Ri ukabʼ carta xtaq bʼi chke ri aj Corinto 2:1-17
-
Ri Pablo kraj che ri qachalal re Corinto kekikotik (1-4)
-
Rajawaxik kkuy umak ri kmakunik y kkʼulax chi jumul pa ri congregación (5-11)
-
Ri kubʼan ri Pablo pa Troas y pa Macedonia (12, 13)
-
«Ri oj u discípulos ri Cristo, kojjunamataj kukʼ soldados» (14-17)
-
Kqachʼak ta pwaq are chiʼ kqatzijoj ri utzij ri Dios (17)
-
2 Kwaj taj xa kinyak ibʼis are chiʼ kinopan chi jumul iwukʼ.
2 Y we kinyak ibʼis kʼo ta chi jun riʼ kkubʼsan nukʼuʼx in, rumal che iwonojel chi riʼ kixbʼisonik.
3 Ya xintzʼibʼaj bʼi ri kwaj in kinbʼij chiwe, rech are chiʼ kinopanik xa ta kinbʼison iwukʼ xaneʼ kinkikotik. Qas wetaʼm che ri kuya kikotemal chwe in xuqujeʼ kuya kikotemal chiwe ix.
4 Rukʼ oqʼej xintzʼibʼaj bʼi ri carta chiwe, rumal che sibʼalaj xinbʼisonik y xqʼoxow ri wanimaʼ. Pero xintzʼibʼaj ta bʼik rech kixbʼisonik xaneʼ rech kiwilo che sibʼalaj ix loqʼ chnuwach.
5 Y we kʼo jun winaq uyaʼom bʼis chqaxoʼl, xaq xiw ta in kinbʼisonik xaneʼ xuqujeʼ ix (pero kwaj ta chik kintzijon más chrij wariʼ).
6 Ri achi ri makunaq kʼajisam chi uwach, rumal laʼ mixutuj chik.
7 Rukʼ ronojel iwanimaʼ chikuyuʼ umak y chikubʼsaj ukʼuʼx rech kbʼison ta chi más rumal ri xubʼano.
8 Rumal laʼ kinbʼij chiwe che rajawaxik qas kikʼut chuwach che kiwaj.
9 Xuqujeʼ kintzʼibʼaj bʼi wariʼ chiwe, rech kwilo we qas kixnimanik.
10 We ix kikuy umak jun winaq, in xuqujeʼ kinkuy umak riʼ. Pero are chiʼ ri in kinkuy jun makaj kinbʼano rech ri ix kiriq utzilal y wariʼ qas retaʼm ri Cristo.
11 Rajawaxik kqabʼan wariʼ rech kojqaj ta pa uqʼabʼ ri Satanás rumal che qas qetaʼm ri kraj kubʼan chqe.
12 Are chiʼ xinopan pa Troas xwilo che qas rajawaxik ktzijox ri utzalaj taq noticias chrij ri Cristo chilaʼ,
13 pero rumal che xinriq ta ri qachalal Tito, xinel bʼi chilaʼ y xinbʼe pa Macedonia.
14 Kojmaltyoxin che ri Dios rumal che ukʼamom qabʼe oj, ri oj u discípulos ri Cristo, kojjunamataj kukʼ soldados ri kekikotik xetzalij lo pa jun chʼaʼoj rumal che xechʼakanik. Rumal qech oj tajin ktataj utzijol ri Dios pa ronojel taq lugar, kjunamataj rukʼ jun kʼokʼalaj perfume che kjabʼun kan ri ruxlabʼ.
15 Chuwach ri Dios, oj jetaneʼ jun perfume re ri Cristo, wajun perfume kkinaʼ ruxlabʼ ri kkiriq ri salvación xuqujeʼ ri ksachisax kiwach.
16 Ri ksachisax kiwach kkinaʼ ruxlabʼ kamikal, rumal che kekam na y ri kkiriq ri salvación kkinaʼ ruxlabʼ kʼaslemal, rumal che kekʼasiʼ na. ¿Y jachin yaʼtal che kubʼan wajun chak riʼ?
17 Oj yaʼtal chqe, rumal che kqachʼak ta pwaq are chiʼ kqabʼan wajun chak riʼ, oj junam ta kukʼ ri nikʼaj chik. Rumal che oj u discípulos ri Cristo, oj utaqom ri Dios che uqʼalajisaxik ri qastzij chrij.
