PHIÑAKUYTAQA tukuypis yachanchejpuni. Phiñakuy mana allinchu rijchʼawajtinchejpis, ñitʼikuna kasqanta yachashaspapis, wakin kutisqa runas mana allin kajwan pagawajtinchej, phiñarpakunchejpuni. Astawanpis kay Asociación Americana de Psicología nisqaqa, nin: “Runasqa phiñakuyta yachanchejpuni, chayqa mana onqochikunchu”, nispa.

Chay Asociación nisqanta apóstol Pabloj nisqanwan kikinchaspa, ichá phiñakuy allillan rijchʼawasunman. Pabloqa tukuypis phiñakusqanchejta yachaspa, kayta yuyaycharqa: “Phiñakuspaqa, ama juchallikuychejchu, nitaj inti yaykunankama phiñasqallapuni kaychejchu”, nispa (Efesios 4:26). Pablo nisqanman jina, ¿juchachu kanman phiñakuspa imatapis ruwarpallay? Chayrí, ¿kallpachakunachu tiyan phiñakuyninchejta thasnunapaj?

Apóstol Pablo chayta yuyaycharishaspa, ichá Salmo 4:4 versiculopi tʼukurisharqa, mayqenchus nin: “Manchachikuychej, amataj juchallikuychejñachu”, nispa. Apóstol Pablo, ¿phiñakuna kasqantachu nishanman karqa? Mana. Imajtinchus payllataj kayta yuyaycharqa: “Qankunamanta wijchʼuychej tukuy jaya sonqo kayta, phiñakuyta, rabiakuyta, qhaparqachayta, runaj contranta sajra parlakuyta, tukuy sajra yuyaytawan”, nispa (Efesios 4:31). Kay Asociación Americana de Psicología nillantaj phiñakuspa imatapis ruwarpareyqa, chʼampaykunallata astawan yapaykusqanta.

Phiñakusqanchejrayku chʼampaykunapi mana rikukunapaj, ¿imatá ruwasunman? Israelmanta rey Salomonqa nerqa: “Runaj yuyayniyoj kaynenqa phiñakuyninta thasnun; phiñakuyta qonqayman churasqanrayku payqa allimpaj qhawasqa”, nispa (Proverbios 19:11). Arí, allin yuyayniyoj kayqa, phiñakuyninchejta thasnunapaj yanapawasun.

Allin yuyayniyoj kayqa, sumajta tʼukurispa allinta qhawarikuy niyta munan. Chayrayku  allin yuyayniyoj kayqa, mana phiñakuyninchejwan atipachikunapaj yanapawasun.

Sutʼincharina pillapis mana allin kajta ruwashasqanta rikuspaqa, ichá mayta phiñakusunman. Chay phiñakuyninchejwan atipachikuspa imatapis ruwarpallasunman chayqa, sonqonchejta nanachisunman, jinallataj runa masinchejpatapis. Phiñakuspa imatapis ruwarpallasun chayqa, runaswan chejnichikusun, paykunawantaj mana allintachu kausakusun, astawanpis Diosmanta karunchakusunman. Chayrayku phiñakushasqanchejta reparaspaqa, niraj imata ruwashaspa allinta tʼukurina. Allin yuyaywan tʼukureyqa, phiñakuyninchejta nitʼiykukunanchejpaj yanapawasun.

Salomonpa tatan rey Davidqa, Nabalta wañuchimunman karqa, sichus uj warmi mana reparachinman karqa chayqa. Pay, kamachisnin ima, Judeaj chʼin pampanpi Nabalpa michejkunasninta yanaparqanku. Ovejaspa millmanta ruthuna tiempo chayamojtintaj, Davidqa Nabalmanta mikhunata mañakorqa. Nabaltajrí nerqa: “Ovejasta ruthojkunaypaj wakichisqa kashan chay mikhunasmantachu, [...] qoyman kasqa mana rejsisqa maymantachus runasman?”, nispa. Nabalpa nisqanqa Davidta mayta phiñacherqa. Chayrayku 400 runasta pusariykukuspa Nabalta familiantawan wañuchimunanpaj risharqa (1 Samuel 25:4-13).

Nabalpa warmin Abigailqa chayta yachaytawankama usqhayllata Davidta taripamoj rerqa, qonqorikuspataj nerqa: “Mañarikuyki parlarejta saqenawaykita, nisqasniytataj uyarinawaykita”, nispa. Chantá qosan mana allin yuyayllawan parlarpasqanrayku, perdonananta mañakorqa. Nillarqataj chay sajrata ruwajtenqa aswan qhepaman sonqonta nanachikunanta (1 Samuel 25:24-31).

Abigailqa nisqasninwan Davidta reparacherqa, chay chʼampayta allinchananpaj. Davidqa repararqa Nabal tukuywan wampupuni kasqanta, manataj payllawanchu. Reparallarqataj Nabalta wañuchispaqa, runa wañuchiman tukupunanta. David jina mayta phiñakusunman chayqa, ¿imatá ruwana tiyan? Kay Clínica Mayo nisqaqa phiñakuyninchejta ñitʼikunapaj kayta ruwananchejta nin: “Niraj imata ruwashaspa, jatunmanta samarispa chunkakama yupay”, nispa. Arí, allintaraj tʼukurina imaraykuchus chay chʼampay rikhurisqanta, chantá ima llakiykunapichus rikhurichinawanchejpi ima. Allin yuyayniyoj kaywan yanapachikuna phiñakuyninchejta thasnunapaj, sonqonchejtataj tiyaykuchinapaj (1 Samuel 25:32-35).

Kunanpis ashkha runas, David jina yanapata japʼillankutaj. Sebastianqa Polonia suyu carcelpi, 23 watayoj kashaspa Bibliamanta yachakorqa, chaytaj phiñakuyninta ñitʼinanpaj yanaparqa. Pay nin: “Ñaupajtaqa chʼampayniypi sumajta tʼukurini, chantá Biblia yuyaychasqanman jina ruwanaypaj kallpachakuni. Bibliaqa sumajtapuni yanapawan”, nispa.

Setsuopis Sebastian jinallataj ruwan. Pay nin: “Unayqa llankʼaj masisniy rabiachiwajtinku qhapariykojpacha kani. Kunanrí Diospa Palabranmanta yachakuytawanqa, kayta tapurikuyta yachani: ‘¿Pitaj juchayoj? ¿Noqallatajchu juchayoj kani?’”, nispa. Ajinata tapurikuspa Setsuoqa, phiñakuyninta thasnuyta yachan.

Phiñakuyninchej atipanawanchejpaj jina kajtinpis, Bibliaj yuyaychaykunasnin sonqonchejta tiyaykuchiyta atin. Chayman jina ruwaspa, Diospa yanapayninta mañakuspa ima, sonqo tiyasqa kausakunapaj, allin yuyayta tarisunchej.