Ri ukabʼ carta xtaq bʼi chke ri aj Corinto 11:1-33
11 Paneʼ ri kinbʼij kukʼutu che jetaneʼ kʼo ta nunoʼj. Pero chkʼol na i paciencia wukʼ.
2 Rumal che qas kel nukʼuʼx chiwe junam rukʼ ri kubʼan ri Dios, y ix nujachom chi che kʼulanem rukʼ ri Cristo y kwaj kixinya che junam rukʼ jun qʼapoj ali.
3 Ri in kinbʼisoj iwach, kwaj taj kixbʼan engañar junam rukʼ ri xubʼan ri kumatz che ri Eva rumal che weneʼ kkʼex ri ichomanik, kiya kan unimaxik ri Cristo y kitzʼilobʼisaj ri ikʼaslemal y we kʼo jun chiwe kubʼan wariʼ taqal ta chi riʼ che ri Cristo.
4 Rukʼ ri tajin kikʼulmaj chanim riʼ, aninaq riʼ kikojo we kbʼix chiwe che kʼo chi jun Jesús che are ta ri xqatzijoj oj chiwe o kyaʼ chi jun espíritu chiwe che are ta ri xyaʼ chiwe nabʼe o ktzijox jun chi utz taq noticias chiwe che are ta ri xita nabʼe.
5 Knaʼtaj chwe che ri in ya xinqʼalajisaj chiwach che más nim nubʼanik chkiwach ri achijabʼ ri e kʼo chixoʼl ix che kkijaluj kibʼ che e «apóstoles».
6 Paneʼ ri in qas ta kinkowinik kinchʼawik pero kʼo kʼi wetaʼm. Y qakʼutum chi wariʼ chiwach pa ronojel ri kqabʼano y ri kqabʼij chiwe.
7 Ri in xinmachʼ wibʼ rech ri ix kiriq utzilal, xintzijoj ri utz taq noticias chiwe rukʼ ronojel wanimaʼ y kʼo ta pwaq xintaʼ chiwe, ¿la xa kichomaj che utz ta ri xinbʼano?
8 Rech xinkowinik xixintoʼ xinkʼam ri pwaq ri xkiya ri congregaciones chwe.
9 Are chiʼ xinkʼojiʼ iwukʼ paneʼ kʼo xajwataj chwe pero kʼo ta xintaʼ chiwe, rumal che are ri qachalal re Macedonia xeyoʼw juntir ri xajwataj chwe are chiʼ xeʼulik. Xinkoj nuchuqʼabʼ rech kʼo ta xintaʼ chiwe y kinya ta kan ubʼanik wariʼ.
10 Ri in kinbʼij ri qastzij junam rukʼ ri Cristo, rumal laʼ kʼo ta kinqʼatenik rech kintzijoj wariʼ pa ronojel Acaya.
11 ¿Jasche* kinbʼij wariʼ chiwe? ¿La xa kichomaj che kixwaj taj? Je taj, ri Dios retaʼm che qas kixwaj.
12 E jujun kkibʼan nim che kibʼ y kkibʼij che e apóstoles junam qukʼ oj pero ri in kinya ta kan ubʼanik ri tajin kinbʼano rech kekowin taj kkibʼan nim che kibʼ rumal che kejunamataj ta qukʼ oj.
13 Ri achijabʼ riʼ kekibʼan engañar e nikʼaj chik kkibʼij che e rapóstoles ri Cristo pero qastzij taj.
14 Y qas kinchʼobʼ wariʼ rumal che ri Satanás kubʼan che ribʼ che are jun utz ángel.
15 Rumal laʼ ri winaq ri e teren chrij kkijaluj kibʼ che e utz taq winaq, pero ksachisax na kiwach rumal ri chak kkibʼano.
16 Kwaj kinbʼij chi jumul chiwe che michomaj che kʼo ta nunoʼj. Pero we kichomaj che kʼo ta nunoʼj chkʼol bʼaʼ i paciencia wukʼ, rech ri in kinkowinik kinbʼan jubʼiqʼ nim che wibʼ.
17 Rumal laʼ kwaj kinchʼaw iwukʼ junam rukʼ ri kubʼan jun winaq kʼo ta unoʼj y junam ta rukʼ ri kubʼan ri Qajaw. Rumal che jun winaq ri kʼo ta unoʼj kukubʼsaj ukʼuʼx chbʼil ribʼ y kubʼan nim che ribʼ.
