KAY 1931 watapi, Parispi sala de conciertos Pleyel nisqa runamanta juntʼa kasharqa. Chay lugarmanqa 23 suyusmanta sumaj pʼachallisqa runas taxispi chayamorqanku, 3.000 runas jinataj kasharqanku. Chay runasqa mana conciertopi takejkunata uyarejchu jamorqanku, manaqa hermano Joseph Rutherfordpa umallirichiyninta. Chaypacha chay hermanoqa Reinomanta willayta ñaupajman apasharqa. Umallirichiynintataj uyarejkunapaj francesman, alemanman, polacoman tijracherqanku. Hermano Rutherfordpa parlaynenqa may sinchʼi karqa.

París llajtapi jatun tantakuy ruwakusqanqa Franciapi Reinomanta willakunanpaj may allin karqa. Hermano Rutherfordqa uyarejkunata, astawantaj jovenesta Franciapi precursores jina llankʼanankuta nerqa. Inglaterramanta John Cooke sutiyoj jovenqa, chay hermanoj nisqanta mana qonqarqachu. Hermano Rutherford nerqa: “Jóvenes precursor kanaykichejta, ni ima jarkʼasunaykichejta saqeychejchu”, nispa. *

Hermano Rutherfordpa umallirichiyninta ashkhas japʼikorqanku, chaykunamanta ujnin John Cooke karqa, payqa aswan qhepaman misionero karqa (Hech. 16:9, 10). Chantapis Franciapeqa 1930 watapi 27 precursoreslla karqanku, 1931 watapajtaj 104 precursoresña karqanku. Uj watallapi mayta yapakorqanku. Chay precursoresmanta ashkhas mana francesta parlajchu kanku, ¿imaynatá francesta parlayta, pisillawan kausakuyta, karupi kayta ima atinkuman karqa?

Waj suyumanta kaj precursoresqa willayniyoj papelitoswan willaj kanku. Alemanta parlaj uj hermano, mana manchikuspa Parispi willasqanmanta yuyarikun, nintaj: “Willashajtiyku sonqoykoqa llojserqamunayaj, mana runata manchachikusqaykuraykuchu, nitaj Jehovaj atiyninmanta iskayrayasqaykuraykuchu. Manaqa yachakusharqayku chay qallupi ‘¿Kay willayniyoj papelitota leeriwajchu?’ nispa runasman ninaykuta qonqakapunaykumanta manchachikusqaykurayku. Yacharqaykutaj runasman willamunayku may sumajpuni kasqanta”, nispa.

Edificiosman runasman willaj rejtinku porterosqa wijchʼumoj kanku. Uj pʼunchay Inglaterramanta iskay hermanas sajra porterowan tinkorqanku, chay hermanasqa pisillata francesta parlaj kanku. Portero “¿pitataj maskʼashankichej?”, nispa tapojtin, ujnin hermanaqa wasi punkupi timbreta ñitʼiykamuychej nisqa letrerota rikuspa,  wasiyojpa sutin kasqanta yuyaspataj asirispa nerqa: “‘Timbreta ñitʼiykamuychej’ nisqa sutiyoj señorata maskʼashayku”, nispa. Ajinata ruwasqankutaj willayninkupi allin rinanpaj yanaparqa.

Kay 1930 watapi Franciapi kausay mana allinchu kasqanrayku ashkha franceses mayta ñakʼarerqanku, waj suyusmanta chay suyupi tiyakoj precursorespis. Inglaterramanta Monica Brzoska sutiyoj hermana, imaynatachus uj precursorawan kausakusqankumanta jinata nin: “Tiyakorqayku chay cuartospeqa mana calefacción kajchu. Chiri tiempopeqa manchay qhasa kaj, sapa paqarintaj chhullunkata pʼakispa mayllakoj kayku”, nispa. Ajinapi rikukuspapis paykunaqa chay suyupi precursores jinallapuni llankʼarqanku. Paykunamanta ujnintaj nin: “Pisillawan kausakuspapis, ni ima pisiwarqaykuchu”, nispa (Mat. 6:33).

Chantapis chay precursoresqa, familiankumanta karupi kaspapis, sonqo kʼajaywan llankʼallarqankupuni. Kay 1930 wata qallariypaj, Franciapi 700 willajkuna jinalla karqanku, tukuynejpitaj kasharqanku. ¿Imaynatá chay precursores kusisqallapuni karqanku? Monica, paywan khuska tiyakoj precursora ajinapi rikukorqanku. Monica nin: “Familiaykumanta karupi kasqaykurayku mana sapayakunaykupaj mayta kallpachakunayku karqa, chayrayku publicacionesta khuska ukhunchaj kayku. Chay tiempopi revisitasta mana ruwakojchu kasqanrayku, yachachej mana kutisqaykurayku ima, tutasnin tiempoyoj karqayku familiaykuman, waj precursoresman ima carta qhelqanaykupaj, ajinamanta purajmanta kallpachanakunaykupaj”, nispa (1 Tes. 5:11).

Chay precursoresqa chʼampaykunapi kaspapis mayta llankʼallarqankupuni. Jina kasqantaj rikukun Franciapi precursores jina llankʼasqankumanta ashkha watasninman sucursalman cartasta apachisqankupi. Chantá 1931 watamanta, 1935 watakama uj ajllasqa hermana Annie Cregeen sutiyoj, qosanwan khuska Francia suyuntinman rerqanku willanankupaj, pay nerqa: “Mayta kusikorqayku. Chantapis may ujchasqas karqayku. Apóstol Pablo nerqa jina ‘noqa plantarqani, Apolostaj qarparqa, Diostajrí wiñacherqa’, Pabloj nisqan juntʼakusqanta rikorqayku”, nispa (1 Cor. 3:6).

Chay hermanosmantaqa, precursores kayta munajkuna mayta yachakunkuman. Franciapi 14.000 precursores regulares tiyan. Chay precursoresmanta ashkhastaj waj parlaykunamanta qotuchakuykunapi chayri qotituspi llankʼashanku. * Nitaj ni ima, llankʼayninkuta sayachinchu. (Franciapi waqaychakusqanmanta.)