Ri ukabʼ carta xtaq bʼi chke ri aj Corinto 3:1-18
3 ¿La rajawaxik kqabʼij chi jumul chiwe oj jachin ri oj? ¿La rajawaxik kqataq bʼi jun carta chiwe che kchʼaw chqij o kitaq lo jun chqe oj, junam rukʼ ri kkibʼan jujun winaq?
2 Ri ix kixjunamataj rukʼ jun carta che jetaneʼ pa ri qanimaʼ ix tzʼibʼam wi y juntir ri winaq ketaʼm ri kubʼij y kekowinik kkisikʼij.
3 Rumal che ri ix, ix u carta ri Cristo ri xqatzʼibʼaj oj. Pero rukʼ ta tinta xtzʼibʼax wi xaneʼ rukʼ ri u espíritu ri kʼaslik Dios, xuqujeʼ chuwach ta abʼaj xtzʼibʼax wi xaneʼ pa kanimaʼ winaq.
4 Rumal che ri Cristo kojutoʼo, qas kqakojo che ri Dios oj uchaʼom rech kqabʼan ri uchak.
5 Xaq ta qatukel oj xqachomaj ri kqabʼan che ubʼanik wajun chak xaneʼ are ri Dios ukʼutum chqawach ri kqabʼan che, rumal laʼ kojkowin taj kqabʼij che xaq rukʼ qachuqʼabʼ oj kqabʼano.
6 Ri Dios xukʼut chqawach ri xqabʼano rech xojok rajpatanel jun kʼakʼ pacto y xbʼan wajun pacto riʼ rumal ri espíritu santo rumal ta ri kubʼij ri Ley.* Rumal che ri Ley keʼukʼam bʼi ri winaq pa ri kamikal, pero ri espíritu santo kuya kʼaslemal.
7 Pero ri Ley ri keʼukʼam bʼi ri winaq pa kamikal, chuwach abʼaj xtzʼibʼax wi. Y are chiʼ xyaʼ che ri Moisés xchupchut* ri upalaj, rumal laʼ ri israelitas xekowin taj xekaʼy che, rumal che ri jun luz riʼ sibʼalaj kchupchutik. Pero wajun luz riʼ ksachisax na uwach.
8 Rumal laʼ we xchupchut ri luz are chiʼ xyaʼ ri Ley más kchupchut na riʼ are chiʼ kyaʼ ri espíritu santo.
9 We sibʼalaj xchupchut ri luz are chiʼ xyaʼ ri Ley ri keʼukʼam bʼi ri winaq pa kamikal más kchupchut riʼ are chiʼ ri Dios kubʼano che ri winaq keʼux utz chuwach.
10 Ri xchupchut nabʼe, xchupchut ta chik are chiʼ xpe ri jun ri más nim uchuqʼabʼ chuwach.
11 We kchupchut ri ksachisax uwach are chiʼ xyaʼik, más na kchupchut riʼ ri ksachisax ta uwach.
12 Qas kqakubʼsaj qakʼuʼx che ri Dios kubʼan na ri ubʼim chqe, rumal laʼ kqaxiʼj ta qibʼ kojchʼaw chrij wajun kubʼsal kʼuʼx riʼ.*
13 Y kqabʼan ta qe ri xubʼan ri Moisés are chiʼ xuchʼuq ri upalaj rukʼ jun atzʼyaq rech ri israelitas kkil ta ri kukʼulmaj na ri Ley ri ksach na uwach.
14 Ri israelitas riʼ kʼo ta kok pa kijolom. Y kʼa kamik riʼ kkichʼobʼ ta wi ri kraj kubʼij ri ojer pacto, rumal che chʼuqutal na kiwach rukʼ jun atzʼyaq, y xaq xiw rukʼ ri utobʼanik ri Cristo kel wajun atzʼyaq chkipalaj.
15 Xuqujeʼ kʼa chʼuqutal na ri kanimaʼ rukʼ jun atzʼyaq, rumal laʼ kkichʼobʼ ta ri xutzʼibʼaj kan ri Moisés.
16 Pero are chiʼ jun ktzalij rukʼ ri Jehová* kel ri atzʼyaq chupalaj.
17 Rumal che ri Jehová are jun Espíritu, y ri kʼo wi ri u espíritu ri Jehová kʼo ta keqʼaten ri winaq.
18 Oj juntir oj chʼuqutal ta chi ri qawach y kojjunamataj rukʼ jun espejo rumal laʼ kojkowinik kqakʼut ri jeʼlalaj taq ubʼantajik ri Jehová, y are chiʼ más kqakoj qachuqʼabʼ che ukʼexik ri qabʼantajik más kilitaj ri jeʼlalaj taq ubʼantajik ri Dios rukʼ ri kqabʼano, junam rukʼ ri kraj ri Jehová, ri areʼ are jun Espíritu.
Notas
^ Chawilaʼ ri diccionario.
^ Pa nikʼaj chi lugar jewaʼ kbʼix che: «xlaqʼpun», «xniklaj», «xrepan», «xtzʼuntzʼut».
^ O «kqaxiʼj ta qibʼ kojqebʼ rukʼ ri Dios».
^ Chawilaʼ ri tema A5.
