Ri ukabʼ carta xtaq bʼi chke ri aj Corinto 10:1-18
10 Ri in Pablo kwaj che qas kibʼan juntir ri kinbʼij chiwe, y kinbʼij wariʼ chiwe rukʼ utzilal y machʼachʼem junam rukʼ ri Cristo. Pero e jujun chiwe kkibʼij che are chiʼ in kʼo iwukʼ ko ta kixinchʼabʼej, are kʼu pa ri nu cartas ko kixinchʼabʼej y kinxiʼj ta wibʼ kinbʼan wariʼ.
2 Rumal laʼ are chiʼ kinopanik kwaj taj kenyajaʼ ri kechʼachʼat chqij, ri kkibʼij che kqabʼan qe ri kkibʼan ri winaq pero weneʼ rajawaxik kinbʼano.
3 Paneʼ oj winaq, pero kojchʼojin taj junam rukʼ ri kkibʼan ri winaq.
4 Ri armas ri kqakoj oj are ri Dios yaʼowinaq chqe, kjunamataj ta rukʼ ri kkikoj ri soldados. Rumal laʼ kkowinik kuwulij jastaq ri ko e takʼalik.
5 Rumal laʼ kojkowinik kqakʼex ri kichomanik ri winaq y kojtobʼanik rech kqasachisaj apachike uwach jastaq ri keqʼaten ri winaq che retaʼmaxik uwach ri Dios. Jetaneʼ keqatzʼapij pa cárcel ri itzel taq chomanik rech ri ix kixkowinik kixniman che ri Cristo.
6 Kʼateʼ kqakʼajisaj kiwach ri keniman taj are chiʼ ri ix ikʼutum chik che qas kixnimanik.
7 Ri ix kiqʼat tzij rumal ri kiwilo. We kʼo jun chiwe kuchomaj che rech ri Cristo, chnaʼtaj wariʼ che: xaq xiw ta ri areʼ rech ri Cristo xaneʼ xuqujeʼ ri oj.
8 Ri Qajaw xuya taqanik pa qaqʼabʼ rech kixqatoʼ che uriqik utzilal y xa ta kqabʼan kʼax chiwe. Rumal laʼ we kinbʼan jubʼiqʼ nim che wibʼ, man kʼixbʼal ta riʼ ri kinbʼano.
9 Kwaj taj kichomaj che xa tajin kixinxibʼij rukʼ ri kinbʼij bʼi chiwe pa ri nu cartas.
10 E jujun kkibʼij wariʼ: «Pa taq ri u cartas ko kojuchʼabʼej y kojuyajo pero are chiʼ kʼo qukʼ nim ta ubʼanik y ri kubʼij kʼo ta upatan».
11 Ri kebʼin wariʼ kwaj kinbʼij chke che ri kqabʼij pa taq ri qa cartas qastzij wi kqabʼano are chiʼ kojopanik.
12 Kqaj taj kqajunamaj qibʼ kukʼ ri kkichomaj che nim kibʼanik, ni kqabʼan qe ri kkibʼano. Chkiwach ri areʼ utz ri tajin kkibʼano rumal che xaq xiw kechoman chrij ri utz chkiwach e areʼ, pero wariʼ kukʼutu che xa kʼo ta kinoʼj.
13 Ri oj kqanimarisaj qibʼ pero xaq xiw kqanimarisaj qibʼ rumal ri xojkowin che ubʼanik pa ri uchak ri Dios y jun chke are ri xqabʼan che itoʼik ix.
14 Xaq ta oj xojchomanik xqatzijoj ri utzij ri Dios chiwe xaneʼ are ri areʼ xbʼin chqe y oj nabʼe xojtzijon ri utzalaj taq noticias chiwe chrij ri Cristo.
15 Tajin ta kqanimarisaj qibʼ che ri chak che xkibʼan ri e nikʼaj chik xaneʼ kqeyeʼj che ri ix knimar ri ikojonik chrij ri Dios y rukʼ wariʼ keʼitoʼ e nikʼaj chik, xa jeriʼ knimar más ri chak.
16 Rech kqanimarisaj ta qibʼ che ri chak tajin kbʼan chilaʼ, kojbʼe chi pa jun lugar che utzijoxik ri utz taq noticias.
17 «Utz taj che jun winaq kubʼan nim che ribʼ, xaq xiw chunimarisaj ribʼ rumal che retaʼm uwach ri Jehová».*
18 Are ta ri winaq kbʼinik che rajchak ri Jehová xaneʼ are ri areʼ kbʼinik jachin taqal che kux rajchak.
Notas
^ Chawilaʼ ri tema A5.
