Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Egumbo otali vulu okukala ehala lyombili

 OSHITOPOLWA OSHI-8

Uuna mwa adhika kuudhigu

Uuna mwa adhika kuudhigu

Petrus gwotango 1:6 otayi ti: “Nyanyukilweni ehupitho ndika, nonando omu na okusa oluhodhi mokathimbo okafupi kowala omolwomamakelo ogendji tage mú adha.”

Opu na iinima yimwe mbyoka hayi yugu aanegumbo nosho wo aaihokani ombili nenyanyu lyawo. Iinima mbyoka ohayi ya po noku tu adha owala ohaluka. (Omuuvithi 9:11) Omolwohole ye Kalunga okwe tu pa ekwatho ndyoka tu na okulandula uuna tu li muudhigu. Ngele tu li muudhigu wu vule oonkondo dhetu, otatu ka vula okwiidhidhimika shampa owala tatu landula omakotampango ngoka ge li mOmanyolo.

 EKOTAMPANGO LYO-1 INEKELA MUJEHOVA

OMBIIMBELI OTAYI TI: “Mu tsikeni iimpwiyu yeni ayihe, oshoka oye omusilishimpwiyu gweni.” (1 Petrus 5:7) Shi kaleka aluhe momadhiladhilo goye kutya Kalunga haye he tu etele omamakelo. Onkee ano, haye tu na okupa ombedhi. (Jakob 1:13) Uuna tatu hedha popepi naye, ote ke tu kwathela momukalo gwa dhenga mbanda. (Jesaja 41:10) Ombiimbeli otayi ti: “Anekeni omaudhigu geni koshipala she.” — Episalomi 62:8.

Ngele owa kala ho yi lesha noku yi konakona esiku kehe otashi ke ku hekeleka. Oto ka mona wo nkene Jehova he tu “kwatha muudhigu wetu auhe.” (2 Aakorinto 1:3, 4; Aaroma 15:4) Oku uvaneka kutya ote ke tu pa ‘ombili ye, ndjoka yi vule uunongo awuhe wopantu.’ — Aafilippi 4:6, 7, 13.

SHOKA WU NA OKUNINGA:

  • Pula Jehova megalikano e ku kwathele, opo omwenyo gwoye kaagu nuke mo

  • Tala iinima mbyoka to vulu okuninga, nokutula miilonga shoka shi li hwepo kwaayihe

EKOTAMPANGO ETI-2 ISILA OSHIMPWIYU NOSHO WO AANEGUMBO LYOYE

OMBIIMBELI OTAYI TI: “Omutima gwomunandunge otagu likola uunongo, nokutsi kwomunamayele otaku kongo ontseyo.” (Omayeletumbulo 18:15) Uuna mu li muupyakadhi, tala kutya oshike lela she wu etitha. Kambadhala wu mone shoka kehe gumwe megumbo a pumbwa. Popya naanegumbo lyoye nokupulakena kuyo. — Omayeletumbulo 20:5.

Ongiini ngele megumbo lyeni omwa hulitha gumwe? Ino kambadhala wu holeke oluhodhi lwoye. Dhimbulukwa kutya Jesus ‘okwa li a lili’ sho kuume ke a si. (Johannes 11:35; Omuuvithi 3:4) Kakele kaashono, owa pumbwa okuvululukwa nawa nokukotha ethimbo lya gwana. (Omuuvithi 4:6) Uuna to shi ningi, otashi ke ku kwathela wi idhidhimikile onkalo ndjoka ondhigu.

SHOKA WU NA OKUNINGA:

  • Kala aluhe ho popi naanegumbo lyoye, omanga inaapu holoka uudhigu washa. Uuna pwa holoka uupyakadhi otaya ka kala ya manguluka okupopya nangoye

  • Popya nayalwe mboka ya pita nale monkalo ya fa ndjoka wu li

 EKOTAMPANGO ETI-3 PULA EKWATHO NDYOKA WA PUMBWA

OMBIIMBELI OTAYI TI: “Kuume oku na ohole aluhe, nomumwayina okwa valwa, opo a kwathe moluhepo.” (Omayeletumbulo 17:17) Ookuume ohaya kala ya hala oku ku kwathela. Ihe omathimbo gamwe nayo ihaya kala ye shi kutya naya ninge shike. Ino tila oku ya lombwela ngele opu na sha shoka wa pumbwa lela. (Omayeletumbulo 12:25) Konga ishewe ekwatho kwaamboka ye na euvoko lyashili lyOmbiimbeli. Omayele ngoka taye ke ku pa okuza mOmbiimbeli otage ke ku kwathela. — Jakob 5:14.

Oto ka mona ekwatho ngele owa kala ho endathana pandjigilile naantu mboka yi itaala shili muKalunga, yo oyi inekela momauvaneko ge. Otashi ke ku hekeleka wo noonkondo uuna to kwathele yalwe mboka ya pumbwa okutsuwa omukumo. Ya lombwela shoka wi itaala kombinga yaJehova nokombinga yomauvaneko ge. Kala ho kwathele mboka ye na ompumbwe. Ino itopola ko kwaamboka ye ku hole noye na ko nasha nangoye. — Omayeletumbulo 18:1; 1 Aakorinto 15:58.

SHOKA WU NA OKUNINGA:

  • Popya nakuume koye kopothingo, e ku kwathele

  • Mu lombwela shoka wa pumbwa kondandalunde

    Mu lombwela oshili yo yeneyene

Tseya oshindji

ONKUNDANA OMBWANAWA YA ZA KUKALUNGA

Omolwashike Kalunga e etha uukolokoshi nokumona iihuna ku kale po?

Uukolokoshi owa li wa tameke ngiini, nomolwashike Kalunga e etha tawu tsikile? Mbela okumona iihuna onaku ka hule po ngaa?