Ri ukabʼ carta xtaq bʼi chke ri aj Corinto 12:1-21
12 Rajawaxik kinbʼan nim che wibʼ paneʼ k’o ta kinchʼak che ubʼanik wariʼ. Kwaj kinbʼij chiwe chrij ri visiones ri xkʼut chnuwach y ri xuya ubʼixik ri Qajaw chwe.
2 Wetaʼm uwach jun u discípulo ri Cristo che 14 junabʼ kanoq xkʼam b’i pa ri tercer cielo pero wetaʼm taj we rukʼ ri u cuerpo xkʼam wi b’ik o rukʼ taj, xaq xiw ri Dios xetaʼmanik.
3 Qas wetaʼm uwach we achi ri’ ri xkʼam b’i pa ri paraíso. Pero wetaʼm taj we rukʼ ri u cuerpo xkʼam b’ik o rukʼ taj, xaq xiw ri Dios xetaʼmanik.
4 Are chiʼ kʼo pa ri paraíso xyaʼ ubʼixik tzij che chi yaʼtal ta ubʼixik.
5 Kinkikot rumal ri achi riʼ pero ri in xaq xiw kinkikotik rumal che kʼo ta nuchuqʼabʼ.
6 We kinbʼan nim che wibʼ xa ta rumal che in kon xaneʼ are la’ ri taqal chwe kinbʼano. Pero kinbʼan taj rech kbʼix ta chwe che kinbʼan nim che wibʼ rumal ri kinbʼano y ri kinbʼij.
7 Sibʼalaj mayibʼal ri jastaq che kʼutum chnuwach.
Rech kinbʼan ta nim che wibʼ xyaʼ jun k’ix pa ri nu cuerpo, jetaneʼ jun u ángel ri Satanás tajin kinuchʼay chinupalaj.
8 Oxmul xintaʼ che ri Qajaw che kresaj ri kʼix chwe.
9 Pero ri areʼ xubʼij chwe: «Sibʼalaj nim chi ri utzilal nukʼutum chawe, rumal che más kqʼalajin na ri nu poder are chiʼ ri winaq kʼo ta uchuqʼabʼ». Rumal laʼ ri in sibʼalaj kinkikotik che kʼo ta nuchuqʼabʼ rech kʼo ri u poder ri Cristo pa nuwiʼ junam rukʼ jun ja bʼanom che atzʼyaq.
10 Rumal che kinloqʼoqʼej ri Cristo sibʼalaj kinkikotik are chiʼ kʼo ta nuchuqʼabʼ, kinyoqʼik, kʼo ta ri kajwataj chwe, kbʼan kʼax chwe kumal ri winaq y kinriq chi nikʼaj kʼax. Rumal che are chiʼ kinnaʼo kʼo ta nuchuqʼabʼ, kyaʼ nuchuqʼabʼ.
11 Umak iwech ix junam kinchʼaw rukʼ jun winaq ri kʼo ta unoʼj. Pero we ta utz xixchʼaw chwij ma ta je waʼ kinchʼawik. Paneʼ nim ta nubʼanik pero más nim na nubʼanik chkiwach ri winaq ri e kʼo chixoʼl ix «ri kkijaluj kibʼ che apóstoles».
12 Xinkoj nuchuqʼabʼ rech xinkʼut chiwach che qas in apóstol, xinbʼan milagros, xinbʼan mayibʼal taq jastaq y xinbʼan nimaʼq taq chak.
13 ¿La kichomaj che xa más nim keʼinwil wi ri nikʼaj chi congregaciones chiwach ix? ¿La xa kʼax xinbʼan chiwe che xintaʼ ta ri itobʼanik? Chikuyuʼ numak we jewaʼ xinbʼano.
14 Are urox mul waʼ kwaj kinbʼe che iwilik y kwaj taj kinux jun eqaʼn chiwe. Are ta kintzukuj ri jastaq kʼo iwukʼ xaneʼ ix ri kwaj kixeʼinwilaʼ. ¿La ma ta rajawaxik che are ri tat nan kkikʼol jubʼiqʼ kirajil che kitoʼik ri kalkʼwal, man are ta ri alkʼwalaxelabʼ kkitoʼ ri kitat kinan?
15 In rukʼ ronojel wanimaʼ kinkoj ri nurajil y ri nuchuqʼabʼ che itoʼik. In sibʼalaj kixinloqʼoqʼej, ¿la ma ta taqal chwe che ix xuqujeʼ kiniloqʼoqʼej?
16 Apastaneʼ ri kichomaj, ri in kʼo ta xintaʼ chiwe. Paneʼ ix kibʼij che xa xintzukuj ri xinbʼano rech xixinbʼan engañar.
17 ¿La xa kichomaj che kʼo kwaj chiwe rumal laʼ xeʼintaq bʼi jujun qachalal iwukʼ?
18 Xintaʼ toqʼobʼ* che ri Tito rech kbʼe che isolixik y xintaq bʼi jun chi qachalal rukʼ, ¿la xa lo kʼo xutaʼ chiwe? ¿La ma ta xa junam ri chak xqabʼano? ¿La ma ta xa jun ri bʼe xqataqej?
19 Rukʼ ronojel ri qabʼim chi chiwe, ¿la kichomaj che xa tajin kqatoʼ qibʼ chiwach? Xa taj. Rumal che oj u discípulo ri Cristo kqabʼij ri qastzij y ri Dios retaʼm wariʼ. Qachalal, ronojel ri kqabʼano, kqabʼano rech kixqatoʼo.
20 Kinxiʼj wibʼ che are chiʼ kinopanik weneʼ kʼo yajoj ibʼ chixoʼl, kʼo titikil, kʼo oyowal, kʼo chʼaʼoj, kimol tzij chkij e nikʼaj chik, kiyoqʼ iwibʼ, kibʼan nimal y kitasalaʼ taq iwibʼ. Rumal che we jeriʼ tajin kibʼano are chiʼ kinopanik ko kixinchʼabʼej riʼ y weneʼ kʼax kinaʼo.
21 Y are chiʼ kinbʼe chi jumul iwukʼ weneʼ ri Dios kuya bʼe chwe kel nukʼixbʼal are chiʼ kwetaʼmaj che e kʼi chiwe iyaʼom ta kan ubʼanik ri tzʼilalaj taq jastaq, tzʼilalaj taq makaj* y ubʼanik kʼixbʼalalaj taq jastaq* y weneʼ rumal riʼ kinbʼisonik.
Notas
^ Pa nikʼaj chi lugar jewaʼ kbʼix che: «Xintaʼ utzil».
^ Pa griego kbʼix pornéia che. Chawilaʼ ri diccionario.
^ Pa griego kbʼix asélgueia che. Chawilaʼ ri diccionario.
