Con Algun Hende A Haya Contesta

MIYONES di hende ta haci oracion. Tin di nan ta combenci cu nan oracion ta wordo contesta. Otronan ta puntra nan mes si nan oracion ta wordo scucha mes. Y fuera di esei, tin hende cu ta busca contesta pero nan no a pensa riba e posibilidad di haci nan peticionnan na Dios mediante oracion.

Bijbel ta identifica e Dios berdadero como Esun “cu ta scucha oracion.” (Salmo 65:2) Si bo ta un hende cu ta resa, bo ta sigur cu bo oracionnan ta wordo dirigi na e Dios berdadero? Nan ta e tipo di oracion cu lo E contesta?

Pa hopi hende rond mundo, e contesta a resulta di ta si! Con nan a haya contesta? Kico nan a siña?

Ken Dios Ta?

Un maestra di scol na Portugal, cu a ser educa door di soeur y frère, tawata practica su religion cu sinseridad. Pero ora iglesia a cambia y stop cu practicanan cu segun su educacion tawata importante, el a keda tur confundi. Door cu el a biaha, el a sera conoci cu religionnan di Lehano Oriente, y el a cuminsa puntra su mes si di berdad tin un solo Dios berdadero. Con e mester ador’e? Ora el a puntra su pasto tocante cosnan den Bijbel, su preguntanan a ser ignora, y el a keda decepciona.

Den e stad caminda e maestra aki tawata biba, iglesia catolico a circula un panfleta spiertando parokianonan pa no combersa cu Testigonan di Yehova. Pero el a keda cu su preguntanan. Un dia cu e Testigonan a yama na su porta, el a scucha nan y a mustra interes den loke el a tende. Tawata e prome biaha cu el a papia cu nan.

Pa haya contesta riba e hopi preguntanan cu e tawatin, e señora aki a cuminsa studia Bijbel cu e Testigonan. Tur siman e tawatin un lista largo di pregunta pa nan. E kier a sa e nomber di Dios, si ta un solo Dios berdadero tin, si Dios ta aproba pa hende uza imagen den adoracion, y hopi mas. El a ripara cu tur contesta cu e haya tawata for di Bijbel—no opinionnan personal—y esei a sorprend’e y a lag’e keda encanta cu loke e tawata siñando. Pocopoco, el a haya contesta riba e hopi preguntanan cu e tawatin. Awe, e ta adora Yehova den spirito y berdad,  manera Hesucristo a bisa di “adoradonan berdadero.”—Huan 4:23.

Na Sri Lanka, un famia tawata lesa Bijbel hunto riba un base regular, pero toch nan no a haya contesta riba hopi pregunta cu tawata importante pa nan. Aunke nan tawatin mester di yudansa, nan pasto no por a yuda nan. Sinembargo, Testigonan di Yehova a bishita e famia y a laga literatura biblico practico cu nan. Despues, ora cu e Testigonan di Yehova a duna e famia contesta satisfactorio riba nan preguntanan biblico, nan a bai di acuerdo pa sigui un studio di Bijbel. Nan a haya loke nan tawata siña den e studio hopi interesante.

No obstante, door cu tempo cu e esposa tawata mucha iglesia a indoctrin’e cu ideanan robes, tawata dificil pa e mira cu e Tata di Hesucristo ta “e unico Dios berdadero”, manera Hesus mes a declara. (Huan 17:1, 3) Nan a siñ’e cu Hesus ta igual cu e Tata y cu bo no mester cuestiona e “misterio” aki. Desespera, y a la bes cu sinseridad, el a resa na Yehova, uzando su nomber y a pidi Yehova mustr’e ken Hesus ta. Anto caba el a bolbe analisa cuidadosamente e textonan biblico relaciona cu esei. (Huan 14:28; 17:21; 1 Corintionan 8:5, 6) Tawata como si fuera scama a cai for di su wowo, y awor e por a mira bon cla cu Yehova—e Creador di shelo y tera y e Tata di Hesucristo—ta e Dios berdadero.—Isaias 42:8; Yeremias 10:10-12.

Dicon Tin Sufrimento?

