Ri ukabʼ carta xtaq bʼi chke ri aj Corinto 13:1-14

  • Ri pixabʼ xuya kan ri Pablo y ri kʼax kriqitajik we kniman ta jun (1-14)

    • «Miya kan rilik we qas utz ubʼanom ri iwachilanik rukʼ ri Dios» (5)

    • Chitoʼlaʼ iwibʼ y chubʼanaʼ jun ri ichomanik (11)

13  Are waʼ ri urox mul che kwaj kinbʼe che iwilik. «Rajawaxik e kʼo kebʼ o e oxibʼ testigos rech ketaʼmaxik we qastzij o qastzij ta ri xbʼixik». 2  Paneʼ xinkowin taj xinopan iwukʼ pa ri ukamul, pero ri xintzʼibʼaj bʼi chiwe xukʼutu che jetaneʼ xinopanik. Y kinbʼij chke ri e makunaq kan ojer xuqujeʼ chke ri e nikʼaj chik, we xepixbʼex taj keʼinpixbʼej wi na, kinbʼan wariʼ we kinkowinik kinopanik. 3  Rukʼ wariʼ kinkʼut chiwach che ri Cristo in ukojom che ukʼutik ri uchuqʼabʼ. Ri Cristo qastzij wi che kʼo nim uchuqʼabʼ. 4  Qetaʼm che xkamisax cho jun cheʼ* are chiʼ kʼa winaq na kʼo ta uchuqʼabʼ, pero kamik kʼaslik rumal ri u poder ri Dios. Y oj xuqujeʼ je qabʼanik junam rukʼ ri are’ nabʼe kanoq kʼo ta qachuqʼabʼ, pero kojkʼojiʼ na rukʼ ri areʼ rumal ri u poder ri Dios kʼo iwukʼ ix. 5  Miya kan rilik we qas utz ubʼanom ri iwachilanik rukʼ ri Dios. Miya kan uchomaxik ri qas ibʼantajik. ¿La xa knaʼtaj ta chiwe che ri Cristo kʼo iwukʼ ix? Kichʼobʼ ta riʼ che kʼo iwukʼ we xa kʼo ibʼanom. 6  Y kqaj kiwilo che kʼo ri utoqʼobʼ ri Dios qukʼ oj. 7  Kqabʼan orar piwiʼ rech kibʼan ta itzelal. Y kqabʼan ta wariʼ rech ri nikʼaj chik kkilo che kqabʼan ri utz chuwach ri Dios, xaneʼ ri kqaj are che ri ix kibʼan ri utzilal, paneʼ e jujun winaq kkichomaj che ri oj kʼo ta ri utoqʼobʼ ri Dios qukʼ. 8  Kuya taj kojwalij chrij ri qastzij che kuya ubʼixik ri Dios xaneʼ ri rajawaxik kqabʼano are che kqatoʼ uwiʼ. 9  Sibʼalaj kojkikotik che ri ix ko ix kʼolik paneʼ ri oj kʼo ta qachuqʼabʼ. Xqataʼ pa qa oración che ri ix kisukʼumaj ri ikʼaslemal. 10  Rumal laʼ xintzʼibʼaj bʼi wajun carta riʼ chiwe rech are chiʼ kinopan iwukʼ xa ta más kixinyajo y xa ta kinkoj ri taqanik ri uyaʼom ri Dios chwe rech kinbʼan kʼax chiwe xaneʼ rech kinya ichuqʼabʼ. 11  Rumal laʼ qachalal amaqʼel chixkikotoq, chisukʼumaj ri ikʼaslemal, chikʼamaʼ ri kubʼsal kʼuʼx kyaʼ chiwe, chubʼanaʼ jun ri ichomanik, chkʼol jamaril chixoʼl, rech jeriʼ ri Dios ri kloqʼoqʼenik y ri kuya jamaril kkʼojiʼ chixoʼl. 12  Chikʼutuʼ che kiwaj iwibʼ are chiʼ kiya rutzil iwach.* 13  Juntir ri qachalal ri e chaʼom kkitaq bʼi i saludos. 14  Chkʼol bʼaʼ ri nimalaj rutzilal ri Qajaw Jesucristo iwukʼ, ri uloqʼoqʼebʼal ri Dios y ri espíritu ri uyaʼom utzilal chiwe.

Notas

^ Chawilaʼ ri diccionario.
^ Pa ri idioma griego, «kitzʼumaj iwibʼ».

Copyrights for this publication