Bai na kontenido

Bai na kontenido

 Siña Konosé e Palabra di Dios

Dios Lo Perkurá Ún Gobièrnu pa Goberná Henter Mundu?

Dios Lo Perkurá Ún Gobièrnu pa Goberná Henter Mundu?

E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Dikon humanidat mester di ún gobièrnu pa goberná henter mundu?

Hopi di e problemanan ku tin awe ta afektá hende rònt mundu. Den algun pais, mayoria di hende ta pober i ta ser oprimí. Den otro paisnan, ta parse ku hopi hende tin mas di loke nan tin mester. Pues, ta un institushon mundial so lo por atministrá i distribuí e rekursonan di tera na un manera hustu i balansá.—Lesa Eklesiástes 4:1; 8:9.

2. Ken Dios por konfia ku e gobernashon di henter mundu?

Hopi hende no ta kere den e idea di un solo gobernante pa henter mundu pasobra no tin niun hòmber ni muhé ku lo por hasi e trabou ei bon. Ademas, no tin niun persona na mundu ku lo kai na agrado di tur hende. Akaso tin hende imperfekto ku lo por goberná sin ku poder influensi’é òf hasié korupto? E solo idea ku un tirano lo por goberná mundu ta duna hende miedu.—Lesa Proverbionan 29:2; Yeremías 10:23.

Yehova Dios a skohe su Yu, Hesukristu, pa goberná humanidat pa semper. (Lukas 1:32, 33) Hesus a biba riba tera, pues e sa kiko hende ta pasa aden. Ora e tabata na tera, el a kura hende malu, siña hende humilde i dediká tempu na mucha. (Marko 1:40-42; 6:34; 10:13-16) Pues, Hesus ta e Gobernante ideal.—Lesa Huan 1:14.

 3. E idea di un gobièrnu mundial ta algu realístiko?

Dios a skohe su Yu pa goberná tera desde shelu. (Daniel 7:13, 14) Sí, meskos ku un gobernante humano no mester ta presente den tur stat ku e ta goberná, Hesus no mester ta na tera pa e por goberná humanidat.—Lesa Mateo 8:5-9, 13.

Awor, ta tur hende lo aseptá Hesus komo nan Gobernante? Nò. Solamente esnan ku ta stima loke ta bon lo asept’é. I esnan ku rechasá e Gobernante hustu i amoroso ku Yehova a skohe lo ser destruí.—Lesa Mateo 25:31-33, 46.

4. Kiko e Gobernante di mundu lo logra?

Meskos ku un wardadó di karné ta reuní su karnénan, Hesus ta reuniendo hende humilde prosedente di tur nashon i ta siña nan tokante nos amoroso Dios. (Huan 10:16; 13:34) E hendenan akí ta apoyá Hesus i su gobièrnu fielmente. (Salmo 72:8; Mateo 4:19, 20) Rònt mundu Hesus su fiel siguidónan ta proklamá unánimamente ku Hesus ta Rei.—Lesa Mateo 24:14.

Pronto, Hesus lo dal paso desisivo pa libra humanidat di gobernashon korupto. El a skohe algun siguidó fiel di dje pa reina huntu kuné den shelu. (Daniel 2:44; 7:27) Bou di Hesus su gobernashon, tera lo ta yen di konosementu di Yehova i nos planeta lo bira un paradeis, manera tabata e kaso na prinsipio di humanidat.—Lesa Isaías 11:3, 9; Mateo 19:28.