Bai na kontenido

Dikon Hesus Ta Ser Yamá Yu di Dios?

Dikon Hesus Ta Ser Yamá Yu di Dios?

Loke Beibel ta bisa

 Hopi biaha, Beibel ta yama Hesus “Yu di Dios.” (Huan 1:49) E ekspreshon “Yu di Dios” ta duna di komprondé ku Dios ta Kreador, òf Fuente, di tur bida, inkluso bida di Hesus. (Salmo 36:9; Revelashon 4:11) Beibel no ta bisa ku Dios ta un tata den sentido ku e por konsebí yu meskos ku hende ta hasi.

 Beibel ta yama e angelnan “e yu hòmbernan di Dios.” (Yòb 1:6) Ademas, Beibel ta bisa ku e promé hende, Adam, tabata un “yu di Dios.” (Lukas 3:38) Sinembargo, Beibel ta yama Hesus e Yu di mas importante di Dios pa motibu ku Hesus tabata e promé kreashon di Dios i e úniko persona ku Dios a krea direktamente.

 Hesus a biba den shelu promé ku el a nase riba tera?

 Sí. Hesus tabata un angel den shelu promé ku el a nase komo hende riba tera. Hesus mes a bisa: ‘Mi a baha for di shelu.’—Huan 6:38; 8:23.

 Dios a krea Hesus promé ku el a krea tur otro kos. Beibel ta bisa tokante Hesus:

 Hesus a kumpli ku e profesia tokante esun ku “su orígen ta for di hopi tempu pasá, for di e dianan di eternidat.”—Mikéas 5:2; Mateo 2:4-6.

 Kiko Hesus tabata hasi den shelu promé ku el a bini na tera?

 E tabatin un puesto haltu den shelu. Hesus a referí na e puesto ei ora el a resa: “Tata, duna mi gloria . . . e mesun gloria ku mi tabatin banda di bo promé ku mundu a eksistí.”—Huan 17:5.

 El a yuda su Tata krea tur otro kos. Hesus a traha huntu ku Dios “manera un trahadó eksperto.” (Proverbionan 8:30) Beibel ta bisa tokante Hesus: “Pa medio di dje tur otro kos a ser kreá, tantu den shelu komo riba tera.”—Kolosensenan 1:16.

 Dios a krea tur otro kos pa medio di Hesus, for di e angelnan te na e universo. (Revelashon 5:11) Den un sentido, nos por kompará e kooperashon entre Dios i Hesus ku e kooperashon ku tin entre un arkitekto i un kontratista. E arkitekto ta diseñá e edifisio, i e kontratista ta usa e diseño pa konstruí e edifisio.

 E tabata e Palabra. Ora ta referí na Hesus promé ku el a bini na tera, Beibel ta yam’é “e Palabra.” (Huan 1:1) Esei ke men ku Dios a usa su Yu pa transmití informashon i instrukshon na e otro angelnan.

 Ta parse tambe ku Hesus a sirbi komo e bosero di Dios pa hende aki riba tera. Probablemente, Dios a papia pa medio di Hesus, esta, e Palabra, ora el a duna instrukshon na Adam ku Eva den e hòfi di Eden. (Génesis 2:16, 17) Kisas Hesus tabata e angel ku a guia e israelitanan di antigwedat den desierto i kende su stèm e israelitanan mester a obedesé estriktamente.—Éksodo 23:20-23. *

^ par. 12 E Palabra no ta e úniko angel ku Dios a usa pa papia ku hende. Por ehèmpel, Dios a usa otro angel, fuera di su promé yu, pa duna e israelitanan su Lei.—Echonan 7:53; Galationan 3:19; Hebreonan 2:2, 3.