18 Rumal che ri winaq kkibʼan nim che kibʼ rumal ri kʼo kukʼ, ri in xuqujeʼ kinbʼan nim che wibʼ.
19 We ri ix kichomaj che kʼo inoʼj, ¿jas kʼu che kichʼij ri kkibʼan ri winaq chiwe ri kʼo ta kinoʼj?
20 Ri e areʼ ketaqan piwiʼ, kkitoqij y kkelaqʼaj ri jastaq iwe, kkibʼan nim che kibʼ chiwach y kkitzoqopij qʼabʼ chipalaj. Y ri ix xaq kiya bʼe chke.
21 Kʼixbʼal ri tajin kikʼulmaj rumal che kichomaj che oj kojkowin taj kqasukʼumaj ri jastaq.
Pero we ri winaq kekʼix taj are chiʼ kkibʼan nim che kibʼ, in xuqujeʼ kinkʼix taj kinbʼan nim che wibʼ paneʼ ri ix kichomaj che kʼo ta nunoʼj.
22 Ri areʼ kkibʼij che e hebreos, in xuqujeʼ in hebreo. Ri areʼ kkibʼij che israelitas, in xuqujeʼ in israelita. Ri areʼ kkibʼij che e petinaq pa ri u familia ri Abrahán, in xuqujeʼ in petinaq pa ri u familia ri Abrahán.
23 Ri areʼ kkibʼij che e rajchak ri Cristo pero ri in qas nukʼutum che qas in rajchak ri Cristo. Rumal che más in chakunaq chkiwach, kʼi mul in yaʼom pa cárcel, kʼi mul in chʼayom y kʼi mul xaq kebʼ ubʼim puwiʼ ri nukʼaslemal.
24 Cinco mul xinkichʼay ri judíos y chkijujunal ri cinco mul 39 mul xinkichʼayo.*
25 Oxibʼ mul xinchʼay rukʼ cheʼ, jumul xinbʼukʼ rukʼ abʼaj, oxibʼ mul xyojyobʼ ri barco chqaxeʼ y jun qʼij y jun aqʼabʼ xinkʼojiʼ kan puwiʼ ri mar.
26 Kʼi viajes nubʼanom, nuriqom kʼax puwiʼ taq ri jaʼ, nuriqom kʼax kumal ri elaqʼomabʼ, nuriqom kʼax kumal ri winaq re ri nutinamit, kumal ri winaq re nikʼaj chi tinamit, nuriqom kʼax pa taq ri tinamit, nuriqom kʼax pa ri desierto, nuriqom kʼax pa ri mar y nuriqom kʼax kumal ri winaq che kkibʼij che e qachalal.
27 Nubʼanom chak chi sibʼalaj kʼax ubʼanik y kosibʼal, kʼi taq mul xinkowin taj xinwarik, xinriq numik y chaqiʼj chiʼ, kʼi mul xinkowin taj xintij nuwa, xinnaʼ tew y jujun taq mul qas ta kʼo watzʼyaq xinkojo.
28 Y xaq xiw ta laʼ, xaneʼ xuqujeʼ ronojel taq qʼij kinchomaj ri kinbʼan che kitoʼik ri congregaciones.
29 We k’o jun rajawaxik ktoʼik, ¿la ma ta kel nukʼuʼx che? We kʼo jun kbʼan kʼax che, ¿la ma ta kpe woyowal?
30 We kinbʼan nim che wibʼ, xaq xiw kinbʼan nim che wibʼ rumal che kʼo ta nuchuqʼabʼ.
31 Ri Dios che are Utat ri Qajaw Jesús, ri taqal che amaqʼel kqaya uqʼij, qas retaʼm che qastzij wi ri kinbʼij chiwe.
32 Pa Damasco ri rey Aretas xutaq ri gobernador che nukʼalkʼobʼexik* pa ri tinamit rech kinchapik,
33 pero xinkiya bʼi pa jun chakach y xinkesaj lo pa ri ventana re ri tapya re ri tinamit, xa jeriʼ xinqaj ta pa ri uqʼabʼ.
