Ri ukabʼ carta xtaq bʼi chke ri aj Corinto 6:1-18
6 Ri oj rajchakibʼ ri Dios, kqaj kqabʼij chiwe che nim chiwilaʼ ri nimalaj rutzilal ri Dios y qas utz chibʼanaʼ che ukojik.
2 Rumal che ri Dios ubʼim kanoq: «Xatintatabʼej are chiʼ xopan ri tiempo che katintoʼo y xatintoʼo are chiʼ xopan ri tiempo re salvación». ¡Kamik are qʼij waʼ che ri Dios kojutoʼo! ¡Kamik are qʼij waʼ re ri salvación!
3 Kqabʼan ta nijun jastaq che kubʼan kʼax chke ri nikʼaj chik, rech kyoqʼ ta ri chak che tajin kqabʼan che ri Dios.
4 Kqakʼutu che oj rajchakibʼ ri Dios are chiʼ kqachʼij jalajoj uwach kʼax, paneʼ kʼo kqabʼisoj, paneʼ kʼo ta ri kajwataj chqe,
5 paneʼ kojchʼayik, paneʼ kojkʼam bʼi pa cárcel, paneʼ kewalij ri winaq chqij, paneʼ kyaʼ kʼaxalaj taq chak chqe, paneʼ kojwar ta chaqʼabʼ y paneʼ kʼo ta kqatijo.
6 Xuqujeʼ, kqakʼutu che oj rajchakibʼ ri Dios are chiʼ chʼajchʼoj ri qakʼaslemal, are chiʼ kqakʼutu che kqachʼobʼ uwach ri Dios, are chiʼ kʼo qa paciencia, are chiʼ oj utz taq winaq, are chiʼ kqaya bʼe che ri espíritu santo kukʼam qabʼe, are chiʼ qas kojloqʼoqʼenik y xa ta kebʼ qapalaj,*
7 are chiʼ kqabʼij ri qastzij, are chiʼ kqakubʼsaj qakʼuʼx chrij ri u poder ri Dios, are chiʼ kqatoʼ uwiʼ ri kqaj chuwach ri Dios jetaneʼ rukʼ jun qaqʼabʼ* kojchʼojinik y rukʼ ri jun chik* kqatoʼ qibʼ;
8 paneʼ kbʼixik che nim qaqʼij o nim ta qaqʼij, paneʼ utz kechʼaw ri winaq chqij o utz ta kechʼaw chqij. Paneʼ kbʼix chqe che oj bʼanal taq tzij pero ri oj are kqabʼij ri qastzij;
9 paneʼ etaʼmatal ta qawach kumal ri winaq pero etaʼmatal qawach rumal ri Dios, paneʼ kʼi mul xaq kebʼ xubʼij pa qawiʼ pero kamik kʼa oj kʼasal na, paneʼ ri winaq xkikʼajisaj qawach pero kamik oj kaminaq taj;
10 paneʼ ri winaq kkilo che kojbʼisonik pero oj amaqʼel kojkikotik; paneʼ kilitajik che oj powr pero xa e qatoʼom ri nikʼaj chik rech kkiriq qʼinomal;* paneʼ kilitajik che kʼo ta jastaq qe pero kʼo ronojel ri kajwataj chqe.
11 Loqʼalaj taq qachalal re Corinto sibʼalaj kixqaloqʼoqʼej, rumal laʼ xqabʼij chiwe ronojel ri kqanaʼo.
12 Ri oj rukʼ ronojel qanimaʼ kixqaj, pero ri ix qas ta rukʼ iwanimaʼ kojiwaj.
13 Rumal laʼ, chojiloqʼoqʼej junam rukʼ ri kqabʼan oj che iloqʼoqʼexik, xuqujeʼ cheʼiloqʼoqʼej ri nikʼaj chik. Kinbʼij wariʼ chiwe rumal che chnuwach in jetaneʼ ix walkʼwal.
14 Miwukʼaj iwibʼ chuxeʼ jun eqabʼal* kukʼ ri man kekojon ta chrij ri Cristo. Rumal che, ¿la kʼo lo ubʼanik ri itzelal rukʼ ri utzilal? ¿La kʼo lo ubʼanik ri saqil rukʼ ri qʼequʼmal?
15 Xuqujeʼ, ¿la kʼo lo ubʼanik ri Cristo rukʼ ri Belial?* ¿La kʼo lo ubʼanik ri winaq ri kkojon chrij ri Cristo rukʼ ri kkojon taj?
16 ¿La kʼo lo ubʼanik ri u templo ri Dios kukʼ ri e tyox? Rumal che ri oj oj u templo ri kʼaslik Dios. Junam rukʼ ri xubʼij kan ri Dios: «In kinkʼojiʼ na chkixoʼl, kinbʼin na kukʼ y kinux na ki Dios y e areʼ keʼux na nutinamit».
17 «Rumal laʼ chixel lo chkixoʼl y chitasaʼ iwibʼ chkij kchaʼ ri Jehová,* chiyaʼ kan uchapik ri tzʼil taq jastaq», «y ri in kixinkʼulaj na».
18 «‹Y ri in kinux na itat y ri ix kixux na walkʼwal›, kcha ri Jehová ri kʼo nimalaj Poder pa uqʼabʼ».
Notas
^ Pa nikʼaj chi lugar jewaʼ kbʼix che: «kebʼ qawach».
^ Ri derecha.
^ Ri izquierda.
^ Pa nikʼaj chi lugar jewaʼ kbʼix che: «bʼiʼomal».
^ O «yugo». Chawilaʼ ri diccionario.
^ Wajun bʼiʼaj riʼ petinaq pa hebreo che kraj kubʼij «kʼo ta upatan». Are jun chi bʼiʼaj che kkoj chrij ri Satanás.
^ Chawilaʼ ri tema A5.
