri Dios kuya na jun kʼakʼ qa cuerpo pa ri kaj ri kjunamataj rukʼ jun nimalaj ja che ksach ta uwach y are ta ri winaq e bʼanowinaq xaneʼ are ri Dios.
2 Kojbʼison rumal wajun cuerpo riʼ ri kjunamataj rukʼ jun ja, pero xaq qeyem chi ri kyaʼ na chqe pa ri kaj,
3 rech are chiʼ kyaʼ chqe, kʼo chi qachoch riʼ.*
4 Kojbʼisonik y kqariq kʼax pa wajun ja, pero kqaj taj kqesaj bʼi qibʼ chupam. Xaneʼ are kqaj kyaʼ ri jun kʼakʼ ja chqe pa ri kaj, rech kqaya kan wajun cuerpo y kyaʼ ri jun chqe ri kkam ta chik.
5 Y are ri Dios xojchaʼowik rech kqariq wajun kʼaslemal y xuya ri u espíritu chqe rech kukʼutu che qas kubʼan wi ri xubʼij.
6 Rumal laʼ, qas qetaʼm che ri Dios kubʼan na ri ubʼim chqe. Are chiʼ oj kʼo na pa wajun cuerpo riʼ, naj oj kʼo wi che ri Qajaw.
7 Rukʼ ri kqabʼan pa ri qakʼaslemal kqakʼutu che kqakubʼsaj qakʼuʼx chrij ri Dios, chrij ta ri jastaq che kilitajik.
8 Rumal laʼ kojkikotik y xaq qeyem chik kojbʼe rukʼ ri Qajaw, paneʼ rajawaxik kqaya kan wajun cuerpo riʼ.
9 Ri kqaj are che kqabʼan ri utz chuwach ri Qajaw, paneʼ oj kʼo rukʼ o naj oj kʼo wi che.
10 Qonojel kqʼat na tzij pa qawiʼ rumal ri Cristo,* rech chqajujunal kyaʼ na ri taqal chqe rumal ri xqabʼano we utz o utz taj, are chiʼ oj kʼo na pa wajun cuerpo.
11 Ri oj qetaʼm che rajawaxik nim kqil wi ri Qajaw Jesús, rumal laʼ kqakoj qachuqʼabʼ che kitijoxik ri winaq rech kkikoj ri qabʼim chke. Ri Dios qas retaʼm qawach y kqaj che ri ix xuqujeʼ qas kiwetaʼmaj qawach.
12 Xa ta kqaj kqabʼij chi jumul chiwe oj jachin ri oj, xaneʼ ri kqaj are che utz kixchʼaw chqij y kʼo kixkowinik kibʼij chke ri winaq ri kkibʼan nim che kibʼ rumal ri kʼo kukʼ y man are ta rumal ri kʼo pa kanimaʼ.
13 Weneʼ kichomaj che xa kojchoman taj, we xojchoman taj xa xojchoman ta riʼ rumal ri Dios, pero kojchomanik rumal laʼ kojkowinik kixqatoʼ.
14 Kqanimaj ri Cristo rumal che kojuloqʼoqʼej. Qas qetaʼm wariʼ: xa jun achi xkam pa qawiʼ qonojel y xubʼan wariʼ paneʼ jetaneʼ oj kaminaq chik.
15 Ri Jesucristo xkam pa qawiʼ qonojel rumal laʼ ri qakʼaslemal qech ta chi oj, xaneʼ rech chi ri xkam pa qawiʼ y ri xkʼastajisax chkixoʼl ri kaminaqibʼ.
16 Kamik kqaqʼat ta chi tzij pa kiwiʼ ri winaq rumal ri kibʼantajik. Y we je xqabʼan rukʼ ri Cristo nabʼe, kamik kqabʼan ta chik.
17 Ri oj ri oj rech ri Cristo jetaneʼ kojbʼan chi jumul rumal ri Dios rech kuya chi jun kʼakʼ qakʼaslemal. Ri ojer taq jastaq xeʼokʼowik, kamik e kʼo chi kʼakʼ taq jastaq.
18 Juntir ri jastaq rech ri Dios, y are ri areʼ xkojow ri Cristo rech kojutzir rukʼ. Tekʼuriʼ xuya wajun chak chqe rech keqatoʼ ri winaq rech xuqujeʼ keʼutzir rukʼ.
19 Paneʼ oj ajmakibʼ na, ri Dios xukoj ri Cristo rech juntir ri winaq keʼutzir rukʼ y kojukoj oj rech kqabʼij chke ri winaq che kekowinik keʼutzir rukʼ ri Dios.
20 Ri Dios oj utaqom bʼi pa ukʼexwach ri Cristo, rumal laʼ jetaneʼ are ri Dios kutaʼ toqʼobʼ* chke ri winaq rech keʼutzir rukʼ. Kojbʼe che ukʼexwach ri Cristo y kqabʼij chke: «Chixutzir rukʼ ri Dios».
21 Ri Jesús kʼo ta umak y ri Dios xukoj che utojik ri qamak, rech rumal ri areʼ kojux utz taq winaq chuwach.