E homber Job a sufri inmensamente. Tur su yiunan a muri den un tormenta, y otro desasternan a lag’e plambari. Tambe el a haya un malesa doloroso y a soporta presion di amigonan falso. Confronta cu tur e cosnan aki, Job a papia algun cos descabeya. (Job 6:3) Pero Dios a tene cuenta cu su circunstancia. (Job 35:15, NW) E tawata sa kico Job tawatin den su curason y a percura e conseho cu Job tawatin mester. Dios ta haci mescos pa hende djawe.

Na Mozambique, e mucha homber Castro tawatin 10 aña so dia su mama a muri. El a keda hopi kibra. El a puntra: “Dicon e tawatin cu muri y bai laga nos?” Aunke Castro a ser cria door di mayornan temeroso di Dios, e tawata tur confundi. Kico por a satisface su mente y trankilisa su alma? El a haya consuelo door di lesa un Bijbel chikito na idioma Chichewa, y papia di loke el a lesa cu su ruman hombernan mas grandi.

Pocopoco Castro a bin compronde cu su mama no a muri debi na inhusticia di parti di Dios, sino debi na imperfeccion hereda. (Romanonan 5:12; 6:23) E promesa biblico di un resureccion ta loke mas a consol’e, pasobra el a realisa cu a base di e resureccion, e por tin sigur cu lo e mira su mama atrobe. (Huan 5:28, 29; Echonan 24:15) Lamentablemente, djis un cuater aña despues, su tata a muri. Pero e biaha aki Castro tawata miho prepara pa trata cu su perdida. Awe, e stima Yehova y ta uza su bida fielmente den e sirbishi di Dios. Tur hende cu conoc’e por mira cu el a haya goso.

Hopi hende cu a perde un ser keri ta haya consuelo for di e mesun berdadnan biblico cu a consola Castro. Algun persona cu a sufri hopi dificultad na man di hende malbado, ta puntra mescos cu Job: “Pakico e malbadonan ta sigui biba?” (Job 21:7) Ora cu hende di berdad ta scucha loke Dios ta contesta nan via su Palabra, nan ta haya sa cu e manera cu Dios ta haci su cosnan en realidad ta resulta den beneficio pa nan mes.—2 Pedro 3:9.

Barbara, kende a lanta na Merca, no a experencia personalmente e horornan di guera. Pero hopi pais na mundo tawata envolvi den guera tempo cu e tawata creciendo. Tur dia den noticia tawatin informenan tocante cosnan masha cruel cu tawata tuma luga den guera. Tempo e tawata na scol, el a keda masha straña ora el siña tocante susesonan di historia cu aparentemente a cohe tur hende di sorpresa. El a puntra su mes: ‘Kico tawata responsabel pa esei? Dios tawata interesa den loke tawata tumando luga?’ Barbara a kere cu Dios ta existi, pero e tawatin sintimentonan mixto pa cu Dios.

 Sinembargo, pocopoco Barbara su manera di mira bida a cambia como resultado di su asociacion cu Testigonan di Yehova. El a scucha nan y a studia Bijbel cu nan. El a asisti na e reunionnan na Salon di Reino. Asta el a bai un di nan congresonan grandi. Ademas, el a ripara cu ora e haci pregunta, e no tawata haya diferente opinion di diferente Testigo. Mas bien, tur tawata cuadra cu otro pasobra nan manera di pensa ta basa riba Bijbel.

E Testigonan a mustr’e den Bijbel cu mundo ta bou di influencia di su gobernante, Satanas e Diabel, y ta refleha Satanas su actitud. (Huan 14:30; 2 Corintionan 4:4; Efesionan 2:1-3; 1 Huan 5:19) Nan a splica Barbara cu Bijbel a predeci e susesonan cu a strañ’e. (Daniel, capitulo 2, 7 y 8) Dios a predeci nan pasobra E tin e habilidad di wak den futuro si E ta desea di haci esei. Tawatin algun di e susesonan ei cu ta Dios a causa, y otro susesonan El a simplemente permiti nan tuma luga. E Testigonan a mustra Barbara cu Bijbel a predeci tambe cosnan bon y malo di nos tempo y ta splica nan nificacion. (Mateo 24:3-14) Nan a mustr’e e promesa di Bijbel cu lo bai tin un mundo nobo den cua husticia lo reina y caminda sufrimento lo ta algo di pasado.—2 Pedro 3:13; Revelacion 21:3, 4.

