Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Egumbo otali vulu okukala ehala lyombili

 OSHITOPOLWA OSHI-6

Ekwatathano mondjokana ohali lunduluka uuna pwe ya okanona

Ekwatathano mondjokana ohali lunduluka uuna pwe ya okanona

Episalomi 127:3 otayi ti: “Aanona oyo omagano ga za kOMUWA.

Oluvalo! Uuna okanona ka valwa aaihokani ohaya kala ya nyanyukwa, yo kombinga yimwe ohaya kala ishewe ya gwililwa po. Omaiyuvo gaaihokani ohashi vulika ga lunduluke. Otashi vulika mu ka kale mwa kumwa sho ethimbo nosho wo oonkondo dheni odhindji tamu dhi longitha okusila oshimpwiyu okanona keni. Ekwatathano lyeni otashi vulika li kale tali shongola, molwaashoka itamu ka kotha we tamu mbonyoka ngaashi shito. Amuhe omu na okuninga omalunduluko mu sile oshimpwiyu okanona keni, ne mu kaleke po wo ondjokana yeni. Mbela Ombiimbeli otayi vulu ngaa oku mu kwathela mu ungaunge nomalunduluko ngoka? Natu tale.

 OSHINIMA SHO-1 UUNA PWE YA OKANONA ONKALAMWENYO OHAYI LUNDULUKA

OMBIIMBELI OTAYI TI: “Ohole ohayi idhidhimikile ayihe noyi na olukeno.” Ohole “ihayi kongo shayo yene, ihayi ningi omwenyo omwiinayi.” (1 Aakorinto 13:4, 5) Olundji meme oha kala ta gandja eitulomo kokanona ke hoka opo ke ya po. Omusamane ohashi vulika a kale e wete omukadhi kee na ko nasha naye. Onkee ano, kala wu shi kutya owa pumbwa wo okuulukila omusamane gwoye ohole. Oto vulu oku mu kwathela a mone kutya okwa pumbiwa, opo mu sile oshimpwiyu okanona keni amuhe. Opo wu shi ninge otashi pula edhidhimiko nolukeno.

Ombiimbeli otayi ti: “Aalumentu, kaleni mu na oondunge mokukala naakiintu yeni.” (1 Petrus 3:7, OB-1954) Uuna omukulukadhi gwoye a pulumutha, dhimbulukwa kutya oonkondo dhe odhindji ote ke dhi longitha a sile oshimpwiyu okanona keni. Wu li omusamane owa pumbwa okuuva ko oshinima shika. Omukulukadhi gwoye otashi vulika a kale a lulilwa, a vulwa notashi vulika nokuli a kwatwe kepolimano. Omathimbo gamwe, otashi vulika a kale e ku geela. Ihe kala wa ngungumana, molwaashoka “omutalanteni oku vule ofule.” (Omayeletumbulo 16:32) Kala wu na oondunge dhoshilumentu lela. Ambidhidha omukulukadhi gwoye mpoka a pumbwa ekwatho. — Omayeletumbulo 14:29.

SHOKA WU NA OKUNINGA:

  • Tate: Uuna okanona keni ka pumbwa okusilwa oshimpwiyu kwathela omukulukadhi gwoye, kutya nduno omokati kuusiku. Kala ethimbo olindji pamwe naye nosho wo nokanona keni. Opo wu shi ninge owa pumbwa okungambeka ethimbo ndyoka ho longitha miinima yilwe

  • Meme: Ngele omusamane gwoye okwa hala ku ku kwathela mokusila oshimpwiyu okanona keni, taamba ko ekwatho ndyoka. Uuna wu wete itee shi enditha nawa, ino mu pa uusama, ihe mu ulukila owala shoka e na okuninga

 OSHINIMA OSHI-2 KOLEKENI EKWATATHANO LYENI

OMBIIMBELI OTAYI TI: “Oyo notaa ningi onyama yimwe.” (Genesis 2:24) Dhimbulukweni kutya ne aaihokani omu li natango “onyama yimwe.” Kapu na ngoka e na okuninga namukukunoshipe sho megumbo mwe ya okanona. Ningeni ngaashi tamu vulu, opo ekwatathano lyeni li kale lya kola.

Uuna to kwathelwa komusamane gwoye ulika olupandu noku mu ambidhidha. Oohapu dhoye dholupandu otadhi vulu okukala “ealudho.” (Omayeletumbulo 12:18) Kala ho lombwele omukulukadhi gwoye nkene wu mu hole nonkene we mu lenga. Mu pandula sho ha sile oshimpwiyu egumbo lyeni. — Omayeletumbulo 31:10, 28.

“Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.” (1 Aakorinto 10:24) Kala aluhe ho ningi shoka tashi opalele omuholike gwoye. Kaleni aluhe hamu longitha ethimbo mu popye nokupandulathana nosho wo okukala hamu pulakenathana. Igwanithili po omahala geni gopamilalo. Kehe gumwe na kale e na ko nasha noompumbwe dhomuholike gwe. Ombiimbeli otayi ti: “Inamu idhilikathana, shila uuna mu uvathana, mu shi ninge okathimbo kowala.” (1 Aakorinto 7:3-5) Onkee ano, kundathaneni kombinga yomilalo nopwaahe na okwiilila okathima koluko. Ngele amuhe omu na eidhidhimiko, ne ohamu longele kumwe nawa otashi ka koleka ekwatathano lyeni.

SHOKA WU NA OKUNINGA:

  • Kala ho kongo ethimbo mu kale pamwe one amuke yaali nomuholike gwoye

  • Kala aluhe ho ningi iinima mbyoka omuholike gwoye e hole nohayi mu uvitha nawa omathimbo nomathimbo, ngaashi oku mu pa omagano gasha

 OSHINIMA OSHI-3 NKENE MU NA OKUPUTUDHA OKANONA KENI

OMBIIMBELI OTAYI TI: “Owa tseya Omanyolo omayapuki okuza kuunona woye. Otaga vulu oku ku pa oondunge ndhoka tadhi ku thikitha mehupitho.” (2 Timoteus 3:15) Okanona ohaka vulu okwiilonga iinima shimwe to nyengwa. Ohaka vulu okwiilonga sho ke li mela nokuli. Onkee ano, kaleni mwi ilongekidha shoka tamu ka ninga mu ka longe. Okanona ohaka vulu okudhimbulula ewi lyaavali ya ko, sho ke li moshivalelo. Ohaka vulu okumona kutya owu uvite ngiini. Kala ho ka leshele manga okahanona. Nonando kaku uvite ko shoka to ti, otashi ke ka kwathela ka kale ke hole okulesha uuna ka koko.

Okamwoye naka kale haka uvu ewi lyoye aluhe sho to galikana kuJehova. Ino iheka nando wu dhiladhile kutya okashona, noitaka vulu okuuva ko sho to popi kombinga yaKalunga. (Deuteronomium 11:19) Uuna tamu galikana mu li pamwe nako, popya kombinga yiinima mbyoka Kalunga a ninga. (Episalomi 78:3, 4) Shono otashi ke ka ningitha ka mone kutya owu hole Jehova. Otaka ka kala wo ke mu hole uuna ka koko.

SHOKA WU NA OKUNINGA:

  • Galikana wu pewe uunongo kondandalunde nkene wu na okuputudha okamwoye

  • Ngele owa hala okamwoye ka tseye iinima yontumba, kala ho yi endululula, opo ke yi ilonge manga kuyele