Kalata Wakwe Yuda 1:1-25
1 Ne Yuda, ne muomvi wakwe Yesu Klistu, nupya umwina wakwe Yakobo,+ namulembela mweyano yaama,+ mwemuno mwatemwikwa na Leza Tata, nupya mwacingililwa pa mulandu wakwe Yesu Klistu:+
2 Si uluse nu mutende nu kutemwa vivule kuli mwemwe.
3 Mwe yatemwikwa, nanti cakuti nalondanga sana ukumulembela pali vino Leza alatupususha,+ nkulola ukuti icicindama ukumulembela pakuti mukomelezye ukulwisha ukuya nu utailo+ uno wapeezilwe umuku onga sile uku yantu ya muzilo.
4 Namulembela pa mulandu wakuti kuli antu yamwi atiyasookelela muli mwemwe yano uku cisila Malembo yalanzile ukuti yali nu kupingulwa; antu yaa yasitiina Leza, yakaomvya icikuuku cikulu cakwe Leza pakuti yacita ivya winyi*+ nupya yataaya acumi uku Mwene witu wenga sile Yesu Klistu uwatukazile.+
5 Nanti cakuti mwamanya ningo vyonsi vii, nkulonda ukumwiushako ukuti lino Yeova* wapuswishe antu ukufuma umu Ijipti,+ pa cisila ononyile yano yataali nu utailo.+
6 Na ya malaika asiile umulimo uno yapeezilwe ni vifulo vyao ivilinge,+ wayasungila umu maceni ya manda pe umu kaanda* muno yakalolela uwanda ukulu uwa upinguzi.+
7 Vikwene avino cali nu ku ina Sodoma na Gomola na amu misumba iyazingulwike, yacitanga uzelele uwipishe nupya yaali nu lunkumbwa ulutaali ulwa civyalilwa;+ antu yaa yaya icilangililo ica kutucelula pali vino yapingwilwe ukufululwa umu moto wa pe.*+
8 Asi mulandu na cii, antu yaa yakaelenganya pa viipe, yakakowezya imili yao, yakasuula utunguluzi, nu kupontela yano Leza wacindika.+
9 Lelo lino Mikaeli+ malaika mukalamba+ yapusine na Ciwa nu kutandika ukupaazyanya pa citumbi cakwe Mose,+ waicefizye, atamupingwile nupya ataomvizye amazwi ya miponto,+ lelo watiile: “Si Yeova* akukalipile.”+
10 Nomba antu yaa yakalanda iviipe pa vintu vyonsi vino yatamanya ningo.+ Kuya kwene yamanya ivintu vimwi, lelo yavimanya mu civyalilwa wa nyama izisielenganya.+ Nupya ivintu vii vino yakacita vikayonona.
11 Kalanda ku yantu yaa, pano yakakolanya vino Kaini+ wacisile nupya yakasimwilila uku kukolanya ivicitwa viipe vyakwe Balamu+ pa mulandu na ukaitemwe, nupya yakaitwala ku wononesi wakwe vino Kola+ wailetelile pa mulandu ni mivwangile yakwe ucipondoka!+
12 Antu yaa, i vimawe ivyafisama mu manzi lino yakuliila pamwi namwe,+ aacemi aakailisha kwaula intete;+ a makumbi aatakwata manzi aakasendwa cisendwesendwe nu muza;+ i miti isiseeka ivizao na pa nsita ino ilinzile ukuseeka, iyafwililikila nupya yatukulwa kumwi na masinte;
13 yaya wa maimbi aipishe aapali yemba aakafumizya ivikwi ukunzi ivilinzile ukuyaletela insonyi;+ yaya wa ntanda izikapita icipitepite, zino yasungila imfinzi iikomeshe* iya pe.+
14 Vikwene avino na Inoki+ uwalenga 7 kufuma pali Adamu wasowile pa yantu yayo ukuti: “Lolini! Yeova* wizile na amuzilo yakwe imintapendwa+
15 kuti apingule yonsi,+ alino nu kusinila antu aipe pa vicitwa vyao iviipe vino yacisile, alino ni vintu vyonsi viipishe vino ya kacita ya viipe yavwanzile pali aliwe.”+
16 Antu yaa yakailizyanya+ sana pa umi wao, yakalondela vino imili yao ikulonda,+ nupya yakaituumika mu mivwangile; yakatumfya auze pakuti yaizanzye.+
17 Acino mwemo mwe yatemwikwa, mwaiusha amazwi aavwanzilwe* na atumwa ya Mwene witu Yesu Klistu,
18 aakuti: “Mu manda ya kushalikizya kulaya antu ya mitumfyo, aalalondelela vino imili yao ikulonda pa kucita iviipe.”+
19 Antu yaa, aliyo yakaleta malekano,+ yakacita ivintu wa nyama, nupya yasitungululwa nu mupasi wakwe Leza.
20 Lelo mwemo mwe yatemwikwa, twalililini ukukomya utailo winu uwa muzilo, nupya mwapepa ukulingana nu mupasi wa muzilo,+
21 pakuti mutwalilile ukwikala umu kutemwa kwakwe Leza,+ lino mukulolela uluse lwa Mwene witu Yesu Klistu ululalenga mukaye nu umi wa pe.+
22 Nupya twalililini ukuya nu uluse+ kuli yamwi aakatwisika;+
23 mwayapususha+ pa kuyasompola umu moto. Lelo twalililini ukuya nu luse kuli yauze, nomba mwacenjela pa kucita vivyo, nupya mwataluka sana ku vyakuzwala vyao ivyakoweziwa ni vicitwa vyao iviipe.+
24 Lyene kuli wiyo uwakwata maka ya kumucingilila uku kuluvyanya nu kumulenga ukutwalilila ukuya aakaele+ ni nsansa, Leza witu uwa lulumbi,
25 Leza wenga sile, Kapususha witu, kupitila muli Yesu Klistu Umwene witu, kuye ululumbi, umucinzi, amaka, na ukateeka ukufuma manda pe, na ndakai kwene nga nu kuya manda pe. Ameni.
Mafutunoti
^ Nanti “kupama umu kucita ivya nsonyi.” Mu Cigiliki, a·sel′gei·a. Lolini Ulondolozi wa Mazwi.
^ Lolini Ivyeo na Vyuze pa A5.
^ Nanti “imfinzi ikulu.”
^ Cii cikalozya uku wononesi wa pe.
^ Lolini Ivyeo na Vyuze pa A5.
^ Kuli kuti uwononesi wa pe.
^ Lolini Ivyeo na Vyuze pa A5.
^ Nanti “ivintu ivyasoowilwe.”