Pocopoco Barbara a cuminsa compronde cu aunke Yehova Dios no ta responsabel pa sufrimento humano, E no ta prevenie door di obliga hende obedece su mandamentonan ora nan ta scohe pa desobedec’e. (Deuteronomio 30:19, 20) Dios a haci areglo pa nos por biba pa semper den felicidad, pero E ta duna nos e oportunidad awor pa demostra si nos lo biba na harmonia cu su camindanan husto. (Revelacion 14:6, 7) Barbara a dicidi di siña cua ta e rekisitonan di Dios y biba segun nan. Tambe el a haya den e Testigonan di Yehova e clase di amor cu Hesus a bisa lo a identifica su siguidonan berdadero.—Huan 13:34, 35.

Abo tambe por beneficia di e areglonan cu a yuda Barbara.

Un Bida Cu Tin Nificacion

Asta hende cu aparentemente tin un bida exitoso, kisas ta busca contesta pa preguntanan cu ta confundi nan. Por ehempel Matthew, un mucha homber na Gran Bretania, semper a sinti un anhelo profundo pa haya e Dios berdadero y e proposito di bida. Ora Matthew tawatin 17 aña su tata a muri. Despues di esei, Matthew a haya su diploma di universidad den muzik. Anto, mas y mas el a cuminsa sinti e banidad di su estilo di bida materialista. El a bandona cas pa e bai biba na Londen, y einan el a hay’e envolvi den droga, den bida di nightclub, astrologia, spiritismo y varios filosofia, entre otro budismo zen, tur esaki en busca di un estilo di bida cu ta dun’e satisfaccion. Desespera, el a sclama na Dios pa yud’e haya e berdad.

Dos dia despues Matthew a topa un amigo bieu y a splic’e di su situacion dificil. E homber aki a studia cu Testigonan di Yehova. Ora el a mustra Matthew e texto di 2 Timoteo 3:1-5, Matthew a keda babuca con precis e Bijbel ta describi e mundo rond di nos. Ora el a lesa e Sermon Riba Sero, esei a conmov’e. (Mateo, capitulo 5-7) Na prome instante, Matthew a basila pasobra el a lesa algun informacion cu a critica Testigonan di Yehova, pero finalmente el a dicidi di asisti na e reunionnan na un Salon di Reino den bicindario.

Matthew a gusta loke el a tende y a cuminsa studia Bijbel cu un di e ancianonan di e congregacion. No a tarda mucho cu el a realisa cu loke e tawata siña ta loke e tawata busca; esaki tawata e contesta riba su oracion anterior. El a haya varios beneficio segun cu el a bandona practicanan cu ta desagrada Yehova. Segun cu el a cultiva un temor sano di Dios, el a sintie motiva pa pone su bida na harmonia cu e mandamentonan di Dios. Matthew a siña cu un bida asina tin berdadero nificacion.—Eclesiastes 12:13.

E echo cu Matthew y e otro personanan menciona den e articulo aki a haya un estilo di bida cu ta duna nan satisfaccion no tawata nan destino. Mas bien, nan a siña cu Yehova  Dios tin un proposito amoroso cu ta encera tur hende cu gustosamente ta scohe pa obedece su mandamentonan. (Echonan 10:34, 35) E proposito ei ta inclui bida eterno den un mundo liber di guera, sin malesa y hamber, liber di asta morto. (Isaias 2:4; 25:6-8; 33:24; Huan 3:16) Esei ta loke abo kier? Si ta asina, bo por siña mas tocante con pa haya e clave pa un bida cu ta duna satisfaccion door di asisti na e reunionnan basa riba Bijbel cu Testigonan di Yehova ta tene na nan Salon di Reino. Bo ta ser invita cordialmente pa haci esei.

[Plachi na pagina 7]

Haci oracion sinsero na Dios, uzando su nomber personal

[Plachi na pagina 7]

Studia Bijbel cu esnan cu realmente ta siña loke e ta contene

[Plachi na pagina 7]

Asisti na e reunionnan na Salon di Reino

[Reconocemento di plachi na pagina 4]

Homber na pia: Chad Ehlers/Index Stock Photography