Ri ukabʼ carta xtaq bʼi chke ri aj Corinto 8:1-24
8 Qachalal, kamik riʼ are kqaj kqabʼij chi chiwe ri ubʼanom ri Dios che ukʼutik ri nimalaj rutzilal chke ri qachalal re Macedonia.
2 Paneʼ ri macedonios tajin kkiriq jun nimalaj kʼax y e powr, pero rukʼ ronojel kanimaʼ xetobʼanik, wariʼ xukʼutu che ri e areʼ sibʼalaj kesipanik.
3 Ri in qas xwilo che ri e areʼ xkiya ronojel ri xekowin che uyaʼik paneʼ e powr.
4 Xa ta xqabʼij chke che ketobʼanik, xaneʼ e areʼ xebʼin chqe che kkaj kekitoʼ ri qachalal che kʼo kajwataj chke.
5 Rukʼ ri utobʼanik ri Dios, ri e areʼ xkipatanij ri Qajaw rukʼ ronojel kanimaʼ, tekʼuriʼ xojkipatanij oj.
6 Rumal laʼ xqabʼij che ri Tito che kukʼis umulixik ri pwaq ri kiwaj kisipaj.
7 Chixsipan bʼaʼ rukʼ ronojel iwanimaʼ rumal che sibʼalaj ikubʼisam ikʼuʼx chrij ri Dios, qas kixnaʼw che tzijonem, nim ri iwetaʼmabʼal chrij ri Dios, qas kixchakunik y qas kixloqʼoqʼenik junam rukʼ ri qabʼanom oj iwukʼ ix.
8 Xa ta tajin kixintaqchiʼj che ubʼanik wariʼ, xaneʼ ri kwaj are che kiwetaʼmaj chrij ri kkibʼan ri nikʼaj chik y xuqujeʼ kikʼutu che qastzij kixloqʼoqʼenik.
9 Ri ix iwetaʼm chrij ri nimalaj rutzilal ri Qajaw Jesucristo, ri areʼ qʼinom* pero xubʼan powr umak iwech ix y ri ix ix qʼinom chik rumal ri u powrayil ri areʼ.
10 Kwaj kinbʼij chiwe ri kinchomaj. Rajawaxik kikʼis umulixik ri pwaq rumal che jun junabʼ chik imajim lo ubʼanik wariʼ. Ri ix ikʼutum che kiwaj kiya ri kuchuj rumal laʼ kinbʼij wariʼ chiwe rech kiriq utzilal.
11 Rumal laʼ chikʼisaʼ ri chak ri ximajij ubʼanik, y are chiʼ kiya ri kixkowin che uyaʼik kikʼutu che qastzij wi kiwaj kixtobʼanik.
12 Ri Dios sibʼalaj utz krilo are chiʼ jun winaq ksipan rukʼ ronojel ranimaʼ, rumal che ri Dios kraj che kqaya ri kʼo qukʼ y man are ta ri kʼo ta qukʼ.
13 Ri in xa ta kwaj che kibʼan kan powr rumal che keʼitoʼ ri e nikʼaj chik.
14 Ri kwaj are che iwonojel kʼo ri kajwataj chiwe: ri jastaq ri kʼo iwukʼ ix chiyaʼ nikʼaj chke ri kʼo ta ke y ri jastaq ri kʼo kukʼ ri e areʼ y kʼo ta iwukʼ ix chkiyaʼ nikʼaj chiwe, rukʼ wariʼ kitoʼlaʼ iwibʼ.
15 Junam rukʼ ri tzʼibʼam kanoq: «Ri winaq ri kʼi jastaq re kʼo ta xubʼan kan sobrar rukʼ y ri winaq ri kʼi ta jastaq re xuriq ronojel ri kajwataj che».
16 Kojmaltyoxin che ri Dios rumal che ri Tito sibʼalaj kel ukʼuʼx chiwe junam rukʼ ri kqabʼan oj.
17 Ri Tito kraj kbʼe iwukʼ pero xa ta rumal che xqabʼij che xaneʼ rukʼ ronojel ranimaʼ kraj kbʼe che iwilik.
18 Rukʼ ri Tito xuqujeʼ kqaj kqataq bʼi jun qachalal, wajun qachalal riʼ qas nim kil pa konojel taq ri congregaciones rumal che tajin ktobʼanik rech ketaʼmax ri utzalaj taq noticias.
19 Y xaq xiw ta kbʼe rukʼ ri Tito xaneʼ xuqujeʼ kbʼe qukʼ oj are chiʼ keqajachaʼ ri kuchuj ri ximulij, rumal che xchaʼ kumal ri congregaciones rech kbʼe qukʼ. Y rukʼ wajun tobʼanik riʼ kyaʼ uqʼij ri Qajaw, xuqujeʼ kqakʼutu che qastzij kqaj keqatoʼ ri e nikʼaj chik.
20 Jeriʼ kojyoqʼ taj y kqakʼutu che qastzij kqaj keqatoʼ ri e nikʼaj chik.
21 ‹Oj qas kqakoj qachuqʼabʼ che ukʼutik chuwach ri Jehová* y chkiwach ri winaq che kojelaqʼ taj›.
22 Xuqujeʼ kqataq bʼi jun chi qachalal kukʼ ri e areʼ, wajun qachalal riʼ qilom che qas kchakunik y más kchakun chi na riʼ chixoʼl rumal che retaʼm che kibʼan ri utz.
23 We kʼo jun chiwe kukubʼsaj ta ukʼuʼx chrij ri Tito kwaj kinbʼij chiwe che ri areʼ are jun utz wachiʼl y ktobʼanik rech ri ix kiriq utzilal. O we kʼo jun chiwe kukubʼsaj ta ukʼuʼx chkij ri kebʼe rukʼ xuqujeʼ kinbʼij chiwe che ri e areʼ e apóstoles re taq ri congregaciones y rumal ri kkibʼano kyaʼ uqʼij ri Cristo.
24 Rumal laʼ qas chikʼutuʼ che keʼiwaj ri qachalal ri keʼopan iwukʼ rech ri congregaciones kkilo che qastzij ri xqabʼij chiwij.
