Ri ukabʼ carta xtaq bʼi chke ri aj Corinto 7:1-16
7 Loq’alaj taq qachalal, rumal che qas qetaʼm ri kraj ri Dios kuya na chqe, chqayaʼ kan ubʼanik juntir ri kutzʼilobʼisaj ri qa cuerpo y ri qachomanik. Y nim chqilaʼ wi ri Dios rech más kubʼan chʼajchʼoj ri qakʼaslemal chuwach.
2 Qachalal chojiloqʼoqʼej rukʼ ronojel iwanimaʼ. Ri oj kʼo ta kʼax qabʼanom che nijun winaq, man kʼo ta itzelal qabʼanom y nijun qabʼanom engañar.
3 Xqabʼij ta wariʼ chiwe rumal che kqaj kixqayajo xaneʼ rumal che sibʼalaj kixqaj. Y apas taneʼ ri kqakʼulmaj amaqʼel ix kʼo pa qanimaʼ.
4 Kinxiʼj ta wibʼ kinchʼaw iwukʼ. Sibʼalaj kinkikot iwumal xuqujeʼ ikubʼisam nukʼuʼx. Paneʼ tajin kinriq kʼax junam kukʼ ri qachalal pero sibʼalaj kinkikotik.
5 Are chiʼ xojopan pa Macedonia xa ta xqariq utzilal xaneʼ xqariq kʼi uwach kʼax: xbʼan kʼax chqe y ri in xinbʼisonik.
6 Ri Dios ri kukubʼsaj kikʼuʼx ri kebʼisonik, xukubʼsaj qakʼuʼx oj are chiʼ xpe ri Tito che qilik.
7 Y xaq xiw ta xukubʼsaj qakʼuʼx che xkʼojiʼ qukʼ xaneʼ xuqujeʼ xukubʼsaj qakʼuʼx ri xibʼij lo che. Sibʼalaj xinkikotik are chiʼ ri areʼ xubʼij chwe che kiwaj kiwil nuwach, kinibʼisoj y kixok il chwe.
8 Xinbʼisoj taj che xintzʼibʼaj bʼi ri carta chiwe. Xaq xiw xinbʼison jubʼiqʼ (are chiʼ xwilo che xixbʼison na jubʼiqʼ tiempo rumal ri kubʼij ri carta).
9 Chanim riʼ kinkikotik, pero xa ta rumal che xixbʼisonik xaneʼ rumal che xibʼan arrepentir iwibʼ. Xixbʼisonik rumal ri utz taj xibʼano y wariʼ kqaj chuwach ri Dios, rumal laʼ xa ta xqabʼan kʼax chiwe.
10 Ri bʼis ri kqaj chuwach ri Dios, are ri bʼis kqanaʼ rumal ri xqabʼano, rumal che wariʼ kojutoʼo rech kqabʼan arrepentir qibʼ y kqariq ri salvación rumal laʼ wajun bʼis kuya utzilal. Pero ri bʼis che kkinaʼ ri winaq xa kkʼaman bʼi pa ri kamikal.
11 Chixchomanampeʼ chrij ri xubʼan wajun bʼis pa ri ikʼaslemal, chʼajchʼoj chi ri ikʼaslemal, xixbʼison rumal ri utz taj xibʼano, nim chi kiwil ri Dios, xibʼan arrepentir iwibʼ, tajin chi kipatanij ri Dios rukʼ ronojel iwanimaʼ y xiya kan ubʼanik ri utz taj. Ronojel wariʼ kukʼutu che qas chʼajchʼoj chi ri ikʼaslemal.
12 Are chiʼ xintzʼibʼaj ri carta, xinbʼan taj rumal ri winaq ri xubʼan ri makaj, ni rumal ri xuriq kʼax. Xaneʼ xintzʼibʼaj rech ri ix qas kikʼut chkiwach ri qachalal y chuwach ri Dios che kiwaj kinimaj ri xqabʼij bʼi chiwe.
13 Rukʼ ri xibʼano sibʼalaj xikubʼsaj qakʼuʼx.
Pero xaq xiw ta xikubʼsaj qakʼuʼx xaneʼ xojkikotik are chiʼ xqilo che ri Tito xkikot rumal ri xibʼij lo che.
14 Ri in utz xinchʼaw chiwij chuwach ri Tito, y ronojel ri xqabʼij che ri areʼ xrilo che qastzij, rumal laʼ xel ta nukʼixbʼal.
15 Are chiʼ ri Tito knaʼtaj che chi ri ix sibʼalaj kixnimanik y nim xiwilo are chiʼ xopan iwukʼ kubʼan che chi más kixraj chik.
16 Wetaʼm che ri ix qas kibʼan ri utz, rumal laʼ qas kinkikotik.
