Bai na kontenido

Bai na kontenido

 Siña Konosé e Palabra di Dios

Kiko Lo Sosodé Riba e Dia di Huisio?

Kiko Lo Sosodé Riba e Dia di Huisio?

E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Kiko e Dia di Huisio ta enserá?

Manera e eskultura na man drechi ta mustra, hopi hende ta kere ku riba e Dia di Huisio, míles di miónes di alma lo ser reuní dilanti di e trono di Dios pa ser husgá di akuerdo ku nan echonan: Esnan ku a biba bon lo bai shelu, miéntras ku esnan ku a biba malu lo ser tormentá den fièrnu. Pero Beibel ta mustra ku e propósito di e Dia di Huisio ta pa kaba ku tur inhustisia. (Salmo 96:13) Sí, Dios a nombra Hesus komo e Hues ku lo trese berdadero hustisia rònt mundu.—Lesa Isaías 11:1-5; Echonan 17:31.

2. Kon e Dia di Huisio lo trese berdadero hustisia?

Debí ku e promé hòmber, Adam, a rebeldiá deliberadamente kontra Dios, tur su desendientenan ta nase ku piká i por haña nan ku sufrimentu i morto. (Romanonan 5:12) Pa korigí e daño ku e inhustisia ei a kousa, Hesus lo resusitá míles i miónes di hende for di morto. E buki di Revelashon ta mustra ku esaki lo tuma lugá durante Kristu su reinando di mil aña.—Lesa Revelashon 20:4, 11, 12.

Esnan ku resusitá lo no ser husgá a base di e kosnan ku nan a hasi promé ku nan a muri. Nan lo ser husgá a base di e manera ku nan a hiba nan bida despues di a siña for di e “bukinan” ku Revelashon kapítulo 20 ta papia di dje. (Romanonan 6:7) Anto apòstel Pablo a bisa ku “tantu hende hustu komo inhustu” lo ser resusitá i haña oportunidat di siña tokante Yehova.—Lesa Echonan 24:15.

 3. Kiko e Dia di Huisio lo logra?

Hende ku a muri sin nunka haña chèns di siña konosé Yehova i sirbié lo haña e oportunidat di kambia i hasi loke ta bon. Anto si nan hasi loke ta bon, nan resurekshon lo ta “un resurekshon di bida.” Pero algun hende ku haña resurekshon lo nenga di obedesé Yehova; nan resurekshon lo ta “un resurekshon di huisio.”—Lesa Huan 5:28, 29; Isaías 26:10; 65:20.

Na final di e Dia di Huisio, ku lo dura mil aña, humanidat obediente lo ta perfekto, manera tabata e kaso na prinsipio. (1 Korintionan 15:24-28) Ki un futuro maravioso ta spera hende obediente! Pa e último prueba, Yehova lo saka Satanas e Diabel for di abismo, kaminda e tabata enkarselá pa mil aña. Satanas lo bolbe hasi un intento pa pone hende bira infiel na Yehova. Pero esnan ku resistí Satanas lo disfrutá di bida riba tera pa semper.—Lesa Isaías 25:8; Revelashon 20:7-9.

4. Kua otro dia di huisio lo benefisiá humanidat?

Beibel ta usa e ekspreshon “dia di huisio” pa referí tambe na e destrukshon ku lo pone un fin na e mundu malbado akí. E dia di huisio akí lo bini diripiente, meskos ku e Diluvio den tempu di Noe ku a kaba ku henter un generashon malbado. Pero nos por ta masha kontentu pasobra e ‘destrukshon akí di hende malbado,’ ku lo bini sigur, lo habri kaminda pa un sosiedat nobo di hende den kua “hustisia lo biba.”—Lesa 2 Pedro 3:6, 7, 13.